«تۇلكىباستان ءوتسەڭ المانىڭ ءيىسى بۇرقىراپ, جان سارايىڭدى اشادى-اي», دەيدى مەملەكەتتىك سىيلىقتىڭ لاۋرەاتى, اتاقتى قاراكول ەلتىرىسىنىڭ الەمدە سيرەك كەزدەسەتىن التىن-سۇر سۇرىپىنىڭ ءدۇنيەگە كەلۋىنە ولشەۋسىز ەڭبەك سىڭىرگەن عالىمداردىڭ ءبىرى, ۇزاق جىلدار وڭتۇستىك-باتىس عىلىمي-زەرتتەۋ ينستيتۋتىنىڭ ءتىزگىنىن ۇستاعان, ءبۇگىندە الماتىداعى اۋىل شارۋاشىلىعىمەن اينالىساتىن ءىرى ينستيتۋتقا باسشىلىق جاساپ وتىرعان ءابدىراحمان ومباەۆ.
عالىم اعامىز شىمكەنتىن ساعىنىپ قالىپتى. وبلىستا نە ىستەلىپ جاتقاندىعىن, وبلىس اكىمىنىڭ جۇمىسىن بەس ساۋساقتاي ءبىلىپ وتىر.
– بەيبىت باكىر ۇلى وبلىسقا ولشەۋسىز ينۆەستيتسيا اكەلىپ جاتىر. بۇل ەلباسىنىڭ اكىمدەرگە قويىپ وتىرعان باستى تالابى, ەلدىڭ وركەندەۋىنە سالىنىپ جاتقان مول قارجى. شيكىزاتتان تۇسەتىن تابىسقا مالدانباي, ءوندىرىس ورىندارىن ىسكە قوساتىن مول مۇمكىندىك. وبلىستا ونشاقتى يندۋستريالىق ايماق بار ەكەن. كورەرسىڭ, ەلدىڭ كەلەشەگى سول ءوندىرىس ورىندارى بولادى, – دەيدى.
بىرەۋ ءسوزىڭدى سويلەپ جاتسا اۋىزىڭدى اۋىرتۋدىڭ ءجونى جوق. الماتىداعى اعايىن وڭتۇستىكتىڭ الەۋەتىن تايعا تاڭبا باسقانداي ايتىپ جاتقان سوڭ وبلىس اكىمىنىڭ ءوڭىردىڭ دامۋ بولاشاعىنا جاساعان جوسپارىن وي ەلەگىنەن وتكىزدىك. وڭتۇستىك – اگرارلى وبلىس. مەملەكەت ءۇشىن ەلدىڭ ازىق-ت ۇلىك قاۋىپسىزدىگىن نىعايتۋ, سوعان وراي ءىس-قيمىل جاساۋ ءبىرىنشى كەزەكتەگى مىندەت بولىپ تابىلادى. بەيبىت اتامقۇلوۆ جىل باسىندا وبلىستا وسى كۇردەلى ماسەلەنى شەشۋدىڭ بەس باعىتىن ۇسىنعان.
وبلىستا اۋىل شارۋاشىلىعى سالاسىنىڭ الەۋەتى وتە ۇلكەن. سوندىقتان, بۇل سالاعا جاڭا تەحنولوگيالاردى ەنگىزىپ, كەلەسى بەسجىلدىقتا سالانى دامىتۋعا ەرەكشە كوڭىل بولىنەتىن بولادى, – دەيدى وبلىس باسشىسى. ياعني, اۋىلشارۋاشىلىق سالاسىن رەفورمالاۋدىڭ نەگىزگى بەس باعىتى جۇزەگە اسىرىلاتىن بولادى.
ءبىرىنشى باعىت – سۋارمالى جەرلەردىڭ جاعدايىن جاقسارتىپ, جاڭادان سۋارمالى جەرلەردى اينالىمعا قوسۋ. سۋ رەسۋرستارىن باسقارۋدىڭ مەملەكەتتىك باعدارلاماسى اياسىندا الداعى 5 جىلدا 500 ملرد. تەڭگەدەن استام قارجى قاراستىرىلىپ وتىرسا, ونىڭ بەستەن ءبىر بولىگى وسى وڭىرگە بولىنبەك.
