الەمدىك دودادا دوپ تەبەمىز

فۋتزالدان قازاقستاننىڭ ۇلتتىق قۇراما كومانداسى الەم چەمپيوناتىنا جولداما الدى. الماتىدا قازاقستان قۇراماسى ىرىكتەۋ ءتۋرنيرىنىڭ سوڭعى ماتچىندا پولشا كومانداسىمەن كەزدەسىپ, قارسىلاستارىن 7:0 ەسەبىمەن ۇتتى. وسى جەڭىس وتانداستارىمىزعا الەم چەمپيوناتىنا جولداما الىپ بەردى. پولشامەن كەزدەسۋدە العاشقى گولدى ماتچتىڭ ەكىنشى مينۋتىندا قازاقستان قۇراماسىنىڭ قاقپاشىسى يگيتا سوقتى. ونىڭ الىستان تەپكەن دوبى قارسىلاستار قاقپاسىنان ءبىر-اق شىقتى. ودان كەيىن قۇراما كاپيتانى سەرىك جامانقۇلوۆ پەن دۋگلاس ەكەۋى دۋبل جاسادى. ەكىنشى تايمدا لەو مەن ارنولد كناۋد ءبىر-ءبىر گولدىڭ اۆتورى اتاندى. ۇلتتىق قۇرامادا گول سوققان فۋتبول­شىلار – قازاقستاننىڭ ازا­مات­تىعىن العان برازيليانىڭ بۇرىنعى ويىنشىلارى. ەندى ەلىمىزدىڭ باس كومانداسى الەم چەمپيوناتىنا دەيىن تامىز ايىندا تايلاندتا جاتتىعىپ, وسى ەلدىڭ قۇراماسىمەن كەزدەسەدى. ودان كەيىن برازيلياعا بارىپ, وزبەكستان قۇراماسىمەن جول­داستىق ماتچ وتكىزەدى. ءسويتىپ, قازاقستان قۇراماسى وسىمەن ەكىنشى رەت ارادا 16 جىل وتكەن سوڭ الەمدىك دوداعا جولداما الدى. ءدۇبىرلى دوپ باسەكەسى 10 قىركۇيەك پەن 10 قازان ارالىعىندا كولۋمبيادا وتەدى. وعان 24 ەلدىڭ ۇلتتىق قۇراماسى قاتىسادى. العاش رەت قازاقستان كومانداسى 2000 جىلى گۆاتەمالادا وتكەن الەم كۋبوگىنا قاتىسقان بولاتىن. سول كەزدە جارىستى ەرتە اياقتاعان وتانداستارىمىز توپتىق كەزەڭدە برازيليادان 1:12, پورتۋگاليادان 2:6, گۆاتەمالادان 5:6 ەسەبىمەن جەڭىلگەن. بيىل قازاقستان قۇراماسى سەربيادا وتكەن ەۋروپا چەمپيوناتىنا العاش رەت قاتىسىپ, قولا مەدال جەڭىپ الدى. توقەتەرىن ايتقاندا, قازاقستان فۋتزال قۇراماسى مەن «قايرات» كلۋبىنىڭ ەۋروپا تورىندەگى جەڭىستەرى قازىرگى قازاق فۋتزال جارىسىنىڭ رەنەسcانسى دەۋگە بولادى. ال فۋتزالدان الماتى كلۋبى سوڭعى جىلدارى ەلىمىزدىڭ حالىقارالىق ارەناداعى جەتىستىكتەرىن تولتىرىپ, بەدەلىنە بەدەل قوسىپ كەلەدى. وتكەن جىلدىڭ وزىندە «قايرات» ەلىشىلىك جارىستاردىڭ بارلىعىن جەڭىپ السا, ارادا كوپ ۋاقىت وتپەي ەۋروپا تورىنەن توبە كورسەتىپ, ۋەفا كۋبوگىنىڭ يەگەرى اتاندى. ودان كەيىن الەمنىڭ كلۋبتىق چەمپيوناتىندا ەكىنشى ورىننان كورىنىپ, قازاق فۋتزالىنىڭ بۇرىن-سوڭدى بولماعان جەتىستىگىنە, ءبيى­گىنە جەتتى. ءسويتىپ, قازىرگى قازاق تەڭبىل دوپ ونەرىنىڭ قارقىنى ەشبىر ەلدەن كەم ەمەستىگىن كورسەتتى. جاقىندا فۋتزالدان «قايرات» كلۋبى سپورت سۇيەر قاۋىمعا تا­عى ءبىر قۋانىشتى حاباردى جەت­كىزدى. الماتىنىڭ «قايرات» فۋت­زال كلۋبى «الەمنىڭ ەڭ ءۇز­دىك كلۋبى-2015» اتاعىنان ۇمىتكەر­لەر تىزىمىنە قوسىلدى. بۇل جاڭا­لىقتى حالىقارالىق فۋتزال قاۋ­ىم­داستىعى ءوزىنىڭ رەسمي سايتى ارقىلى AGLA Futsal Awards 2015 by futsalplanet.com تۇجىرىمى بويىنشا «قايراتتىڭ» الەمنىڭ ەڭ ۇزدىك كلۋبى اتاعىنان ۇمىتكەر كوماندالار تىزىمىنە قوسىلعانى تۋرالى حابارلادى. وتكەن جىلى قازاقستان چەمپيونى, قازاقستان كۋبوگى مەن سۋ­پەركۋبوگىنىڭ يەگەرى اتانعان «قايراتتى» الەمنىڭ ۇزدىك كلۋبى اتاعىنا ابدەن لايىق دەپ بىلەمىز. داستان كەنجالين, «ەگەمەن قازاقستان»