باس پروكۋراتۋرا باقىلاۋعا الدى

«ەگەمەننىڭ» ۇستىمىزدەگى جىلعى 8 قاڭتارداعى «پارلامەنت» ارناۋلى بەتىندە ءماجىلىس دەپۋتاتى گۇلنار سەيىت­ماعامبەتوۆانىڭ «كاسپيبانك» اق اقتاۋ فيليالىنىڭ قىزمەتكەرى ن.اب­دوللاەۆانىڭ زاڭسىز ارەكەتتەرگە با­رىپ, ازامات م.ماحانوۆانىڭ سىرتىنان جالعان قۇجات جاساۋ ارقىلى ونىڭ اتىنان 3 ملن. تەڭگە نەسيە العانى تۋرالى, مۇنداي وقيعا ءبىر بۇل ەمەس ەكەنى تۋرالى دابىلى جارىق كورگەن بولاتىن. م.ماحانوۆانىڭ ارىزى بويىنشا قوزعالعان قىلمىستى ءىستىڭ بارىسىندا ەكونوميكالىق جانە سىبايلاس جەم­قورلىققا قارسى كۇرەس دەپارتامەنتى بانك قىزمەتكەرلەرى تاراپىنان شىن مانىندە جالعىز ماحانوۆا ەمەس, ودان باسقا دا 40-قا جۋىق ادامنىڭ سىرتىنان وسىنداي جالعان نەسيەلىك شارت جاساۋ جولىمەن قاراجات قىمقىرىلعانىن انىقتاعان. ءسويتىپ, ن.ابدوللاەۆا اقتاۋ قالالىق سوتىنىڭ سانكتسياسى بويىنشا قاماۋعا الىنعان ەكەن. الايدا ونىڭ «قاشىپ كەتۋىنە» بايلانىستى قىلمىس­تىق ءىستى جۇرگىزۋ توقتاتىلعان, ال قىم­قىرىلعان قارجىنى بانك قىزمەتكەرلەرى م.ماحانوۆادان ءوندىرۋ نيەتىنەن قايت­پاي, وعان ءالى كۇنگە ەسكەرتپەلەر مەن حاتتار جازۋلارىن قويار ەمەس كورىنەدى. وسى جايتتەردى ايتا كەلىپ, دەپۋتات باس پروكۋراتۋرادان «كاسپي بانكتىڭ» اقتاۋ فيليالى قىزمەتكەرلەرىنەن زارداپ شە­گۋشىلەردىڭ قۇقىعىن قورعاۋ قاجەتتىگىن سۇراعان ەدى. جۋىردا وسى دابىلعا بايلانىستى  «ەگەمەنگە» باس پروكۋراتۋرانىڭ اپپارات باسشىسى ج.شامشيەۆتەن جاۋاپ كەلىپ, وندا گ.سەيىتماعامبەتوۆانىڭ كوتەر­گەن ماسەلەسى بويىنشا شارالار قولدانۋ ءۇشىن تەكسەرىس جۇمىستارىنىڭ باستال­عانى جانە ول باس پروكۋروردىڭ باقى­لاۋىنا الىنعانى حابارلانىپتى. «ەگەمەن اقپارات».