قارا التىن قۇنى سوڭعى التى ايداعى ەڭ جوعارعى مەجەنى باعىندىردى

ەڭبەك نارىعى تۇراقتىلىق كورسەتتى

اقش ەڭبەك نارىعى ورنىقتى بولىپ وتىر. العاشقى جۇمىسسىزدىق جاردەماقىسىن الۋعا بەرىلگەن وتىنىشتەر سانى 206 مىڭعا دەيىن ازايدى, بۇل بولجامداعى 223 مىڭ كورسەتكىشىنەن تومەن (الدىڭعىسى – 227 مىڭ). قايتالاما وتىنىشتەر سانى 1,869 ملن بولدى (بولجام – 1,860 ملن).

سونىمەن بىرگە ىسكەرلىك بەلسەندىلىك يندەكسى كۇتپەگەن جەردەن ءوستى. سوڭعى بەس ايدا فيلادەلفيا فەدەرالدىق رەزەرۆ بانكتىڭ يندەكسى ەڭ جوعارى دەڭگەيگە جەتتى.

ال تۇرعىن ءۇي نارىعىندا بىرقاتار ءالسىز ستاتيستيكا تىركەلدى. قاڭتاردا اياقتالماعان تۇرعىن ءۇي ساتۋ كەلىسىمدەرى 0,8% تومەندەدى (بولجام – 1,4% ءوسىم; بۇرىن – مينۋس 7,4%). ال ەكونوميكانىڭ الدىن الا ينديكاتورلارىنىڭ يندەكسى جەلتوقساندا 0,2% تومەندەدى, بۇل بولجامعا سايكەس كەلدى.

اقش فەدەرالدىق رەزەرۆ جۇيەسىنىڭ (فرج) سوڭعى وتىرىسىنىڭ حاتتاماسى رەتتەۋشى ىشىندە پىكىر قايشىلىعى بارىن كورسەتتى. كەيبىر مۇشەلەر ينفلياتسيالىق قىسىم ساقتالسا, مولشەرلەمەنى ءارى قاراي كوتەرۋ مۇمكىندىگىن جوققا شىعارمايدى. فەدەرالدىق رەزەرۆ كەڭەسىنىڭ مۇشەسى ستيۆەن ميرانا ەڭبەك نارىعى مەن تاۋار سەكتورىنداعى ينفلياتسيا تۇراقتى بولعان جاعدايدا مولشەرلەمە تراەكتورياسى «ازىراق جۇمساراتىنىن» ايتتى.

ينۆەستورلار اگرەسسيۆتى مونەتارلىق جۇمسارۋ كۇتۋلەرىن ازايتقانىمەن, جىل سوڭىنا دەيىن 25 بازيستىك پۋنكتتەن ەكى رەت مولشەرلەمە تومەندەيدى دەگەن بولجام ساقتالىپ وتىر. نەگىزگى نازار اقش-تىڭ IV توقسان بويىنشا ءجىو الدىن الا باعاسىنا جانە فرج ءۇشىن نەگىزگى ينفلياتسيالىق باعدار بولىپ سانالاتىن PCE (جەكە تۇتىنۋ شىعىستارىنىڭ يندەكسى, ينفلياتسيانى باعالاۋدىڭ نەگىزگى كورسەتكىشى) يندەكسىنە اۋدارىلىپ جاتىر.

مۇناي باعاسى نەگە كۇرت ءوستى؟

Brent مۇنايى التى ايلىق ماكسيمۋمعا جاقىندادى

Brent مۇنايىنىڭ باعاسى باررەلىنە 71,78 دوللار دەڭگەيىنە كوتەرىلدى. تەحنيكالىق تۇرعىدا Brent كۇندىك تايمفرەيمدە 70,55 دوللار مەجەسىن ەڭسەرىپ, 72 دوللار دەڭگەيىنە قاراي جىلجۋى مۇمكىن. دەگەنمەن نارىقتاعى قۇبىلمالىلىق باعا قوزعالىسىن تەز وزگەرتۋى ىقتيمال.

قازىرگى باعا بەلگىلەنىمدەرىنىڭ سوڭعى التى ايداعى ەڭ جوعارى دەڭگەيگە جاقىنداپ جانە اپتا ىشىندە 5%-دان استام ءوستى. باعانىڭ وسۋىنە اقش پرەزيدەنتى دونالد ترامپتىڭ يرانمەن يادرولىق كەلىسسوزدەر مەرزىمىنە قاتىستى مالىمدەمەلەرى ىقپال ەتتى.

مالىمدەمەگە سايكەس, كەلىسسوزدەردى ىلگەرىلەتۋ ءۇشىن 10-15 كۇننەن ارتىق ۋاقىت قالماعان. سونىمەن قاتار اقش تاراپى تاياۋ شىعىس ايماعىنا 2003 جىلعى يراك سوعىسىنان بەرگى ەڭ ءىرى اسكەري توپتاستىرۋىن ورنالاستىردى. بۇل جاعداي يران وبەكتىلەرىنە جاسالعان وتكەن جىلعى نۇكتەلىك سوققىمەن سالىستىرعاندا كەڭ اۋقىمدى وپەراتسيا تاۋەكەلىن ارتتىردى.

