قىزىلوردادا 5 قاباتتى تۇرعىن ءۇي پايدالانۋعا بەرىلدى

استانا. 1 مامىر. قىزىلوردا قالاسىندا 1 – مامىر قازاقستان حالقىنىڭ بىرلىگى كۇنى مەرەكەسىنە وراي 5 كوپقاباتتى تۇرعىن ءۇي پايدالانۋعا بەرىلدى. بۇل تۋرالى وبلىس اكىمدىگىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. سالتاناتتى شاراعا وبلىس اكىمى قىرىمبەك كوشەرباەۆ قاتىسىپ, قونىس يەلەرىن قۋانىشتارىمەن قۇتتىقتادى. «باسپانا الۋ ءاربىر وتباسى ءۇشىن ۇلكەن قۋانىش. سوندىقتان قونىس تويلارىڭىز قۇتتى بولسىن. ءبىز دە قۋانىشتارىڭىزعا ورتاقپىز. 2015 جىلى 54 كوپقاباتتى ءۇي سالىپ, پايدالانۋعا بەرگەن بولاتىنبىز. ال بيىل 67 تۇرعىن ءۇي سالۋدى جوسپارلاپ وتىرمىز. سوندا ەكى جىلدىڭ ىشىندە ءۇي كەزەگىندە تۇرعان ازاماتتاردىڭ 24 پايىزى باسپانالى بولادى», – دەدى قىرىمبەك كوشەرباەۆ. سونداي-اق, ايماق باسشىسى ءوز كەزەگىندە وبلىس ورتالىعىنداعى جاڭادان قونىس تەپكەن شاعىن اۋداندا «بايتەرەك» ۇبح» اكتسيونەرلىك قوعامى ارقىلى 640 پاتەرلىك 12 كوپقاباتتى تۇرعىن ءۇيدىڭ قۇرىلىسى جۇرگىزىلگەنىن ايتتى. ونىڭ ىشىندە 370 پاتەردى قۇرايتىن 7 ءۇي وتكەن جىلى پايدالانۋعا بەرىلگەن. شارادا وبلىس اكىمىنىڭ قولىنان جاڭا پاتەردىڭ كىلتىن العان باحىت ناسىروۆا ەسىمدى تۇرعىن قۋانىشىن كوپشىلىك الدىندا سوزبەن جەتكىزدى. ول: «مەن بۇگىنگى قۋانىشىمدى ايتىپ جەتكىزە الار ەمەسپىن. پاتەر الۋ قاشاننان ارمانىمىز بولاتىن. وسى يگى ءىستىڭ باسىندا جۇرگەن بارلىق ازاماتتارعا العىسىمىز شەكسىز. قونىس تويلارىڭىز قۇتتى بولسىن», – دەدى. ايتا كەتەيىك, قىزىلوردادا تۇرعىن ءۇي قۇرىلىسى جىل ساناپ ارتىپ كەلەدى. وتكەن جىلى 2684 وتباسى باسپانالى بولسا, 2016 جىلى 3329 جانۇيا پاتەر كىلتىن الادى. بۇگىن ءۇيلى بولعانداردىڭ كوبىسى مۇعالىمدەر مەن دارىگەرلەر جانە مەملەكەتتىك قىزمەتكەرلەر. تالعات رايىمبەك. دەرەك, فوتو: قىزىلوردا وبلىس اكىمدىگىنىڭ ءباسپاسوز قىزمەتى.