سونىڭ ناتيجەسىندە, ماقتارال مەن شاردارا اۋداندارىندا 512 تىك درەناج قالپىنا كەلتىرىلەدى. وبلىس بويىنشا 7 مىڭ شاقىرىمعا جۋىق قاشىرتقىلار مەن 3,4 مىڭ شاقىرىم كانالدار ءجوندەۋدەن ءوتكىزىلەدى. سونداي-اق, 525 مىڭ گەكتار سۋارمالى جەرلەردىڭ جاعدايى جاقسارتىلىپ, جاڭا 12 مىڭ گەكتار اينالىمعا قوسىلادى. بۇل جۇمىسقا مەملەكەت قارجىسىنان باسقا, حالىقارالىق قارجى ۇيىمدارىنان ينۆەستيتسيالار تارتىلماق.
ەكىنشى باعىت – فەرمەرلەرگە تومەن پايىزبەن بەرىلەتىن نەسيەلەردىڭ كولەمىن ارتتىرۋ. ماسەلەن, وسى جىلى «ماكسيمۋم» ايو ارقىلى بۇل سالاعا 10 ملرد. تەڭگەگە جۋىق قارجى بولىنۋدە. بۇل وتكەن جىلمەن سالىستىرعاندا 45 پايىزعا وسكەن.
ءۇشىنشى باعىت – بۇل زاماناۋي تەحنيكانىڭ تاپشىلىعى. شاعىن فەرمەرلەردىڭ ءاربىرىنىڭ جەكە تراكتور نەمەسە كومباين الۋعا شاماسى جەتە بەرمەيدى. بۇل پروبلەما كووپەراتيۆ ارقىلى شەشىلمەك. جاڭا زاڭ اياسىندا بۇگىننىڭ وزىندە وبلىسىمىزدا 8 كووپەراتيۆ قۇجاتتارىن تىركەۋگە تاپسىردى, تاعى 10-ى ازىرلەۋدە. الداعى 3-4 جىلدا ءاربىر اۋىلدىق وكرۋگتە كووپەراتيۆ قۇرىلادى. وسى كووپەراتيۆتەرگە قاراستى ماشينا-تراكتور ستانسالارى اشىلاتىن بولادى.
ءتورتىنشى باعىت – اۋىلشارۋاشىلىق سالاسىنا عىلىم جەتىستىكتەرىن كوپتەپ ەنگىزۋ. بۇگىنگى تاڭدا عىلىمي نەگىزسىز اۋىل شارۋاشىلىعى باسەكەگە قابىلەتتى بولا المايدى. عىلىمنىڭ, جاڭا تەحنولوگيانىڭ كومەگىنسىز بۇل سالاداعى بيزنەستىڭ قاۋپى وتە جوعارى. وسىمدىك قورعاۋ, ۆەتەريناريا سالالارىندا الدىن الۋ شارالارى قابىلدانۋى قاجەت. سول سەبەپتى, فەرمەرلەرگە دەر كەزىندە كەڭەس بەرۋ ماقساتىندا ارنايى ورتالىق جۇمىس ىستەيتىن بولادى. ءاربىر اۋداندا سول اۋداننىڭ ەرەكشەلىكتەرىن ەسكەرە وتىرىپ كاسىپكەرلىك مەكتەپتەرىنىڭ بازاسىندا فەرمەرلەرگە عىلىمي كونسۋلتاتسيالىق قىزمەت كورسەتەتىن ورتالىقتار اشىلماق.
بەسىنشى باعىت بويىنشا ءاربىر اۋداننىڭ الەۋەتى مەن كليماتتىق ەرەكشەلىكتەرى زەرتتەلىپ, 2020 جىلعا دەيىنگى ناقتى ينديكاتورلارى بەكىتىلدى.
