تاتۋلىققا ۇندەيتىن تاعىلىمدى شارا

ەل مەن ەلدىڭ, ۇلت پەن ۇلتتىڭ اراسىنا التىن كوپىر ورناتىپ, جات جەرلىك بولسا دا جاقىنداستىرا تۇسەتىن نەگىزگى بايلانىس كۇشى ولاردىڭ ونەرى مەن مادەنيەتى بولسا كەرەك. وسى قاعيدانى بەرىك ۇستانىپ, ۇلتارالىق تاتۋلىقتىڭ ارتا تۇسۋىنە ۇلەس قوسىپ جۇرگەن ءبىلىم جانە عىلىم مينيسترلىگى مەن KATEV قوعامدىق قورى بيىل دا «جارقىن بولاشاق» ءتىل جانە مادەنيەت فەستيۆالىن ءوز دەڭگەيىندە وتكىزدى. بۇعان دەيىنگى جارىستار رەس­پۋبليكا شەڭبەرىندە شەكتەلسە, وسى جولعى دارىندىلار دوداسى حالىقارالىق دارەجەگە كوتەرىلگەن. ەل تاۋەلسىزدىگىنىڭ 25 جىلدىعىنا وراي ۇيىمداستىرىلعان شاراعا الەمنىڭ جيىرماعا جۋىق ەلىنەن ونەرلى ورەندەر كەلىپ, ءوز باقتارىن سىنادى. «ەلباسى نۇرسۇلتان نازارباەۆ­تىڭ «قازاق ءتىلى عا­جاپ ءتىل, تەك ءبىز ونى ناسيحاتتاي ءبىلۋىمىز كەرەك», دەگەن ءسوزىن تۋ ەتىپ, جىل سايىن «جار­قىن بولاشاق» قازاق ءتىلى وليمپياداسى وتكىزىلىپ كەلەدى. بۇل وليمپيادانى وتكىزۋدەگى باس­تى ماقسات – مەملەكەتتىك ءتىلدىڭ ءمار­تەبە­سىن كوتەرۋ, قازاق جانە وزگە ۇلت وكىل­­دەرىنىڭ قازاق تىلىنە دەگەن قىزىعۋشىلىعىن ارتتىرۋ, ولار­عا ۇلتتىق قۇندىلىقتارىمىزدى, سالت-ءداستۇرىمىزدى, تاريحىمىزدى بويىنا ءسىڭىرۋ ارقىلى «ماڭگىلىك ەل» جالپىۇلتتىق يدەياسىن جۇزەگە اسىرۋعا ۇلەس قوسۋ بولىپ تابىلا­دى. بيىل 8-ءشى رەت وتكىزىلگەن «جار­­قىن بولاشاق» قازاق ءتىلى وليم­­پياداسىنا دۇنيەنىڭ تۇكپىر-تۇكپىرىنەن 5 مىڭعا جۋىق دارىندى جاس قاتىسىپ, 172 وقۋشى جەڭىمپاز اتانعان جانە ولاردىڭ 42-سىنە جوعارى وقۋ ورىندارىنىڭ ءبىلىم گرانتتارى تابىستالدى. وسى جولى وليمپياداعا ءبىرىنشى رەت قىرعىزستان, وزبەكستان, موڭ­عوليا جانە التاي ولكەلەرىنەن كەلگەن قانداستارىمىز قاتىستى. كىندىك قانى تامعان جەرگە كەلگەن بىرقاتار قازاق بالالارىنا دا جوعارى وقۋ ورىندارىنىڭ گرانت­تارى ءبولىنىپ, ولارعا اتا­جۇرتىندا ءبىلىم الۋعا جاعداي جاسالدى», – دەدى العاش بولىپ ءسوز العان KATEV حالىقارالىق قوعامدىق قورىنىڭ پرەزيدەنتى دارحان وتە. فەستيۆالدىڭ باستالۋ با­رى­سىندا ءار ەلدىڭ تۇرمىس-ءتىر­­­­شى­­لىگىنەن, مادەنيەتىنەن ءمالى­مەت بەرەتىن كورمە ۇيىم­داس­تى­رىلعانىن دا ايتا كەتسەك دەي­مىز. جۇزدەن جۇلدەگەر, مىڭ­نان مىقتى شىققان وقۋشىلاردى ما­را­پاتتاۋ راسىمىندە قۇرمەتتى قوناقتاردىڭ قۇرامىن پارلامەنت دەپۋتاتتارى ساۋىتبەك اب­دراح­مانوۆ پەن قۋانىش ايتا­قانوۆ, قحا مۇشەسى, پروفەسسور ءادىل احمەت تولىقتىردى. «ءبىر