الاياقتار 34 ميلليون تەڭگەمەن قولعا ءتۇستى

قاراعاندى. 18 ءساۋىر. قاراعاندىدا ءىرى كولەمدە الاياقتىقپەن اينالىسىپ كەلگەن قىلمىستىق توپ مۇشەلەرى قولعا ءتۇسىپ, ءتيىستى جازالارىن الدى. بۇل تۋرالى وبلىستىق سوتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. كۇدىكتىلەر جەدەل-ىزدەستىرۋ شارالارى بارىسىندا «Kassa Nova بانك» اق قاراعاندى فيليالىنىڭ جانىندا «ساۋلەت قۇرىلىس ينۆەست» جاۋاپكەرشىلىگى شەكتەۋلى سەرىكتەستىگىنىڭ ەسەپ شوتىنان العان 34 ميلليون تەڭگەمەن قوسا قولعا ءتۇستى. قىلمىستىڭ نەگىزى يدەياسى مىناداي بولعان. ولار پايدا تابۋ ءۇشىن كونتراگەنتتەرگە سالىقتان جالتارۋعا كومەكتەسىپ جۇرگەن. سونداي-اق, قىلمىسكەرلەر جەكەمەنشىك كاسىپكەرلىك سۋبەكتىلەرىن قۇرىپ, جالعان كاسىپورىنداردى بۇركەمەلەپ وتىرعان. قىلمىستىق توپتىڭ ءۇش مۇشەسى لايىقتى جازالارىن الدى. توپتى قۇرعان ايەل 8 جىلعا سوتتالىپ, دۇنيە-مۇلكى تاركىلەندى. ونىڭ ەكى سىبايلاسى 7 جىلعا باس بوستاندىقتارىنان ايىرىلدى. قىلمىسكەرلەردەن الىنعان 34 ميلليون تەڭگە مەملەكەت پايداسىنا بەرىلدى. قايرات ءابىلدينوۆ. دەرەك: قاراعاندى وبلىستىق سوتتىڭ ءباسپاسوز قىزمەتى. فوتو: infovending.ru.