پاۆلوداردا جاسالعان كران

رەسەيلىك كاسىپورىندا ىسكە قوسىلدى بۇل جاڭالىق ەۋرازيالىق توپ قۇرامىنا كىرەتىن «ERG Service» اق فيليالى – پاۆلودار ماشينا جاساۋ زاۋىتى «پمز» ءۇشىن جاقسى وندىرىستىك جەتىستىك ەكەنى ءسوزسىز. جۇك كوتەرۋ قۋات­تى­لى­عى 22 توننالىق جان-جاققا بۇرىلاتىن تىركەمەسى بار زاۋىت­تا قۇراستىرىلعان كراندى  (بتەكك) «ۆيز-ستال» (ەكاتە­رينبۋرگ ق.) كاسىپورنىنا وتكەن جىلدىڭ قىركۇيەك ايىندا جەتكىزىپتى. زاۋىت نەگىزىنەن مەتالل قۇرىل­­عىلارى مەن ءارتۇرلى تەحنو­لو­گيا­لىق باعىتتاعى جۇك كوتەرۋ جابدىق­تارىن, كران تەحنيكالارىن جاساپ شىعارادى. كاسىپورىن قىز­مەتىنىڭ جالپى باعىتى كوپىرلى جانە تاعاندى كراندار, گرەيفەرلەر, مەتالل قۇرىلىمدار وندىرىسىنە ارنالعان. جۇك كوتەرگىشتىگى 140 توننالىق, 50 تونناعا دەيىنگى كرانداردى جاسايدى. بۇعان دەيىن لوكوموتيۆ, سونداي-اق, ەلەكتروۆوز زاۋىتتارىنا ارنالعان دا كراندار دايىنداپ شىعاردى. «پمز» اق ەلىمىزدە العاشقى رەت جولاۋ­شىلار ۆاگوندارىنا ارنالعان «تۇلپار-تالگو» جشس ءۇشىن جۇك كوتەرگىشتىگى 20 جانە 40 توننالىق ەكى ترانسبوردەردى دايىندادى. ياعني, رەلستى ءبىر جولدان قاتارلاس ەكىنشى جولعا شىعاراتىن ارنايى قۇرال. ولاردى جاساۋ ءۇشىن زاۋىتتىڭ كونسترۋكتورلىق-تەحنو­لوگيالىق ءبولىم ماماندارى يسپا­نياعا باردى, «تۇلپار-تالگو» جشس ءۇشىن ءارتۇرلى باعىتتاعى 13 جۇك كوتەرگىش كرانداردى جاساپ شى­عاردى. ال «ERG Service» اق فيليالى – پاۆلودار ماشينا جاساۋ زاۋىتى ونىمدەرىنىڭ نەگىزگى تۇتىنۋ­شىلارى – قايتا وڭدەۋشى, تاۋ-كەن وندەۋشى, مۇناي-گاز, مەتاللۋرگيا جانە ونەركاسىپتىڭ باسقا دا سالالارى. بۇل كۇندەرى كومپانيادا 400-دەي ادام ەڭبەك ەتۋدە. كاسىپورىن جۇك كوتەرگىش كران­­داردىڭ جوباسىن تاپسىرىس بەرۋ­شىنىڭ سۇرانىسى بويىنشا جاسايدى. رەسەيگە جەتكىزىلگەن جاڭا كران «ۆيز-ستال» قوعامداستىعىنا ارنايى قۇراستىرىلىپ, جەتكىزىلگەن ءتورتىنشى كران كورىنەدى. ال جالپى, جەرگىلىكتى ونەرتاپ­قىشتار قۇراستىرىپ, زاۋىتتا جاسا­لىپ شىققان پاۆلودارلىق كران­نىڭ ەرەكشەلىگى – جان-جاققا بۇرى­لاتىن قۇرىلعىسىنىڭ وزدىگى­نەن قوسالقى رەدۋكتوردىڭ كومە­گىمەن باسقارىلىپ جۇمىس جاساي­تىندىعىندا. رەسەي كاسىپورنىندا ىسكە قوسىلىپ, قازاقستاندا جاسال­عان كران سىناقتان ءساتتى ءوتتى. – سوندىقتان, ءبىز جاساپ شىققان بۇل الىپ قوندىرعى كوپ جىل جۇ­مىس جاساي الادى. كەز كەلگەن كەزدە جوندەۋگە دە ىڭعايلى. ەڭبەك قاۋىپسىزدىگى ساقتالادى, – دەيدى زاۋىتتىڭ باس