28 ءساۋىر كۇنى «قازاقستان» ۇلتتىق ارناسىندا «شىن جۇرەكتەن» قايىرىمدىلىق تەلەمارافونى باستالعانى تۋرالى جازعان بولاتىنبىز. اتالعان شارا قايىرىمدىلىققا مۇقتاج جاندار مەن ولارعا قولۇشىن سوزۋعا ەرىكتى ادامدار اراسىنداعى التىن كوپىرگە اينالدى دەسەك, ارتىق ايتقاندىق ەمەس. قايىرىمدىلىق پەن ىزگىلىكتى ناسيحاتتاپ, ءتۇرلى دەرتكە شالدىققان جاندارعا كومەك قولىن سوزۋدى كوزدەگەن بۇل الەۋمەتتىك-قايىرىمدىلىق تەلەجوباسى ۇلتتىق ارنادان 3 كۇن بويى كۇندىز-ءتۇنى توقتاۋسىز, تىكەلەي ەفيرگە شىعىپ وتىردى. تەلەمارافونعا ۇلتتىق ارنانىڭ ايماقتارداعى فيليالدارى دا تۇگەلدەي اتسالىسىپ, كومەككە ءزارۋ جانداردىڭ ارماندارىنىڭ ورىندالۋىنا سەپ بولدى.
ەستەرىڭىزگە سالا كەتەيىك, «قازاقستان» تەلەارناسى بىرنەشە جىل قاتارىنان كۇن سايىن اينالاسىنا جاقسىلىق جاسايتىن ادامدار تۋرالى سىر شەرتەتىن «شىن جۇرەكتەن» اتتى تەلەجوباسىن ۇسىنىپ كەلەدى. ءبىزدىڭ قوعامدا ءومىردىڭ ءتۇرلى اۋىرتپالىعىن كورىپ, تاعدىردىڭ ءارتۇرلى سىناعىنا تاپ بولسا دا مويىمايتىن قايسار جاندار كوپ. ولار وزدەرى بەتپە-بەت كەلگەن قيىندىقتى جەڭىپ قانا قويماي, سونىمەن قاتار اينالاسىنداعى ادامدارعا دا قولىنان كەلگەنشە جاقسىلىق جاساپ, ايرىقشا ەرىك-جىگەردىڭ, قايىرىمدىلىقتىڭ ۇلگىسىن كورسەتىپ ءجۇر. ولاردىڭ قاجىماس قايراتى, يگى ىستەرى مەن ومىرلىك تاجىريبەسى تەك تۋعان-تۋىستارىنا, ءوز ورتاسىنا عانا ەمەس, بۇكىل ەل-جۇرتقا ۇلگى بولا الادى.
ەڭ قيىنى, ولاردىڭ اراسىندا ءالى ءومىردىڭ ىستىق-سۋىعىن سەزىنىپ ۇلگەرمەگەن بۇلدىرشىندەر مەن بوزبالالار دا بار. بۇكىلحالىقتىق اكتسيانىڭ تۇپكى ماقساتى دا سول, تاعدىردىڭ قاتال سىنىنا ۇشىراعان جاندارعا, ونىڭ ىشىندە دەرتىنە داۋا ىزدەگەن پەرىشتە پەيىل بالالارعا قولۇشىن بەرۋ.
اتالعان ارنا ۇيىمداستىرىپ جاتقان تەلەمارافوندا ءاۋ باستا 4 بالاعا كومەك كورسەتۋ جوسپارلانعان-دى. بىراق, قايىرىمدىلىق ءىسى تەك مۇنىمەن شەكتەلىپ قالماق ەمەس. بۇل ورايدا «قازاقستان» رترك» اق قىزمەتكەرلەرى دە قولىنداعى بارىن ايانىپ قالماي, اركىم شاماسىنا قاراي ماتەريالدىق كومەك كورسەتە ءبىلدى. كوكسارتروز دەرتىنە 11 جاسار دياس جانىبەك ۇلى نەبارى ەكى جارىم جاسىندا شالدىققان. سودان بەرى سەگىز جىل ۋاقىت ءوتىپتى. بۇگىندە دارىگەرلەر دياستىڭ بۋىندارىن بوساتىپ, بۇلشىق ەتتەرىن شىنىقتىرۋعا جۇمىس جاساۋدا. ول ءۇي جاعدايىندا ءبىلىم الادى. الەۋمەتتىك قىزمەتكەرلەر, پەداگوگ جانە پسيحولوگ ماماندار كەلىپ تاربيە مەن ءبىلىم بەرۋ جۇمىستارىن جۇرگىزۋدە. جاقسىلىقتىڭ جارشىسىنا اينالعان تەلەارناعا دياستىڭ اناسى دانا جۇمانوۆا دا ءوز العىسىن ءبىلدىردى.
شارا اياسىندا سىر ەلىنىڭ حالىق قالاۋلىلارى كومەككە مۇقتاج جاندارعا قولۇشىن سوزدى. ءۇش بالانىڭ اناسى عاليا اپپاقوۆا جيىرما جىلدان بەرى بالا كۇتىمىمەن ۇيدە وتىر. ونىڭ ەكىنشى ۇلى قۋانىش سال اۋرۋىنا شالدىققان. قالالىق ءماسليحات دەپۋتاتتارى الدىمەن وسى شاڭىراققا كومەك كورسەتتى. سونىمەن قوسا, بەس بالانىڭ اناسى 78 جاسار داريحا ماحامبەتوۆانىڭ بۇگىندە مۇمكىندىگى شەكتەۋلى قىزىمەن بىرگە تۇرىپ جاتقان جاي-كۇيىن كورىپ, كومەك بەردى. مۇنداي يگى باستاما تۇرمىسى تومەن وتباسىلارىنا, مۇمكىندىگى شەكتەۋلى جاندارعا, كوپ بالالى انالارعا دەمەۋ بولارى ءسوزسىز.