ماسەلەنى استىن سىزىپ اي­تۋىمىز كەرەك. KATEV قورى ۇيىمداستىراتىن «جارقىن بو­لاشاق» فەستيۆالىنىڭ دەڭگەيى جىل­دان جىلعا ءوسىپ كەلەدى. بۇگىنگى قۇلاقتان كىرىپ بويدى العان اسەم ءان مەن بي جۇرەكتەن جۇرەككە جەتەتىن دۇنيەلەر. بۇعان تارجىمە كەرەك ەمەس. ەگەمەندىگىمىزدىڭ 25 جىلدىعىنا ارنالعان فەستيۆالعا 25 ەلدەن كەلگەن تۇلەكتەر بۇكىل جەر جۇزىنە ەڭ كەرەگى بىرلىك پەن تاتۋلىق, دوستىق ەكەنىن, سوعىسسىز ءومىر كەرەك ەكەنىن دالەلدەدى. الەم­نىڭ ءار جەرىنەن كەلگەن جاس­تار ەرتەڭ ءوز ەلدەرىنە قايتقاندا ءبىزدىڭ تاۋەلسىز قازاقستاننان بەيبىتشىلىكتىڭ جارشىسى بولىپ, دوستىقتىڭ ەلشىسى بولىپ اتتانادى. مەن بۇگىنگى فەستيۆالدە ورىندالعان اندەر مەن بيلەر بىرىككەن ۇلتتار ۇيىمىنىڭ باس پاتەرىندە كورسەتۋگە لايىقتى ءدۇ­نيە دەپ سانايمىن», – دەپ ءادىل احمەتوۆ ءوز ويىن ورتاعا سالدى. وليمپيادانى وتكىزۋدىڭ باس­تى ماقساتى – مەملەكەتتىك ءتىلدىڭ قولدانىلۋ اياسىن كەڭەيتۋ بولسا, ەكىن­شى جاعىنان, ەرەكشە دارىندى وقۋشىلاردى انىقتاۋ, قازاق تىلىندە ءان ايتۋ, مانەرلەپ وقۋ, عىلىمي جۇمىس قورعاۋ, شى­­­عار­ماشىلىق قابىلەتىن كورسەتۋ ارقىلى قازاقستاننىڭ «جارقىن بولاشاعى» ءۇشىن ايانباي قىزمەت ەتەتىن قابىلەتتى جاس­تارعا قولداۋ كورسەتۋ ەكەنىن دە ەستەرىڭىزگە سالامىز. سايىستىڭ ىرىكتەۋ كەزەڭىندە مەملەكەتتىك جانە مەملەكەتتىك ەمەس جالپى ءبىلىم بەرەتىن مەك­تەپ­­تەردىڭ, لي­تسەيلەردىڭ, گيم­نا­زيا­لاردىڭ اراسىندا ەلىمىزدىڭ بارلىق وبلىستارىنان, سونداي-اق, جوعارىدا اتاپ وتكەنىمىزدەي, شەتەلدە تۇ­راتىن قانداستارىمىزدىڭ ىشىنەن 7-11 سىنىپ وقۋشىلارى 5 باعىت بويىنشا «ءتىلشى-ادە­بيەت­شىلەر», «جاس عالىمدار», «جا­­زۋ­شىلار», «ءسوز شەبەرلەرى», «ءان­شى-بۇلبۇلدار» دەگەن اتالىمدار اياسىندا باقتارىن سىناعان بو­لاتىن. ايتا كەتەتىن تاعى ءبىر جايت, بۇل جولعى جارىسقا كەلگەن اف­ريكا, سەنەگال, كورەيا, رە­سەي سياقتى ەلدەردىڭ ونەرلى وكىل­دەرىنە جوعارى وقۋ ورىندارىنان بولىنگەن گرانتتار بەرىلمەيدى, ولار­دىڭ كەلۋدەگى نەگىزگى ماقساتى  تاۋەلسىزدىگىمىزدىڭ 25 جىلدىعىن وزدەرىنىڭ ونەرى ار­قى­لى قۇتتىقتاۋ سەزىمدەرىن جەتكىزۋ بولىپ تابىلادى. ءوز ءتىلىن ورگە شىعارىپ, وزگە ءتىلدى وگەي كورمەيتىن جاستاردىڭ بۇل جولعى قادامى دا قارقىندى. شاراپاتتى شارانىڭ جابىلۋ سالتاناتىنداعى جۇرەك تە­بى­رەنتەر اسەرلى تۇستارى ار­قىلى فەستيۆالدىڭ جوعارى دەڭگەيدە ۇيىمداستىرىلعانىنا كوز جەت­كىزۋگە بولادى. راۋان قايدار, «ەگەمەن قازاقستان» استانا