كونسترۋكتورى لەونيد شمۋلەنسون. وسىنداي وزىندىك ەرەكشەلىكتەرى بار رەسەي كاسىپورنىنان جەتكىزىلگەن كراندار «قاۋىپتى وندىرىستىك نىسان­دارداعى قاۋىپسىزدىك تالاپتارى» (روستەحنادزوردىڭ 12.11.2013 ج. №553 بۇيرىعى) جانە «ەلەكتر قون­دىر­عىلارىن ورناتۋ ەرەجەلەرى» مەن كەدەن وداعىنىڭ تەحنيكالىق ءمول­شەرلەمەلىك تالاپتارىنا ساي كەلەدى. – ەكىنشىدەن, باعا مەن ساپا تۇرعىسىنان العاندا دا سىرتقى نا­رىقتا باسەكەگە قابىلەتتى. ويتكەنى, زاۋىتتىڭ تەحنيكالىق پاركى جۇيەلى تۇردە جاڭالانىپ, زاماناۋي ۇلگىدەگى قۇرال-جابدىق, قوندىرعىلارمەن تولىعىپ تۇرادى. جىل سايىن جۇ­مىسشىلاردىڭ, مامانداردىڭ ءبىلىمىن جەتىلدىرۋ مەن اتتەستاتتاۋ جۇرگىزىلەدى, – دەدى زاۋىت ديرەكتورى لەونيد بەلوگريۆىي. ۇشىنشىدەن, كاسىپورىن ديرەك­تورى ايتقانداي, زاۋىت ەلىمىز­دەگى كوپتەگەن وتاندىق كاسىپ­ورىن­­دارعا جۇك كوتەرۋ كراندارىن جا­سايدى. جەرگىلىكتى ۇلەستى ارت­تى­رۋ­عا ءمۇم­كىندىك بەرۋدە. كران­دار «قازتسينك» جشس, «ارسەلور­ميتتال» اق, «قا­زاقمىس» كورپو­را­تسيا­سى» جشس, «قا­زاقستان» تەمىر جولى» ۇك» اق, «كاستينگ» جشس سىن­دى كوم­پا­نيا­لار مەن ERG توبى­نىڭ كاسىپ­ورىندارىندا پايدالانادى. مىسالى, «قازحروم تۇك» اق-پەن 1,6 ملرد. تەڭگە سوماسىنا جۇك كوتەرۋ كراندارىن جەتكىزۋگە كەلى­سىم­شارت جاسالدى. اقتوبە جانە اق­سۋ فەرروقورىتپا زاۋىتتارى ءۇشىن كران جاساۋ جوسپارلانىپ وتىر. سونداي-اق, بىلتىرعى جىلى «پمز» اق ەۋرازيالىق توپ قۇرا­مىنا كىرەتىن «ERG Service» اق فيليالى بولىپ, جابدىقتاردى جوندەۋ بويىنشا تاپسىرىستار قابىلداي باستادى. «ERG Service» اق پەن ERG-ءدىڭ جوندەۋ جۇمىستارى جونىندەگى ديرەكتوراتى بارلىق جوندەۋ جۇمىستارىنىڭ جوسپارلارىن ازىرلەپ, كومپانياعا قاراستى كاسىپورىندار كۇشىمەن جاسالاتىن جوندەۋ جۇمىستارىنىڭ تۇرلەرىن بەلگىلەدى. جانە تەك وزىنە عانا ەمەس, ەۋرازيالىق توپ قۇرامىنا كىرەتىن باسقا دا كاسىپورىندار ءۇشىن دە. وسىلايشا, جوندەۋ جۇمىستارى بويىنشا ERG كاسىپورىندارىنان 1,2 ملرد. تەڭگە كولەمىندە تاپسىرىس قابىلداندى. قازىرگىدەي ەكونوميكالىق قيىن كەزەڭدە مۇنىڭ ماڭىزى ەرەكشە ەكەنى انىق. ناتيجەسىندە زاۋىتتا جوندەلگەن انود ۇستاۋىشتار «قازاقستان ەلەكتروليز زاۋىتى» اق-تا تابىستى قولدانىلىپ كەلەدى. 2015 جىلى «پمز»-دا 1,2 ملرد.-تان استام تەڭگە كولەمىندە ءونىم وندىرسە, 2016 جىلى بۇل كولەمدى ءتورت ەسەگە, ياعني 4,6 ملرد. تەڭگەگە جەتكىزبەك. فاريدا بىقاي, «ەگەمەن قازاقستان» پاۆلودار وبلىسى