گەوساياسي شيەلەنىس جەتكىزۋ تىزبەگىنىڭ ءۇزىلۋ قاۋپىن كۇشەيتتى. ەگەر قاقتىعىس ءورشيتىن بولسا, يران ورمۋز بۇعازى ارقىلى مۇناي تاسىمالىن شەكتەۋى مۇمكىن دەگەن قاۋىپ بار. اقش ەنەرگەتيكا مينيسترلىگىنىڭ دەرەگىنە سايكەس, مۇناي قورى ءبىر اپتادا 9 ملن باررەلگە قىسقاردى. بۇل – 2025 جىلدىڭ قىركۇيەگىنەن بەرگى ەڭ ءىرى تومەندەۋ.

يران توڭىرەگىندەگى قاۋىپ مۇناي باعاسىن قايتا قىمباتتاتتى

اقش نارىعى

اقش قور نارىعى بۇرىنعى تومەندەۋدەن كەيىن تۇراقتالدى. S&P 500 فيۋچەرسى پرەماركەتتە ايتارلىقتاي وزگەرمەدى. ساۋدا گرافيگىندە يندەكس 6800-6900 پۋنكت ارالىعىندا ساقتالىپ وتىر.

ينۆەستورلار مونەتارلىق ساياساتقا اسەر ەتۋى مۇمكىن نەگىزگى ماكروەكونوميكالىق دەرەكتەر جاريالانۋىن كۇتىپ وتىر. نەگىزگى نازار – IV توقسان ءىجو-ءنىڭ الدىن الا باعاسى مەن PCE يندەكسىنە اۋدارىلىپ وتىر.

فرج وتىرىسىنىڭ حاتتاماسى كوميتەت ىشىندە پىكىر الشاقتىعى بارىن كورسەتتى: ينفلياتسيالىق قىسىم ساقتالسا, ساياساتتى قوسىمشا قاتاڭداتۋ مۇمكىندىگى جوققا شىعارىلمايدى. سوعان قاراماستان نارىق 2026 جىلدىڭ سوڭىنا دەيىن مولشەرلەمەنى 25 بازيستىك پۋنكتتەن ەكى رەت تومەندەتۋدى ەسەپكە الىپ وتىر.

19 اقپانداعى نەگىزگى سەسسيا قورىتىندىسىندا اقش يندەكستەرى تومەندەدى: Dow Jones (اقش ونەركاسىپتىك كومپانيالارى اكتسيالارىنىڭ يندەكسى) – 0,54%, S&P 500 (اقش-تىڭ 500 ءىرى كومپانياسىنىڭ اكتسياسىن قامتيتىن قور نارىعىنىڭ يندەكسى) – 0,28%, Nasdaq Composite (تەحنولوگيالىق كومپانيالار اكتسيالارىن قامتيتىن اقش بيرجا يندەكسى) – 0,31%. S&P 500 سەكتورلارىنىڭ سەگىزى تەرىس ايماقتا جابىلدى, اسىرەسە قارجى, تۇتىنۋشىلىق جانە تەحنولوگيا سەكتورلارى قىسىمعا ۇشىرادى.

كريپتوۆاليۋتا نارىعى: بيتكوين سەرپىلىسى

بيتكوين باعاسى 67 851 دوللار دەڭگەيىنە كوتەرىلدى. ءبىر تاۋلىكتە 1,39%-عا, اپتا ىشىندە 1,85%-عا قىمباتتادى.

65 125 دوللارلىق قولداۋ دەڭگەيى ساقتالىپ, كوررەكتسيا توقتادى. 72 271 دوللار شىڭىنان كەيىنگى تومەندەۋ شامامەن ءتورت كۇنگە سوزىلدى. نارىق ەكى تاۋەكەل فاكتورىنىڭ اراسىندا تۇر: يران توڭىرەگىندەگى گەوساياسي جاعداي جانە فرج-ءنىڭ قاتاڭ ريتوريكاسى.

بازالىق ينفلياتسيا بويىنشا PCE يندەكسىنىڭ بولجامى شامامەن 3%, ال IV توقسان ءجىو ءوسىمى 2,8% دەڭگەيىندە كۇتىلەدى.

بيتكوين 69 700 دوللاردان جوعارى دەڭگەيگە كوتەرىلۋى مۇمكىن. تەحنيكالىق تۇرعىدا 75 مىڭ دوللار دەڭگەيىنە دەيىن قالپىنا كەلۋ الەۋەتى ساقتالعان, بىراق نارىق ازىرگە كۇتۋ رەجيمىندە. نەگىزگى فۋندامەنتالدى قىسىم كۇشەيسە, كەلەسى يمپۋلس تە وتكىر بولۋى ىقتيمال.

كريپتوۆاليۋتا نارىعىنىڭ كاپيتاليزاتسياسى 2,32 ترلن دوللار بولدى. قۇرىلىم بويىنشا: BTC (بيتكوين كريپتوۆاليۋتاسى) – 58,4%, ETH (ەفيريۋم كريپتوۆاليۋتاسى) – 10,2%.

الەم مۇناي باعاسىنا تاۋەلدى...