سپورت – بەيبىتشىلىك ەلشىسى

الماتىدا بۇۇ-نىڭ قوعامدىق اقپارات دەپارتامەنتى مەن قازاقستان سپورت دامۋ قورىنىڭ بىرلەسۋىمەن حالىقارالىق سپورت كۇنىنە ارنالعان مەرەكەلىك شارا ۇيىمداستىرىلدى. وعان قالاداعى ءتورت بالالار ءۇيىنىڭ تاربيەلەنۋشىلەرى قاتىسىپ, ءوزارا باق سىناستى. سپورت كۇنىن رەسمي مەرەكەلەۋ قازاقستان رەسپۋبليكاسىنىڭ ءانۇرانى جانە تۋىن كوتەرۋمەن باستالدى. حالىقارالىق سپورت كۇنى ءوزارا تۇسىنىستىك پەن تولەرانتتىق اتموس­فەرانى, بەيبىتشىلىك پەن دامۋدى نىعايتۋعا ىقپال ەتەدى. كوماندالىق رۋح, ادالدىق, ءتارتىپ, قارسىلاستى قۇرمەتتەۋ سياقتى سپورتتىڭ ىشكى قۇندىلىقتارى بۇكىل الەمدە ويىن ەرەجەلەرى رە­تىندە قابىلدانادى جانە قوعام­دىق, تاتۋلىق پەن بەيبىت ءومىر سۇرۋگە ىنتىماقتاستىرادى. مىنە, وسىنداي ماقساتتا وتكىزىلگەن ءار­تۇرلى سپورت جانە دەمالىس ءىس-شا­را­سىنا الماتى وبلىستىق №1, الماتى قالاسىنىڭ №1, №2 جانە «جانۇيا» بالالار ۇيلەرىنىڭ 80-گە جۋىق تاربيەلەنۋشىلەرى قا­تىسىپ, العاشقى كومەك كورسەتۋ ترەنينگتەرى, فۋتبول بويىنشا تۋرنير, كوڭىلدى ەستافەتا, بيشىلەر مەن انشىلەر كورسەتىلىمدەرى, سونداي-اق زۋمبا اسەرلى ءبيى مەن برازيليالىق كاپوەيرا جاۋىنگەرلىك ونەرى كور­سەتىلدى. ءىس-شارانىڭ اشىلۋ سالتاناتىندا بۇۇ-نىڭ اقپاراتتىق بيۋروسى, يۋنەسكو, قازاقستان سپورت دامۋ قورىنىڭ وكىلدەرى قاتىسۋشىلاردى قۇتتىقتاپ, كىشكەنە سپورتشىلارعا جارىستا ساتتىلىك تىلەدى. شاقىرىلعان ءىس-شارا قونا­عى Zumba فيتنەس ءبيى جات­تىق­تىرۋشىسى جارىس باستال­عانعا دەيىن بالالاردى بيلەتىپ, فۋتبول ءتۋرنيرى جانە ەستافەتالارعا قاتىسۋىنا كۇش-جىگەر بەرسە, قازاق­ستاننىڭ قىزىل اي قوعا­مىنىڭ جات­تىقتىرۋشىلارى ولارعا العاشقى مەديتسينالىق كو­مەك ەرەجەلەرىن كورسەتتى. ج­ا­رىس اياقتالعان سوڭ بالالار «م­انەج» كەشەنى جانىندا ورنا­لاسقان «قايرات» سپورت بارىندا تاماقتاندى. سونان سوڭ قمەبي ۋنيۆەرسيتەتى ستۋدەنتتەرى جانە كاپو­ەيريستەر ونەرلەرىن كور­سەتىپ, ارتىنشا ماراپاتتاۋ ءراسىمى ءوتتى. سونىمەن, جارىستا ال­ماتى قالالىق №2 بالالار ءۇيىنىڭ فۋتبول كومانداسى جەڭىسكە يە بولدى. ال ءىس-شارانىڭ دەمەۋشىلەرى مەن سەرىكتەستەرى, اتاپ ايتقاندا, يۋنەسكو-نىڭ كلاستەرلىك بيۋروسى, بۇۇ حالىقتىڭ قونىستانۋ دامۋ قورى, قازاقستاننىڭ قىزىل اي قوعامى مەن Fitness Line, Kind Burger, ToiMart, UDprint, Almaty Mall, Raimbek bottlers كومپانيالارى ءاربىر قاتىسۋشى بالاقايعا سەرتيفيكات بەرىپ, سىيلىقتار تابىس ەتتى. گۇلزەينەپ سادىرقىزى, «ەگەمەن قازاقستان»