ەلباسىنىڭ مانيفەسى تابىس ەتىلدى

ءماجىلىستىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ مۇشەسى باقىتجان ەرتاەۆ پەن ەكولوگيا ماسەلەلەرى جانە تابيعات پايدالانۋ كوميتەتىنىڭ توراعاسى گلەب شەگەلسكي كاتاردان كەلگەن دەلەگاتسيا مۇشەلەرىمەن كەزدەستى, دەپ حابارلادى وسى پالاتانىڭ ءباسپاسوز قىزمەتى. تاراپتار بۇل جىلى جۇزدەسۋدى تاريحى تەرەڭ تامىرلاستىقتان باستالعان دوستىق كەزدەسۋ رەتىندە باعالادى. ال اڭگىمە بارىسىندا قازاقستان مەن كاتار اراسىنداعى قاتىناس جىل ساناپ قارقىندى دامىپ كەلە جاتقانى ايتىلدى. دەلەگاتسيا جەتەكشىسى, مۋنيتسيپاليتەت جانە قورشاعان ورتانى قورعاۋ ءمينيسترى مۇحامماد ابدۋللاھ ءال رۋمايحي ەكى مەملەكەت اراسىنداعى ىنتىماقتاستىق بارلىق سالادا, اسىرەسە, ساياسي باعىتتا وتە جوعارى دەڭگەيدە ەكەنىن جانە بولاشاقتا دا نىعايا تۇسەتىنىن جەتكىزدى. گ.ششەگەلسكي دەلەگاتسيا مۇشەلەرىن ەكولوگيا سالاسىندا اتقارىلىپ جاتقان جۇمىستارمەن تانىستىرا كەلىپ, قازاقستان پرەزيدەنتىنىڭ ەندى عانا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىنىڭ «جاسىل ەكونوميكاعا» كوشۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويعانىنان حاباردار ەتتى. وسىعان وراي, كاتار­دىڭ كەلەر جىلى استا­نادا وتەتىن ەكسپو-2017 حالىق­ارالىق كورمەسىنە بەلسەنە قاتى­ساتىندىعىنا سەنىم ءبىلدىرىلدى. كوميتەت توراعاسى ەلباسىنىڭ حالىقارالىق دەڭگەيدەگى ماڭىزدى باستامالارىن ءسوز ەتە كەلىپ, دەلەگاتسيا جەتەكشىسىنە «الەم. XXI عاسىر» مانيفەسىن تابىس ەتتى. باقىتجان ەرتاەۆ قازاقستان پرەزيدەنتىنىڭ بۇكىل الەمدى بەيبىت ومىرگە ۇندەۋ جولىنداعى باتىل قادامدارىن العا تارتا كەلىپ, يادرولىق قارۋدىڭ الەۋەتى بويىنشا الەمدەگى ارسەنالىنان باس بارتۋ باستاماسىنا ايرىقشا نازار اۋداردى. ب. ەرتاەۆ مەيماننىڭ يىعىنا شاپان جاۋىپ, شىعارىپ سالدى.