كوكەيكەستى پروبلەماعا ارنالدى

مەملەكەتتىك قىزمەت ىستەرى مينيسترلىگىندە «قازىرگى زامانعى سىبايلاس جەمقورلىققا قارسى كۇرەس: تاجىريبە مەن جەتىستىكتەر» تاقىرىبىندا عىلىمي-تاجىريبەلىك كونفەرەنتسيا ءوتتى. ونىڭ جۇمىسىنا مينيسترلىك باسشىلارى, بۇۇ تۇراقتى ۇيلەستىرۋشىسىنىڭ ورىنباسارى, ەقىۇ باعدارلاماسىنىڭ استاناداعى كەڭسەسىنىڭ باسشىسى, ديپلوماتيالىق كورپۋستىڭ وكىلدەرى, پارلامەنت ءماجىلىسىنىڭ دەپۋتاتتارى, جوعارعى سوت سۋديالارى, مينيسترلىك جانىنداعى قوعامدىق كەڭەستىڭ مۇشەلەرى, سونىمەن قاتار, اكادەميالىق قوعامداستىق, ۇكىمەتتىك ەمەس ۇيىمدار مەن باق وكىلدەرى قاتىستى. شارانى مەملەكەتتىك قىزمەت ىستەرى مينيسترلىگى, مەملەكەتتىك قىزمەت جونىندەگى وڭىرلىك حاب جانە گەرمانيانىڭ حالىقارالىق قۇقىقتىق ىنتىماقتاستىق قورى (IRZ) بىرلەسىپ ۇيىمداستىردى. كونفەرەنتسيانىڭ جۇمىسىنا سين­گاپۋردەگى لي كۋان يۋ اتىنداعى مەملەكەتتىك ساياسات مەكتەبىنىڭ پروفەسسورى مۋكۋل اشەر, گرۋزيانىڭ مەملەكەتتىك قىزمەت ىستەرى جونىندەگى بيۋروسىنىڭ ديرەكتورى تەمۋر چيحارادزە, تومەنگى ساكسونيانىڭ ادىلەت ءمينيسترىنىڭ ورىنباسارى بولعان يۋرگەن ولەركينگ جانە گەرمانياداعى قىلمىستىق پوليتسيانىڭ فەدەرالدى باسقارماسىنىڭ ۆيتسە-پرەزيدەنتى بولعان يۋرگەن ماۋرەر, رعا فيلوسوفيا مەن قۇقىق ينستيتۋتىنىڭ ديرەكتورى, رەسەي فەدەراتسياسى پرەزيدەنتىنىڭ جانىنداعى سىبايلاس جەمقورلىققا قارسى ءىس-قيمىل جونىندەگى كەڭەستىڭ مۇشەسى, پروفەسسور ۆيكتور رۋدەنكو قاتىستى. كونفەرەنتسياعا قاتىسۋشىلار جەمقورلىقتىڭ الدىن الۋداعى وتاندىق جانە حالىقارالىق تاجىريبەنى زەردەلەپ, گەرمانيا, رەسەي, سينگاپۋر جانە گرۋزيا سياقتى ەلدەردىڭ سىبايلاس جەمقورلىقتى جويۋ جونىندەگى تاجىريبەسىن تالقىلادى. قازاقستاننىڭ سىبايلاس جەمقورلىققا قارسى كۇرەس ساياساتىنىڭ نەگىزگى باسىمدىقتارى جايلى مەملەكەتتىك قىزمەت ىستەرى ءمينيسترىنىڭ ورىنباسارى ايگۇل شايىموۆا اڭگىمەلەپ بەردى.   «ەگەمەن-اقپارات»