ياعني, ءار اۋداننىڭ باسىم باعىتتارى ايقىندالدى. ماسەلەن, تاۋلى اۋدانداردا ينتەنسيۆتى باۋ شارۋاشىلىعى قولعا الىنادى. اعىمداعى جىلى قازىعۇرت اۋدانىندا 1800 گەكتارعا جاڭعاق, 300 گەكتارعا الما باۋلارىنىڭ جوباسىن ىسكە اسىرۋ باستالدى. تولەبي مەن تۇلكىباس اۋداندارىندا 1200 گەكتارعا الما باۋى جوبالارى جيناقتالىپ, قارجىلاندىرۋ ماسەلەسى شەشىلۋدە. تۇلكىباس اۋدانىندا ەكى جەمىس-جيدەك وڭدەۋ تسەحى ىسكە قوسىلىپ, يندۋستريالىق ايماققا تاعى 4 جوبا ورنالاستىرىلدى. بۇل اۋدانداردا باۋ جانە ونى قايتا وڭدەۋ كلاستەرى قۇرىلاتىن بولادى. تاۋلى اۋدانداردىڭ تاعى ءبىر باسىم باعىتى – ءسۇت ءوندىرۋ جانە وڭدەۋ سالاسى. تولەبي اۋدانىندا قوسىمشا 20 مىڭ توننا ءسۇت قابىلداۋعا «فۋدماستەر» زاۋىتىنىڭ قۋاتتىلىعى جەتەدى. تۇلكىباستا سوڭعى تەحنولوگيامەن جابدىقتالعان جاڭا جوبا ىسكە قوسىلاتىن بولادى. قازىعۇرتتا ءسۇت ۇنتاقتارىن وندىرەتىن جوبا ماقۇلدانىپ وتىر. قايتا وڭدەۋ قۋاتتىلىعى جەتكىلىكتى بولعاندىقتان, ءسۇت كلاستەرى سايرام اۋدانىندا دا قولعا الىنباق. ماقتارال اۋدانىندا ماقتا شارۋاشىلىعىن دامىتۋ قايتادان قولعا الىنباق. بۇگىندە قولدا بار ماقتانىڭ 30 پايىزىن جەرگىلىكتى توقىما فابريكالارى يگەرۋدە. قۇرىلىسى ءجۇرىپ جاتقان فابريكالار ىسكە قوسىلعاندا ماقتانىڭ تاپشى بولۋ قاۋپى بار. سوندىقتان, 2016 جىلدان باستاپ, ماقتانىڭ ەگىس الاڭى ۇلعايتىلماق. بيىل 2,5-3,0 ملرد. تەڭگە قارجى وسى سالاعا باعىتتالادى. سۋ ماسەلەسىمەن, تەحنيكانىڭ جانە ۇرىقتىق ءشيتتىڭ تاپشىلىعى پروبلەمالارىن شەشۋمەن ارنايى توپ جۇمىس جۇرگىزۋدە.
اعىمداعى جىلى درەناجداردى قالپىنا كەلتىرۋ بويىنشا حالىقارالىق قارجى ينستيتۋتتارىنىڭ ەسەبىنەن ءىرى جوبا باستالماق. بۇل سالادا دا كووپەراتيۆتەردىڭ ماڭىزى وتە جوعارى.
بۇگىندە رەسپۋبليكا بويىنشا جىلىجايلاردىڭ 46 پايىزى سارىاعاشتا. دەگەنمەن, بۇل جەتىستىكتى ءارى قاراي ارتتىرۋ قاجەت. سارىعاش – جابىق جانە اشىق توپىراقتا كوكونiس وندiرەتىن ناعىز «فابريكاعا» اينالۋى ءتيىس. وعان اۋداندا تولىق مۇمكىندىكتەر بار. ول ءۇشىن ەڭ الدىمەن, ديقاندارعا قولداۋ كورسەتۋىمىز قاجەت. ديقاندار ءوز ءونىمىن رەسپۋبليكاعا شىعارۋ ءۇشىن جاعداي جاسالۋى كەرەك. مىسالى, ءونىم الىس جەرگە جەتۋ ءۇشىن – ول ءونىم بۇزىلماۋى ءتيىس. سول سەبەپتەن, ءبىز سارىاعاش اۋدانىندا كولىك-لوگيستيكالىق ورتالىق قۇرۋدى جوسپارلاپ وتىرمىز. بۇل ورتالىقتا ديقاندار ءوز ءونىمىن ساقتاي الاتىن بولادى. جانە قىسقا دەيىن ساقتاپ, قىس كەزىندە جوعارى باعامەن ساتۋعا مۇمكىندىك الاتىن بولادى. دەمەك, پايداسى دا ەسەلەپ ارتادى.
