استانا. 19 ءساۋىر. قازاقستان رەسپۋبليكاسى مەن اقش قورعانىس ۆەدومستۆولارى اراسىندا ەكىجاقتى ىنتىماقتاستىق شەڭبەرىندە ەلىمىزدىڭ قارۋلى كۇشتەرى اسكەري تەڭىز كۇشتەرىنىڭ باس قولباسشىسى كونتر-ادميرال جانداربەك جانزاقوۆ تەڭىز ينفراقۇرىلىمىنىڭ قاۋىپسىزدىگى جونىندەگى حالىقارالىق سيمپوزيۋمعا قاتىستى. بۇل تۋرالى egemen.kz ءتىلشىسى حابارلادى.
بۇگىنگى تاڭدا تەڭىز ينفراقۇرىلىمى وتە كوكەيكەستى ماسەلە. الەمنىڭ كوپتەگەن ەلدەرى لاڭكەستەردىڭ, قاراقشىلاردىڭ تاراپىنان قاۋىپ-قاتەرلەرگە دۋشار بولىپ وتىر. وسى قاتەردى بولدىرماۋ جانە ساۋدا كەمەلەرىنىڭ تەڭىزدە ءجۇزۋ قاۋىپسىزدىگىن قامتاماسىز ەتۋ ءۇشىن تەڭىز كومپانيالارىنا اسكەري-تەڭىز كۇشتەرى جانە جاعالىق كۇزەتپەن تىعىز قارىم-قاتىناستا بولۋ قاجەت. كونفەرەنتسيا بارىسىندا 30 ەلدىڭ اسكەري-تەڭىز كۇشتەرىنىڭ وكىلدەرى, 20-دان اسا كومپانيا جانە اسكەري-تەڭىز سالاسىنداعى 30-دان اسا مامان وسى جانە وزگە دە ماسەلەلەردى تالقىلادى.
ودان باسقا, ساپار بارىسىندا قر قك اتك باس قولباسشىسى بەسىنشى فلوتتىڭ قولباسشىسى ۆيتسە-ادميرال ك. دونەگانمەن كەزدەستى. كەزدەسۋدە قر قك اتك اسكەري قىزمەتشىلەرىنىڭ اقش اتك 5-ءشى فلوتىنىڭ كورابلدەرىندە پراكتيكادان جانە تاعىلىمدامان ءساتتى ءوتۋى, سونداي-اق ولاردىڭ ءارتۇرلى كونفەرەنتسيالارعا, فورۋمدار مەن سيمپوزيۋمدارعا قاتىسۋى تالقىلاندى. سونىمەن قاتار ەكى ەلدىڭ اسكەري قىزمەتشىلەرى اقش اتك-ءنىڭ «Proud Lions» كورابلىنە باردى.
بۇگىنگى تاڭدا شەتەلدە ەلىمىزدىڭ اسكەري-تەڭىز كۇشتەرىنىڭ بولاشاق اسكەري قىزمەتشىلەرى اتاناتىن 50-دەن اسا قازاقستاندىق كۋرسانت ءبىلىم الىپ جاتىر.
داستان كەنجالين.
دەرەك, فوتو: قورعانىس مينيسترلىگى.
