ءبىزدىڭ ءونىم باسقالاردان نەگە تومەن؟

كانادانىڭ قازاقستانداعى ەلشىسى شون ستايل س.سەيفۋللين اتىنداعى قازاق اگروتەحنيكالىق ۋنيۆەرسيتەتىنە كەلىپ, وقىتۋشى-پروفەسسورلارعا, دوكتورانتتار مەن ماگيسترانتتارعا ءدارىس وقىدى. ەلشى ءوز سوزىندە كاناداداعى اگرارلىق عىلىمنىڭ قول جەتكەن بۇگىنگى جەتىستىكتەرى, جاڭا يننوۆاتسيا مەن وزىق تەحنولوگيانىڭ ەكونوميكاداعى ورنى, ەلدەگى فەرمەرلىك شارۋاشىلىقتاردىڭ قىزمەتى, ەت ونىمدەرىنىڭ ساپاسى جايىندا كەڭىنەن باياندادى. سونىمەن قاتار, كاناداداعى بانكتەردىڭ جەڭىل نەسيە بەرۋ ساياساتى, مەملەكەتتىك جانە جەكە جوعارى وقۋ ورىندارىنىڭ مارتەبەسىنە قاراماي تەڭ قارجىلاندىرىلۋى تۋرالى ايتىلدى. ءيا, بۇل ەلدەن ءبىزدىڭ ۇيرەنەتىنىمىز جەتەرلىك. لەكتوردىڭ ايتۋىنشا, كانادانىڭ ساسكاچەۆان پروۆينتسياسى مەن ءبىزدىڭ سولتۇستىك قازاقستان ايماقتارىنىڭ اۋا رايى جانە توپىراق قۇنارلىلىعى وتە ۇقساس. سوعان قاراماستان كانادادا ءداندى داقىلداردىڭ ونىمدىلىگى بىزگە قاراعاندا 2 ەسە جوعارى. ولاردا بيداي ەگىسىنىڭ جالپى ۇلەسى 40 % بولسا, قالعاندارى مايلى جانە بۇرشاق تۇقىمداس داقىلدار. ءبىزدىڭ ەلدە ەگىس­تىكتىڭ 70%-دان استامىن بيداي قۇ­رايدى. ءسويتىپ, بيداي قازاقستاندا مو­نوداقىلعا اينالىپ كەتكەن. ال قالعان از بولىگى عانا ءتۇرلى داقىلدار مەن مال ازىعى بولىپ وتىر. بۇل ءىس جۇزىندە كەرىسىنشە بولۋى ءتيىس. كانادادا ءبىر سيىردان جىلىنا 10 مىڭ ليتر ءسۇت ساۋىلسا, ءبىزدىڭ ەلدە بۇل ايتۋعا تۇرمايدى. وسىدان-اق ءبىزدىڭ اگرارلىق عى­لىم­نىڭ قانشالىقتى ارتتا قالىپ قوي­عانىن بىلە بەرىڭىز. قاشان وزگەرىس بولادى؟ اگرارلىق عى­لىمعا جاڭالىق اكەلەر باتىل رە­فور­مالاردىڭ ۋاقىتى جەتكەن سياق­تى. ويتكەنى, اگرارلىق عىلىم اۋىل شا­رۋاشىلىعىنىڭ ىرگەتاسى ەمەس پە؟! «ەگەمەن-اقپارات»