جەر كودەكسىنىڭ جاڭا نورمالارى تالقىلاندى

«جەر كودەكسىنە وزگەرىستەر مەن تولىقتىرۋلار ەنگىزۋ تۋرالى» 2015 جىلعى 2 قاراشادا قابىلدانعان زاڭ ونىڭ ءمانىن تولىق تۇسىنبەگەندەردىڭ كوڭىلىنە قوبالجۋ ەنگىزگەن. وسىندايدا ايقايعا اتتان قوساتىندار مەملەكەتتىك ماسەلەنى ۋشىقتىرىپ, بارلىق جەردى بوتەن بىرەۋلەرگە پىشاق ۇستىنەن قىلداي ءبولىپ بەرەتىندەي ۇرەي شاقىرىپ ءجۇر. شىمكەنتتە وسى ماسەلەگە بايلانىستى ۇلتتىق ەكونوميكا مينيسترلىگى وڭتۇستىك قازاقستان وبلىسىنىڭ اكىم­دىگىمەن بىرلەسە وتىرىپ, «100 ناقتى قا­دام» ۇلت جوسپارىن ىسكە اسىرۋ شەڭبەرىندە جەر كودەكسىنىڭ جانە باسقا زاڭنامالىق اكتىلەردى ءتۇسىندىرۋ بويىنشا كەڭەس وتكىزدى. كەڭەسكە مەملەكەتتىك, جەرگىلىكتى اتقارۋشى ورگاندار, اۋىل­شارۋاشىلىق تاۋار ءوندىرۋ­شىلەر, ۇكىمەتتىك ەمەس ۇيىمدار وكىلدەرى قاتىستى. كەڭەس بارىسىندا اۋىلشارۋا­شىلىق ماقساتتاعى جەرلەردى ءتيىمدى پاي­دالانۋ, اۋىلشارۋاشىلىق ماق­ساتتاعى جەرلەرگە قۇرىلىس سالاسىنداعى جاڭا ەنگىزىلىمدەر, سونداي-اق, سالىق زاڭناماسىنا ەنگىزىلەتىن جوسپارلانعان وزگەرىستەر سياقتى ماسەلەلەر تالقىلان­دى. جيىندا بايانداما جاساعان ۇلتتىق ەكونوميكا مينيسترلىگى دەپارتامەنت باسشىسىنىڭ ورىنباسارى گۇلجاھان بيمەندينا مەملەكەت مەنشىگىندەگى اۋىل شارۋاشىلىعى ماقساتىنداعى جەر ۋچاسكەلەرىن جەكەمەنشىككە اۋكتسيون ارقىلى بەرۋ, جالعا بەرىلگەن جەر ۋچاسكەلەرىن ساتىپ الۋ بويىن­شا جەڭىلدىك شارتتارىن ۇسىنۋ, جال­عا الىنعان اۋىل شارۋاشىلىعى ماق­ساتىنداعى جەرلەردى پايدالانۋ بو­يىنشا شەكتەۋلەردى الىپ تاستاۋ, اۋىل شارۋاشىلىعى جەرلەرىنىڭ نىسانالى ماقساتىن وزگەرتۋ ءراسىمىن الىپ تاستاۋ سىندى وزەكتى ماسەلەلەر بويىنشا تۇسىنىك بەردى. جيىندا «100 ناقتى قادام» ۇلت جوسپارىنىڭ 44-45-ءىنشى قادامدارىن, سونداي-اق, مەملەكەت باسشىسىنىڭ 2015 جىلعى 30 قاراشاداعى «قازاق­ستان جاڭا جاھاندىق ناقتى احۋالدا: ءوسىم, رەفورمالار, دامۋ» اتتى جول­داۋىن, ۇكىمەت پەن ۇلتتىق بانك­تىڭ ەكونوميكالىق جانە الەۋمەت­تىك تۇراقتىلىقتى قامتاماسىز ەتۋ جونىندەگى 2016-2018 جىلدارعا ار­نالعان داعدارىسقا قارسى ءىس-قيمىل جوسپارىن ىسكە اسىرۋ شەڭبەرىندە سالىق جۇيەسىن تۇبەگەيلى رەفورمالاۋ كوزدەلگەندىگى ايتىلدى. جەر كودەكسىندەگى وزگەرىستەر مەن تولىقتىرۋعا بايلانىستى جيىنعا قا­تىسۋشىلار تاراپىنان قويىلعان سۇراقتارعا جاۋاپ بەرىلدى. ەندى شارۋالار ءوز جەرىن ەلۋ پايىز جەڭىلدىكپەن جەكەمەنشىگىنە ساتىلاپ تولەۋ ارقىلى الۋعا مۇمكىندىگى بار. ال شە­تەلدەن كەلگەندەرگە جەر جالعا بە­رىل­گەنى بولماسا, ساتىپ الۋعا رۇقسات جوق. باقتيار تايجان, «ەگەمەن قازاقستان» وڭتۇستىك قازاقستان وبلىسى