قور مەن قويما

ماڭعىستاۋ وبلىسى تۇرعىندارى قاجەتىنە تۇتىنۋ ءۇشىن سۋلى جەردى سۇيە­تىن ونىمدەردى, كوكونىس تۇرلەرىن ساتىپ الۋعا ءماجبۇر. ءشولدى جەردە كوك­ونىس تۇرلەرىن باپتاپ ەگىپ, بالبىراتىپ جيناپ, سۇيسىنە جەۋ قىزىعى بۇيىر­ماعان, سوندىقتان بۇل تاعام تۇرلە­رىن الىس-جاقىننان تاسىمالداپ, قۇنى­نىڭ ارزان-قىمباتىنا قاراماي ساتىپ الۋعا تۋرا كەلدى. مۇنداي جاعدايدا ماڭ­عىس­تاۋ­لىقتاردىڭ ءۋاجى ءونىمنىڭ باعا­سىنا ەمەس, «تاپتىرىپ تۇرسا بولدى عوي» دە­گەنگە دە سايىپ جاتاتىن تۇستار از ەمەس. ماڭعىستاۋ وبلىسىندا كۇندەلىكتى تۇتىناتىن تاۋار تۇرلەرىن, اسىرەسە, كوكونىس پەن جەمىس-جيدەكتى سىرتتان تاسى­مالداپ, ارنايى مۇزداتقىشتارى بار قوي­مالاردى ساپالى ساقتاي الاتىن ورىن اشىلدى. بۇل «اقتاۋ تەڭىز پورتى» ارنايى ەكونوميكالىق ايماعى اۋماعىنداعى 3 سۋبزونادان اشىلعان «ازەرسۋن وندىرىستىك جانە لوگيستيكالىق ورتالىعى» جشس قويماسى. ازەرباي­جان­دىق «انادولۋينۆەستمەنت كوم­پاني» كومپانياسىنىڭ باستاماسىمەن جانە نەگىزىن قالاۋىمەن ارنايى ەكونوميكالىق ايماقتان 4,2 گەكتار جەردە جۇزەگە اسىرىلعان جوبا جۇمىستارى – ورتالىق قۇرىلىسى قازىر اياقتالىپ, قابىلداۋ جۇمىستارى ءجۇرىپ جاتىر. تولىققاندى قۋاتىنا ەنگەن سوڭ 40 ادامدى جۇمىسپەن قامتيتىن جوباعا 1 463 000 000 تەڭگە ينۆەستيتسيا جوسپارلانىپ, بۇل قارجى كولەمى تولىقتاي «انادولۋينۆەستمەنت كومپاني» كومپانياسىنىڭ جارعىلىق كاپيتالىنان قارالعان. جوباعا سايكەس, قويمادا ءارتۇرلى كاتەگورياداعى ونىمدەردى ساقتاۋ جوس­پارلانعان. وندا كادۋىلگى قويما مەن مۇزداتقىش قويما قاراستىرىلعان. ءاربىر قويمادا 4 قاباتتى تاۋارلاردى ساقتاۋ ورىندارى بار. سونداي-اق, بارلىق ورىنداردا شتريح-كود­تار ارقىلى جەكەلەگەن جانە ورتا­لىقتاندىرىلعان باقىلاۋ جۇيەسى ورناتىلعان. قويمالار ورتالىق باسقارۋ جۇيەسى ارقىلى اۆتوماتتى تۇردە تولىقتاي كليماتتىق باقىلاۋدا بولادى. يننوۆاتسيالىق جابدىقتاۋ, سونىڭ ىشىندە مۇزداتۋ جابدىقتارى, كليمات جۇيەلەرى, تەرەڭ مۇزدىقتار گەرمانيا جانە گوللانديا ەلدەرى تەحنولوگيالارى بويىنشا جابدىقتالعان. جوبانىڭ باستاماشىسى بولعان «ازەرسۋن حولدينگ» كومپانياسى – قۇرا­مىنا 20-دان استام اگرارلىق-ونەر­كاسىپتىك كاسىپورىندار كىرەتىن ازەر­باي­جان رەسپۋبليكاسىنداعى ماڭدايال­دى كومپانيالاردىڭ ءبىرى. ازەر­بايجان سىندى ەلدەردەن تاۋار تۇرلەرىن تاسى­مالداۋشىلار ول تاۋارلاردى ەكى جىل بويى ساپالى كۇيىندە ساقتاي الاتىن­دىقتارىنا سەندىرىپ وتىر. سونىمەن قاتار, ازەربايجان رەسپۋبليكاسىنىڭ گۋبينسكي, گۋسار, گيادجين, شەمكير سەكىلدى باۋ-باقشالى اۋداندارىنان كاسىپكەرلەر جوباعا تاسىمالداۋشى رەتىندە قاتىسۋعا ىنتالىلى. اتالمىش جوبا – ماڭعىستاۋ وبلىسىندا «100 ناقتى قادام» ۇلت جوسپارىن جۇزەگە اسىرۋ بارىسىندا اتقارىلىپ جاتقان جوبالاردىڭ ءبىرى رەتىندە بەلگىلى. گۇلايىم شىنتەمىرقىزى, «ەگەمەن قازاقستان» ماڭعىستاۋ وبلىسى