باعدارلاماعا كەلگەن قوناقتار دا جاقسىلىق جاساۋدىڭ, ادام بالاسىنىڭ ءبىر-بىرىنە كومەگىنىڭ ماڭىزدىلىعى تۋراسىندا عيبراتى مول اڭگىمەلەر ايتىپ, جۇرتشىلىقتى ىزگىلىككە ۇندەدى. قايىرىم جاساۋ – اللا تاعالانىڭ رازىلىعىنا بولەيتىن امال. شارا شەڭبەرىندە «قازاقستان» ۇلتتىق ارناسىنىڭ مەكەن-جايىنا, ءتۇرلى الەۋمەتتىك جەلىلەر ارقىلى مىڭنان استام كومەككە ءزارۋ جانداردان وتىنىشتەر كەلىپ تۇسكەن. بالالاردىڭ تاعدىرىنا الاڭداپ, سەبەپ بولعىسى كەلەتىن ادامدارعا ارنايى بانكتىك ەسەپشوت تا اشىلدى.
تەلەمارافون بارىسىن قورىتىندىلاي كەلە, باس-اياعى 3 كۇندە قازاقستان حالقى اسسامبلەياسىنىڭ جانىنان قۇرىلعان ارنايى قورعا 50 ميلليون تەڭگەگە جۋىق قاراجات اۋدارىلىپ ۇلگەرىپتى. جۇمىلا كوتەرگەن جۇك جەڭىل. الايدا, قايىرىمدىلىقتى قانشا جاساساڭ دا كوپتىك ەتپەيدى. ويتكەنى, جاقسىلىقتىڭ ەشقاشان شەگى بولماق ەمەس.
شارا بارىسىندا قانشاما ادام جانىنا جۇبانىش تاۋىپ, قۋانىشتان جىلاپ تا الدى. ءتىپتى, مۇنداي قايىرىمدى ءوڭى تۇگىلى تۇسىندە كورمەگەن كەيبىر جاندار توسىن سىيدى ەرتەگىگە بالاپ, ءوز كوزدەرىنە وزدەرى سەنبەي تاڭىرقادى. بالالار شاتتاندى. ولاردىڭ اۋەلى جاراتۋشىعا, سوسىن شارانى ۇيىمداستىرىپ جاتقان قحا مۇشەلەرىنە, «قازاقستان» تەلەراديوكورپوراتسياسى» اق باسشىلىعى مەن قىزمەتكەرلەرىنە ىزگىلىكتىڭ ايناسى بولا بىلگەن اتىمتاي جومارت ازاماتتارعا, ۇيىم, مەكەمە, بىرلەستىكتەرگە اۋدارعان قاراجاتتارىنا شەكسىز ريزاشىلىقتارىن بىلدىرگەن العىستار لەگى تولاستار ەمەس. قحا «وزبەك ەتنومادەني ورتالىعى» قب توراعاسىنىڭ ورىنباسارى, جەكە كاسىپكەر حاسان شاريپوۆ, قحا نەمىس قاۋىمداستىعىنىڭ «ۆوزروجدەنيە» الەۋمەتتىك باعدارلامالار ۇيلەستىرۋشىسى ەلەنا شۆارتس جانە قحا جانىنداعى استانا قالاسى بويىنشا «جاراسىم جاستار» ۇيىمىنىڭ توراعاسى ازامات سۇندەتوۆ تە شاراپاتى مول شارانى قولداپ, شىنايى لەبىزدەرى مەن كومەكتەرىن اياپ قالمادى. مىنە, از دا بولسا, سەنىمنىڭ اقتالعانى, ارمانداردىڭ ورىندالعانى! تاۋقىمەت تارتقان جانداردىڭ تاعدىرىنا الاڭداپ, كومەك كورسەتە ءبىلۋ ۇلكەن ءىس. مەيىرىمدى جاندار وزدەرىنىڭ جاقسى ىستەرىن ايتۋدى ۇناتا بەرمەيدى. «شىن جۇرەكتەن» باعدارلاماسىنىڭ ماقساتى – وسىنداي ەرەكشە ەرلىك, جاقسىلىق يەلەرىن ەلگە تانىتۋ.
سوندىقتان, تەك «شىن جۇرەكتەن» باعدارلاماسى اياسىندا عانا ەمەس, جالپى, ومىردە دە ءبىر-بىرىمىزگە ءاردايىم جاقسىلىق جاساپ جۇرەيىك. تابيعاتتاعى بارلىق جىلۋ – كۇننەن, ومىردەگى بارلىق جىلۋ ادامنان ەكەندىگىن ۇمىتپايىق. ءاربىر ادامنىڭ جۇرەگىندە جىلۋى بولسا, ءبىر-بىرىنە ءاردايىم جاقسىلىق جاساپ جۇرسە, وندا بارلىعىمىز قۋانىش پەن باقىتتا ءومىر سۇرەر ەدىك.
ومىردە قايىرىمدى ادامداردىڭ كوپ ەكەنىنە سەنىڭىز...
راۋشان تاۋىرحانقىزى,
«ەگەمەن قازاقستان»
سۋرەتتى تۇسىرگەن
ەرلان وماروۆ