سىردىڭ بويىنداعى سۋارمالى جەرلەردى ودان ءارى ۇلعايتىپ, ىستەن شىققان سۋ جۇيەلەرى قايتا قالپىنا كەلتىرىلىپ, شاردارا, وتىرار اۋداندارى مەن ارىس جانە تۇركىستان قالالارى اۋماقتارى جۇگەرى مەن كوكونىسكە باعىتتالاتىن بولادى. جاڭا باعدارلاما اياسىندا بۇل وڭىردە 80 مىڭ گەكتارعا جۋىق جاڭا جەر قوسىلىپ, 20 مىڭ گەكتاردان استام جەردىڭ سۋ جۇيەلەرى جاڭعىرماق. بۇل ايماقتىڭ ەرەكشەلىگى – كورشى ەلدەردەن سۋ ماسەلەسىندە تاۋەلسىز بولامىز. ال ورداباسى اۋدانىندا جۇگەرى وندىرىسىنە باسىمدىق بەرىلەدى. بۇل اۋدانداردا مال ازىعى داميتىن بولعاندىقتان, مال شارۋاشىلىعىنا دا كوڭىل بولىنەتىن بولادى. شارۋانىڭ وندىرگەن ونىمىنە سۇرانىستى تۇراقتاندىرۋ ماقساتىمەن وتىرار اۋدانىندا 100 مىڭ تونناعا جۇگەرى وڭدەۋ زاۋىتى جوباسىن ىسكە اسىرۋ بويىنشا جۇمىستار جۇرگىزىلۋدە.
وندىرىلگەن كوكونىس ءونىمدەرىن نارىققا شىعارۋعا شىمكەنت قالاسىندا قۇرىلىسى ءجۇرىپ جاتقان جانە تۇركىستان قالاسىندا جوسپارلانىپ جاتقان كولىك-لوگيستيكالىق ورتالىقتار وڭ اسەرىن تيگىزەتىن بولادى. سوزاق, بايدىبەك اۋداندارىندا مال شارۋاشىلىعىنا باسىمدىق بەرىلەدى. اعىمداعى جىلى ءبايدىبەك اۋدانى يندۋستريالىق ايماعىندا قۋاتتىلىعى 20 مىڭ توننانى قۇرايتىن ەت كومبيناتى جوباسى ماقۇلداندى. بۇل جوبا شارۋانىڭ وندىرگەن ەتىنە سۇرانىستى تۇراقتاندىرىپ, ءىرى قارا مال شارۋاشىلىعىن دامىتۋعا جول اشادى.
وندىرىلگەن ونىمگە, ياعني تۇيەنىڭ ەتى, ءجۇنى, سۇتىنە سۇرانىستىڭ ازدىعىنان تۇيە شارۋاشىلىعى دامىماي وتىر. وسى باعىتتا جۇمىس جۇرگىزىپ, شەتەلدىك ينۆەستورمەن بىرلەسىپ تۇركىستان يندۋستريالىق ايماعىندا ءىرى تۇيە ءسۇتىن وڭدەۋ زاۋىتى جوباسىن ىسكە اسىرۋ جوسپارلانۋدا. ىسكە قوسىلعاندا بۇل ەكسپورتقا باعىتتالعان ءوندىرىس بولماق. سول ايماقتاعى اۋدانداردان (تۇركىستان, ارىس, وتىرار, سوزاق) تۇيە ءسۇتىن جيناۋ پۋنكتتەرى اشىلاتىن بولادى. بۇل جوبانىڭ اياسىندا, الداعى جىلدارى تۇيە ءجۇنى مەن ەتىن وڭدەۋ وندىرىستەرى دە زەردەلەنۋدە, دەيدى ءوڭىر باسشىسى.
وڭتۇستىك قازاقستاندا ورتالىقتاندىرىلعان اۋىز سۋمەن 8 قالا مەن 596 اۋىلدىق ەلدى مەكەن قامتاماسىز ەتىلگەن. كورسەتكىش قالالار بويىنشا – 92, اۋىلدىق ەلدى مەكەندەر بويىنشا 71 پايىزدى قۇرايدى. جالپى, ورتالىقتاندىرىلعان اۋىز سۋمەن قامتاماسىز ەتۋ بويىنشا وڭتۇستىك قازاقستان وبلىسى رەسپۋبليكادا 4-ورىندى يەلەنىپ وتىر. جوسپار بويىنشا 2020 جىلعا دەيىن ورتالىقتاندىرىلعان سۋمەن قالا تۇرعىندارىن – 100 پايىز, اۋىل تۇرعىندارىنىڭ 80 پايىز قامتاماسىز ەتۋ جوسپارلانۋدا.
