قالباتاۋداعى قۋانىش

تاۋەلسىزدىكتىڭ 25 جىلدىعىنا وراي باستالعان «25 يگى ءىس» اكتسياسىنا جارما جۇرتى دا ۇلەس قوسىپ كەلەدى. تاياۋدا اۋدان ورتالىعى قالباتاۋدا مەملەكەت-جەكەمەنشىك ارىپتەستىگى نەگىزىندەگى العاشقى با­لا­باقشا اشىلدى. «ەر-داۋرەن» بالاباقشاسى – وزەكتىلىگى كۇن ساناپ ارتىپ كەلە جاتقان مەكتەپكە دەيىنگى وقىتۋ جانە تاربيە بەرۋ ماسەلەسىن جەرگىلىكتى بيلىكتىڭ كاسىپكەرلەردى قاتىستىرا وتىرىپ شەشۋگە با­عىت­تالعان جۇمىستارىنىڭ ءبىر كورى­­نىسى. «بالاپان» باعدارلاماسى اياسىن­داعى بالاباقشا عيمارا­تىنىڭ اشىلۋ سالتاناتىنا ارداگەرلەر, اتا-انالار مەن تۇرعىندار قاتىستى. – ەل ەگەمەندىگىن العان جىلداردان بەرى اۋداندا كوپتەگەن جاڭا ءبىلىم وردالارى, بالاباقشالار بوي كوتەردى. قالباتاۋدىڭ وزىندە سوڭعى بەس جىل ىشىندە مەملەكەت قاراجاتىنا «التىناي» بالا­باقشاسى سالىنىپ, «ايگولەك» بالا­باقشاسى قايتا جاڭعىرتىلدى. قازىر قالباتاۋ اۋىلىندا 190-عا جۋىق ءبۇلدىرشىن بالاباقشا كە­زەگىندە تۇر. سوندىقتان, جەكە­مەنشىك بالاباقشالاردىڭ ۇلەسىن ارتتىرۋ جونىندەگى وبلىس اكىمىنىڭ تاپسىرماسى بويىنشا جەرلەسىمىز داۋلەت كوشەنوۆ جەكە قاراجاتىنا سالعان 90 ورىندىق بالباقشانى قولدانىسقا بەردى. ارينە, مۇنداي بالاباقشانى مەملەكەتتىك بيۋدجەت ەسەبىنەن سالار بولساق, شامامەن 300 ملن. تەڭگە قاراجات قاجەت بولار ەدى. ياعني, مەملەكەتتىڭ قارا­جاتى ۇنەمدەلىپ وتىر, دەدى جارما اۋدانىنىڭ اكىمى نۇرلان سىدىقوۆ. سونداي-اق, اۋدان باسشىسى قالباتاۋداعى بۇرىنعى «كولوسوك» بالاباقشاسىنىڭ عيماراتى قايتا جاڭعىرتىلاتىنىن جەتكىزدى. ياعني, اۋدان اكىمدىگى مەن جەكە كاسىپكەر ۆيكتور يساباەۆ اراسىنداعى كە­لىسىم­­شارت بويىنشا ەسكى عيمارات كاسىپكەر ەنشىسىنە بەرىلىپ, بيىلعى جىلدىڭ 1 قىركۇيەگىنە دەيىن بۇل نىسان 100 بۇلدىرشىنگە ارنالعان بالاباقشا رەتىندە قولدانىسقا ەنبەك. وسىلايشا, اعىمداعى جىلى اۋدان ورتالىعىندا مەكتەپكە دەيىنگى بالالار تولىعىمەن قامتىلىپ, بالاباقشا ماسەلەسى تۇبەگەيلى شەشىمىن تاباتىن بولادى. بالاباقشانىڭ العاشقى ءبۇل­دىرشىندەرىنە اۋدان اكىمدىگى تاراپىنان سىي-سياپات تارتۋ ەتىلدى. سالتاناتتى شارادا اتا-انالار اتىنان ءسوز العان گۇلفيرا ساتپەكوۆا زامان تالابىنا ساي سالىنعان ساۋلەتتى دە كوپسالالى بالاباقشادا بۇلدىرشىندەردىڭ تاربيە الۋى عانا ەمەس, جان-جاقتى دامۋىنا مول مۇمكىندىك ەسكەرىلگەندىگىن جەتكىزىپ, جاڭا نىساننىڭ جۇمىسىنا تولا­يىم تابىس تىلەدى. دۋمان اناش, «ەگەمەن قازاقستان» شىعىس قازاقستان وبلىسى, جارما اۋدانى