جاقىندا عانا سپورت جانە تۋريزم مينيسترلىگى مانەرلەپ سىرعاناۋشى ميحايل شايدوروۆ پەن ونىڭ كومانداسىنىڭ دايىندىعىنا جۇمسالعان قارجى تۋرالى اقپارات تاراتقان ەدى. ۆەدومستۆو سپورتشىعا مەملەكەتتىك قولداۋ تەتىگى بارلىق كەزەڭدە كورسەتىلدى دەگەنمەن, سپورتشى تولىققاندى قولداۋ تەك سوڭعى ماۋسىمدا عانا كورسەتىلگەنىن ايتادى. Tengrinews-كە بەرگەن سۇحباتىندا م. شايدوروۆ ءوزىنىڭ جالاقىسى تۋرالى قۇپيا اقپاراتتىڭ ءدۇيىم جۇرتقا جاريا بولعانى ونىڭ كوڭىلىنە قاياۋ تۇسىرگەنىن جاسىرمادى.
«مەنىڭ جالاقىم تۋرالى اقپاراتتىڭ كوپشىلىككە جاريا بولعانى كوڭىلىمدى تۇسىرگەنى راس. جەكە اقپاراتتىڭ بۇلاي جاريالانۋى ورىنسىز دەپ سانايمىن. شىققان شىعىنعا نەگە ەرەكشە نازار اۋدارۋ كەرەك بولدى ەكەن, تۇسىنبەيمىن. مەن جاي عانا ءۇزىلىسسىز جاتتىعىپ, ناتيجەگە جەتۋگە تىرىستىم», دەدى ول.
مانەرلەپ سىرعاناۋشى ەشقاشان قولداۋدىڭ جوقتىعىنا شاعىمدانباعانىن, العان قاراجاتتىڭ بارلىعىن تەك دايىندىققا جۇمساعانىن اتاپ ءوتتى. ونىڭ پىكىرىنشە, سپورتتا جۇلدەنىڭ قۇنى تەك ناتيجەمەن باعالانۋى ءتيىس.
وليمپيادا ويىندارىنىڭ جابىلۋ سالتاناتىندا قازاقستان تۋىن ميحايل شايدوروۆ الىپ شىقتى
سونداي-اق سپورتشى شىعىنداردىڭ ەداۋىر بولىگىن وتباسى مەن دەمەۋشىلەر كوتەرگەنىن ايتتى. الايدا ولار بۇل تۋرالى ەش جەردە جاريالاماعان.
م. شايدوروۆتىڭ ايتۋىنشا, مانەرلەپ سىرعاناۋداعى كوپتەگەن شىعىندار زاڭدا قاراستىرىلماعان. ماسەلەن, مامانداردىڭ شۇعىل ۇشاقپەن قاتىناۋى, وقۋ-جاتتىعۋ جيىندارىنان تىس تۇراتىن باسپانا, تاۋلىكتىك شىعىندار, كوستيۋمدەر, مۋزىكاعا ليتسەنزيالار سياقتى شىعىندار سپورتشىنىڭ ءوز ەسەبىنەن تولەنەدى.
ونىڭ ايتۋىنشا, ول 2025 جىلى الەم چەمپيوناتىندا كۇمىس مەدال العاننان كەيىن عانا ونىڭ جالاقىسى ءوسىپ, باپكەرلەر مەن مامانداردىڭ ەڭبەگى تولەنە باستاعان. الماتى مەن استاناداعى مۇز ايدىندارى دايىندىققا بەرىلىپ, العاش رەت باعدارلامالارى مەن كوستيۋمدەرى, دارىگەر قىزمەتى قارجىلاندىرىلعان. بۇعان دەيىن ول ۇزاق ۋاقىت بويى ەڭ بولماعاندا ەڭ تومەنگى جالاقىنى كوتەرۋدى سۇراعان. سەبەبى ونىڭ قاراجاتى ءتىپتى بازالىق دايىندىققا دا جەتپەگەن.
ايتا كەتەيىك, 21 جاستاعى ميحايل شايدوروۆ مانەرلەپ سىرعاناۋدان وليمپيادا چەمپيونى اتاندى. مەملەكەت باسشىسى قاسىم-جومارت توقاەۆ ميحايل شايدوروۆتى قىسقى وليمپيادا ويىندارىنىڭ چەمپيونى اتانۋىمەن قۇتتىقتادى. پرەزيدەنتتىڭ شەشىمىمەن ميحايل شايدوروۆ II دارەجەلى «بارىس» وردەنىمەن ناگرادتالدى.