ال ءوڭىردى تابيعي گازبەن قامتاماسىز ەتۋ ماقساتىندا ەلباسىمىزدىڭ تىكەلەي قولداۋىمەن «بەينەۋ-بوزاي-اقبۇلاق» ماگيسترالدى گاز قۇبىرىنىڭ قۇرىلىسى جۇرگىزىلىپ, وبلىسىمىزدىڭ بىرقاتار اۋداندارىن تابيعي گازبەن ساپالى قامتاماسىز ەتۋگە مۇمكىندىك جاسالىندى. وسى باعىتتا تۇركىستان, كەنتاۋ, ارىس قالالارى مەن وتىرار, بايدىبەك, ورداباسى, سوزاق جانە سايرام اۋداندارىنا تابيعي گاز جەتكىزۋ ءۇشىن 7 اۆتوماتتاندىرىلعان گاز تاراتۋ ستانساسى قۇرىلىسى جۇرگىزىلىپ, ونىڭ تورتەۋىنىڭ قۇرىلىسى اياقتالىپ, تاپسىرىلدى. ناتيجەسىندە تۇركىستان قالاسى مەن بايدىبەك اۋدانىنىڭ ورتالىعى شايان اۋىلىنىڭ تۇرعىندارىنا تۇڭعىش رەت تابيعي گاز بەرىلە باستادى. قازىرگى تاڭدا وبلىسىمىزدىڭ 268 ەلدى مەكەنى نەمەسە 31,6 پايىزى تابيعي گازبەن قامتاماسىز ەتىلگەن.
2020 جىلعا وبلىسىمىزدىڭ بارلىق اۋدان, قالالارىنداعى قوسىمشا 318 ەلدى مەكەندەرىندە 825,8 مىڭ حالىقتى 30 پايىزعا گازداندىرۋ قۇرىلىستارىن جۇرگىزىپ, بارلىعى 611 ەلدى مەكەندە 2,5 ملن. حالىقتى 90 پايىزعا ورتالىقتاندىرىلعان تابيعي گازبەن قامتاماسىز ەتۋ جوسپارلاندى.
بۇل اۋىلشارۋاشىلىعى مەن الەۋمەتتىك سالادا اتقارىلىپ جاتقان, الدا جۇمىسى جالعاساتىن باعىتتار بويىنشا جۇلگەلەنگەن شارۋالار.
حالىق جاڭادان تاعايىندالعان وبلىس باسشىسىنان بۇرىنعى تاپتاۋرىن جولدى سۇرلەۋ قىلماي, جاڭاشا ءىس قىلۋىن قالايدى, جاڭاشىلدىعىنا, ءتيىمدى جۇمىسىنا قاراپ باعا بەرەدى. بەيبىت باكىر ۇلى بۇل باعىتتا دا ەل سەنىمىنەن شىعىپ كەلەدى. ءوڭىر باسشىسىنىڭ «اقىلدى ايماق» كلاستەرىن قۇرۋ جوباسى كوپتىڭ كوڭىلىنەن شىقتى.
ءححى عاسىر – جاڭا تەحنولوگيالار زامانى. دەمەك, ءومىردىڭ قاي سالاسىنا بولسىن يننوۆاتسيالاردى ەنگىزۋ – ۋاقىت تالابى, دەيدى وبلىس اكىمى. سول سەبەپتى وبلىستا «اقىلدى ايماق» كلاستەرىن قۇرۋ قاجەت. ياعني, قوعامنىڭ ءار سالاسىنا, اسىرەسە, الەۋمەتتىك سالاعا IT-تەحنولوگيالارىن كوپتەپ ەنگىزۋ كەرەك. سونىڭ ءبىرى – «Smart Ontustik» جوباسى. بۇل جوبانىڭ نەگىزگى ماقساتى – حالىقتىڭ ءومىر ءسۇرۋ ساپاسىن جاقسارتۋ. بولاشاقتا «Smart Ontustik» جوباسى ارقىلى جەر تەلىمدەرىن رەسىمدەۋ, بالانى بالاباقشاعا كەزەككە تۇرعىزۋ, بالانىڭ دەنساۋلىق پاسپورتىن جۇرگىزۋ سياقتى ماسەلەلەر جەڭىلدەتىلەدى. سول سەكىلدى, تۇرعىن ءۇي-كوممۋنالدىق, كولىك, دەنساۋلىق ساقتاۋ سالالارى بويىنشا حالىقتىق باقىلاۋ ورناتۋعا مۇمكىندىك تۋعىزىلادى.
