اعاشتار دا ارماندايدى

مەكسيكالىق سۋرەتشى ساندرا ءپانيدىڭ «اعاش سياقتى» كورمەسى كوركەمدىك كوكجيەگىنەن مارجان سىر تۇيگىزۋىمەن اسەرلى. ءسىرا, اعاشتاردىڭ جانىن تۇسىنە بىلەتىن ادامنىڭ ءوزى تەگىن جان بولماسا كەرەك-ءتى. قاراپ تۇرساڭىز, ولار دا ءتۇرلى تاعدىرلار سەكىلدى عۇمىرلارى ۇزاق جانە تامىرىنان كەلتە ءۇزىلىپ قالىپ جاتاتىندارى بار. وسى ءسات مۇقاعاليدىڭ «ومىرگە-ءومىر جالعاسىپ, انامىز جەرگە جارماسىپ, بىردە ادام, بىردە قايىڭ بوپ, سۇرەيىك ءومىر الماسىپ...» دەپ جىرلاعانى ەرىكسىز ويعا ورالار ەدى. اعاشتارسىز مىنا ءومىردى ەلەستەتۋ مۇمكىن ەمەس. ول تۋرالى ونەر تۋىندىلارى تاۋ­سىلمايدى. مەكسيكالىق ساندرا پاني ەڭبەكتەرىنىڭ يدەياسى ءبىزدى وسى جاعىمەن باۋرادى. – ۇلتتىق مۋزەيدە وتكىزىلىپ وتىرعان «اعاش سياقتى» جوباسى قازاقستان مەن مەكسيكا قارىم-قاتىناسىن ودان ءارى دامىتۋعا ايتارلىقتاي ۇلەس قوسادى دەپ سەنەمىز. بۇگىن كوپشىلىكتىڭ نازارىنا ۇسىنىلىپ وتىرعان شىعارماشىلىق جۇمىستار سۋرەتشى ساندرا ءپانيدىڭ كوپ جىلعى ەڭبەگى جانە ول جوعارى باعاعا لايىق, – دەي كەلىپ مادەنيەت جانە سپورت مينيسترلىگىنىڭ مادەنيەت جانە ونەر دەپارتامەنتى ديرەكتورىنىڭ ورىنباسارى كۇمىس سەيىتوۆا وسىعان وراي جولداعان سالا ءمينيسترى ا. مۇحامەدي ۇلىنىڭ قۇتتىقتاۋىن جەتكىزدى. ءوز كەزەگىندە مەكسيكانىڭ قازاقستانداعى ەلشىسى مارتا ەلەنا بارسەنا كورمەنى وتكىزۋگە ەرەكشە جاعداي تۋعىزىپ, جان-جاقتى قولداۋ بىلدىرگەن مادەنيەت جانە سپورت ءمينيسترى مەن ۇلتتىق مۋزەي باسشىلىعىنا العىس ءبىلدىردى. ريزاشىلىق سەزىممەن ەلشى ءسوزىنىڭ سوڭىندا قازاقستان حالقىن بيىلعى ەل تاۋەلسىزدىگىنىڭ 25 جىلدىق ۇلى مەيرامىمەن قۇتتىقتادى. – اتاۋلى داتانىڭ قارساڭىندا, مەك­سيكالىق تانىمال سۋرەتشى ساندرا ءپانيدىڭ كورمەسى اشىلىپ جاتقانى ءبىز ءۇشىن ۇلكەن مارتەبە. قازاقستاننىڭ دا, مەكسيكانىڭ دا مادەنيەتكە, ونەرگە دەگەن قولداۋى جوعارى دەڭگەيدە ەكەنى قۋانتادى. بۇل تۋىندىلاردان ادام مەن تابيعات ەگىز ۇعىم ەكەنىن, ولاردىڭ اراسىنداعى بايلانىستىڭ ماڭىزدىلىعىن كورۋگە بولادى, – دەدى م.ە.بارسەنا. ەسكە سالا كەتەيىك, سۋرەتشى ساندرا پاني گرافيكالىق تۋىندىلارىنىڭ توپتاماسىن 2007 جىلدان باستاپ جاساۋدى قولعا العان. بۇگىنگى تاڭدا توپتاما 36 سۋرەتتەن تۇرادى. سونىمەن قاتار, «اعاش سياقتى» كورمەسى 21 مامىرعا دەيىن جالعاسادى دەپ كۇتىلۋدە. قارشىعا كۇلەن