ازياداعا دايىندىق پىسىقتالدى

كەشە اقوردادا ەلباسى نۇرسۇلتان نازارباەۆتىڭ توراعالىعىمەن VII قىسقى ازيا ويىندارىن وتكىزۋگە دايىندىق ماسەلەسىنە ارنالعان كەڭەس بولىپ ءوتتى. وندا مەملەكەت باسشىسى قىسقى ازيا ويىندارى وتكىزىلەتىن استانا جانە الماتى قالالارىنىڭ دايىندىق دەڭگەيىن تاعى ءبىر رەت پىسىقتادى. سونداي-اق وتىرىستا VII قىسقى ازيا ويىندارىنىڭ اشىلۋ جانە جابىلۋ سالتاناتتارىنا دايىندىق ماسەلەلەرى تالقىلاندى. الدىمەن تۋريزم جانە سپورت ءمينيسترى تەمىرحان دوسمۇحامبەتوۆ, سودان كەيىن قىسقى ازيا ويىندارىن وتكىزۋگە جاۋاپتى استانا جانە الماتى قالالارىنىڭ اكىمدەرى يمانعالي تاسما­عامبەتوۆ پەن احمەتجان ەسىموۆ ءسوز سويلەدى. – الدا وتەتىن بۇل جارىستاردى بۇكىل الەم كوز جازباي قاداعالايتىن بولادى. وسى ورايدا ءبىزدىڭ الدىمىزدا ازيادانى وتە جوعارى حا­لىق­ارالىق دەڭگەيدە وتكىزۋ مىندەتى تۇر. ازيا وي­ىندارىنىڭ ەلىمىزدە وتكىزىلۋى – قازاق­ستان­نىڭ الەمدىك سپورتتىق قوزعالىستاعى بيىك بە­دە­لىنىڭ بىردەن-ءبىر كورىنىسى. ازيا چەمپيوناتى بويىنشا جەكەلەگەن سپورت تۇرلەرىن قابىلداۋ ءبىر باسقا دا, ءوز تۋى استىندا ازيانىڭ 27 ەلى­نىڭ سپورتشىلارىن جينايتىن ازيادانى ءوت­كىزۋ مۇلدەم بولەك دۇنيە, – دەپ اتاپ ءوتتى مەملەكەت باسشىسى. تۋريزم جانە سپورت ءمينيسترى تەمىرحان دوس­مۇحامبەتوۆتىڭ ايتۋىنشا, قىسقى ازيا وي­ىندارىندا سپورت تۇرلەرىنەن 69 مەدال جي­ىن­تىعى ساراپقا سالىناتىن بولادى. ال ازيادا وتەتىن قۇرىلىستار دايىندىعى جونىندە مينيستر حابارلاما جاساپ, ەلباسىنا  ءبىر­قا­تار جاڭا وبەكتىلەردىڭ, اتاپ ايتقاندا, كونكيمەن جۇگىرۋگە ارنالعان ستاديون, توسەمەلى ايدىنى بار ۆەلوترەك, شاڭعى ترامپليندەرى كەشەنى, “سولدات شاتقالىنداعى” شاڭعى-بياتلونعا ار­نالعان ستاديون قۇرىلىسى, استاناداعى “قا­زاقستان” سپورت سارايىنىڭ مۇز ايدىنى سپورت­شىلار مەن جانكۇيەرلەردىڭ كوز قۋانىشىنا اينالۋعا تولىقتاي دايىن ەكەندىگىن جەتكىزدى. سونداي-اق مەدەۋ مۇز ايدىنى, “تاباعان” سپورتتىق-كوڭىل كوتەرۋ كەشەنى, “شىمبۇلاق” تاۋ شاڭعىسى بازاسى, بالۋان شولاق اتىنداعى سپورت سارايىنداعى توسەمەلى ايدىن قۇرى­لىسى جانە الماتى قالاسىنداعى 650 ورىنعا ارنالعان اۆتوكولىك كوياتىن ارنايى ورىن قاي­تا جاساقتالىپتى. قىسقى ازيا ويىندارى وتە­تىن سپورتتىق عيماراتتاردىڭ بارلىعى جاڭا تەحنولوگيالاردى قولدانۋ ارقىلى تۇر­عى­زىلعاندىقتان, الەمدىك ستاندارتتارعا ساي كەلەدى. ونىڭ ۇستىنە عيماراتتار استانا جانە الماتى قالالارىنىڭ ءسانىن كىرگىزۋدە. وسى ورايدا ايتا كەتەتىن ءجايت, ازيا وليمپيالىق كەڭەسىنە مۇشە ەلدەر قازىردىڭ وزىندە ەلىمىزدىڭ سپورتتىق بازاسىن ءتۇرلى جارىستار وتكىزۋگە, ءوز سپورتشىلارىن سوچيدە وتەتىن قىسقى وليمپيا ويىندارىنا  دايىنداۋ جانە وقۋ-جاتتىعۋ جيىندارىنا قولدانۋ نيەتىن بىلدىرۋدە ەكەن. بۇگىنگى تاڭدا ازياداعا ءوز سپورتشىلارى­نىڭ قاتىسۋىن 27 ەل قۋاتتاپ وتىر. قاتىسۋعا ءوتىنىش بەرگەن سپورتشىلار مەن رەسمي وكىل­دەردىڭ سانى 4 مىڭ 135 ادامدى قۇرايدى. وتىرىس قورىتىندىسى بويىنشا مەملەكەت باسشىسى ازيا ويىندارى وتەتىن بارلىق سپورتتىق وبەكتىلەردىڭ حالىقارالىق فەدەراتسيالار قوياتىن تالاپتارعا سايكەستىگىن قاداعا­لاۋدى, ولاردى تاعى ءبىر رەت تەكسەرۋدى تاپسىردى. – جاڭادان سالىنعان ەرەكشە سپورتتىق عيماراتتار قازاقستاننىڭ ۇلتتىق يگىلىگىنە اي­نا­لۋى كەرەك. بولاشاق وليمپياداشىلارعا قىزمەت كورسەتۋ ءۇشىن عانا ەمەس, سونداي-اق ولار بۇقارالىق سپورتتى دامىتاتىن ورتالىق­تار­عا اينالۋى ءتيىس, – دەپ اتاپ ءوتتى پرەزيدەنت. ءوت­كى­زىلگەلى تۇرعان ويىنداردىڭ بارلىق قازاق­ستان­دىقتار ءۇشىن وڭ ءرولىن اتاپ كورسەتە كەلە, ازيا ويىندارىنىڭ اشىلۋ جانە جا­بىلۋ سالتا­نات­تارىنا ەرەكشە كوڭىل بولۋگە شا­قىردى. – ەل ىشىندە سپورتتى جانە سالامات­تى ءومىر سالتىن ناسيحاتتاۋدا جانە وسكەلەڭ ۇرپاققا پاتريوتتىق تاربيە بەرۋدە ازيادا­نىڭ الار ماڭىزى ۇلكەن. قازاقستان – وسىعان دەيىن 117 وليمپيادا, الەم جانە ازيا چەم­پيوندارىن  تاربيەلەگەن ەل. ولاردىڭ تابىس­تا­رى مەن جەتكەن جەتىستىكتەرى مەملەكەتىمىزدىڭ ابىرويىن ارتتىردى. ءبىز الداعى جارىستا جاپونيا, قىتاي جانە كورەيا سەكىلدى مىقتى قارسىلاستارىمىز بارلىعىن ءتۇسىنىپ وتىرمىز. دەگەنمەن, الدىمىزعا ۇلكەن مىندەت  قويۋدا­مىز. ول – قول جەتكىزگەن مەدال سانى بويىن­شا الدىڭعى ۇشتىكتەن كورىنۋ. ەلباسى ەل سپورتشىلارىنىڭ قازاقستان­دىقتاردىڭ سەنىمىن اقتاپ, VII قىسقى ازيا ويىندارىندا جوعارى دارەجەدە ونەر كورسەتەتىندەرىنە سەنىم ءبىلدىردى. ۆەنەرا تۇگەلباي. ----------------------------------------- سۋرەتتى تۇسىرگەندەر س.بوندارەنكو, ب.وتارباەۆ.