فوتو: kolesa.kz (نەيروجەلى كومەگىمەن جاسالعان)
جەرگىلىكتى پروكۋراتۋرا جۇرگىزۋشىلەردى زاڭسىز اكىمشىلىك جاۋاپكەرشىلىككە تارتۋ دەرەگىن اشكەرەلەدى. Halyqstan تەلەگرام-ارناسىنىڭ حابارلاۋىنشا, ءتارتىپ ساقشىلارى كولىك يەلەرىنە جالپى سوماسى 345 349 309 تەڭگە بولاتىن 32 260 حاتتاما تولتىرعان. ولارعا سۇلەيمەنوۆ كوشەسىندە ساعاتىنا 40 شاقىرىم جىلدامدىقتان اسقان دەگەن ايىپ تاعىلعان.
پروكۋرورلىق تەكسەرىس بارىسىندا اتالعان جول بەلگىسى ءتيىستى كەلىسىمدەرسىز جانە جول قوزعالىسى جاعدايىنا تالداۋ جاسالماي ورناتىلعانى بەلگىلى بولدى. وسىلايشا پوليتسيا زاڭ تالاپتارى ساقتالماي قابىلدانعان شەشىمگە سۇيەنىپ, ازاماتتاردى جاۋاپقا تارتقان.
كەيىن اتقارۋشى ورگان جول بەلگىسىن الىپ تاستاعانىمەن, شىعارىلعان قاۋلىلار كۇشىندە قالىپ قويعان. سونىڭ سالدارىنان جۇرگىزۋشىلەر تولەگەن قاراجاتىن قايتارا الماعان. تاراز قالاسىنىڭ تۇرعىنى سۆەتلانا بوياركينا سوتقا جۇگىنىپ, ءوز قۇقىعىن قورعاپ شىققان. سوت جول قوزعالىسىن ۇيىمداستىرۋ كەزىندە زاڭ تالاپتارى ساقتالماعان دەگەن شەشىم قابىلدادى. پوليتسيا بۇل شەشىمگە شاعىم تۇسىرمەگەن.
قازىرگى ۋاقىتتا تەك بىرنەشە ايىپپۇلدىڭ كۇشى جويىلعان. ال تۇرعىندار وزدەرىنىڭ زاڭسىز جاۋاپقا تارتىلعانىن بىلمەۋى مۇمكىن.
ەندى پوليتسيا دەپارتامەنتى پروكۋرور ۇسىنعان تالاپتاردى ورىنداپ, نەگىزسىز وندىرىلگەن قاراجاتتى قايتارۋ ماسەلەسىن قاراستىرۋى ءتيىس. الايدا جاۋاپكەرشىلىك ماسەلەسى اشىق كۇيىندە قالىپ وتىر. پوليتسيا جول بەلگىلەرىن ورناتۋ اكىمدىكتىڭ قۇزىرىندا ەكەنىن ايتسا, اكىمدىك مۇنداي جۇمىستار پوليتسيانىڭ نۇسقاماسى نەگىزىندە جۇرگىزىلەتىنىن مالىمدەگەن.
جۇزدەگەن ميلليون تەڭگەنىڭ تاعدىرى مەن كىنالى تاراپتىڭ جاۋاپكەرشىلىگى الداعى ۋاقىتتا بەلگىلى بولماق.