تاعى ءبىر تەحنولوگيالىق جاڭالىق – «اشىق اكىمدىك» جوباسى. بۇل جوبا 3 نەگىزگى باعىتتى قۇرايدى. بىرىنشىدەن – اكىمدىك تاراپىنان قابىلداناتىن شەشىمدەردىڭ اشىقتىعىن قامتاماسىز ەتۋ. ەكىنشىدەن – بارلىق مەملەكەتتىك قىزمەتتەر بولاشاقتا تولىق اۆتوماتتاندىرىلعان بولۋى قاجەت. ۇشىنشىدەن – جاقىن بولاشاقتا ەلەكتروندى قىزمەتتەردىڭ پورتالى جاساقتالاتىن بولادى. بۇل اكىمشىلىك كەدەرگىلەردى جويىپ, حالىققا بارلىق مەملەكەتتىك قىزمەتتەردى اشىق جانە كەدەرگىسىز الۋعا مۇمكىندىك تۋعىزادى. وبلىس باسشىسىنىڭ بايلامى وسى.
بۇعان قوسا ايتارىمىز, بۇرىن جۇرت مەملەكەتتىك قىزمەتكە تامىر-تانىس, قالتاڭدا شىتىرلاعان كوك قاعازدارىڭ بولماسا بارا المايتىنداي كورىنەتىن. ايتسا ايتقانداي, ورتا مەكتەپ پەن جوعارى وقۋ ورنىن ۇزدىك بىتىرگەن, بىراق كوك تىرەپ تۇرعان كوكەسى جوقتىقتان وزىنەن ءبىلىم-بىلىگى تومەن بىرەۋلەردىڭ قولىندا, ىلىنگەن قىزمەتكە يە بولعانىنا شۇكىرشىلىك قىلىپ جۇرگەندەر جەتەتىن. ويتكەنى, ادام رەسۋرسىنا باي وڭتۇستىكتە قولىڭدا وتتاي جالىنداعان قىزىل ديپلومىڭ بولسا دا جۇمىسقا كىرۋ قيىن بولاتىن.
مەملەكەت باسشىسى مەملەكەتتىك قىزمەتكە ءبىلىم-بىلىگى مىقتى, قىزمەتىنە ادال, جاڭا تەحنولوگيا جاعدايىندا جاڭاشا جۇمىس جاسايتىن ازاماتتاردى تارتۋ ماسەلەسىن ۇكىمەتكە تاپسىردى. ەلباسىنىڭ وسى تاپسىرماسىن وڭتۇستىك تابىستى جۇزەگە اسىرىپ جاتىر.
ەندى مەملەكەتتىك قىزمەت كوكە, جاكەڭە, ونىڭ باعالى ورنىنا قارامايدى. وبلىس اكىمدىگى جانىنان قۇرىلعان كوميسسيا قوعامدىق باقىلاۋشى, ۇكىمەتتىك ەمەس ۇيىم وكىلدەرىن قاتىستىرا وتىرىپ, ءارتۇرلى سانات بويىنشا بوس ورىندارعا قۇجات تاپسىرعان ۇمىتكەرلەردەن ەمتيحان الىپ كەلەدى. ساۋاتتى كادرلار وسىلايشا تاڭدالىپ جاتىر.
وڭتۇستىك – مادەنيەت پەن ونەردىڭ, رۋحانياتتىڭ قاينار بۇلاعى. بيىل جىل سوڭىنا دەيىن 8 مادەنيەت وشاعى سالىنباق.
بۇگىندە جاستار كىتاپ وقىمايدى دەگەن سىڭارجاق پىكىر باسىم. وبلىس اكىمىنىڭ باستاماسىمەن وتكەن «الەمدى كىتاپ وقىپ تانى» شاراسى بۇل دەرەكتىڭ نەگىزسىز ەكەندىگىن تانىتقان. 7-14 جاستاعى بالالار مەن جاسوسپىرىمدەردىڭ ۇلەسى كىتاپحانالاردا ءتورت جارىم مىڭعا دەيىن كوبەيۋىنىڭ ءوزى بولاشاقتا قانداي ۇرپاق ءوسىپ كەلە جاتقاندىعىنىڭ حابارشىسىنداي. تەاتردىڭ جاڭا پرەمەرالارىنان قالمايتىن, وبلىستىق مادەنيەت قورىن رۋحاني دۇنيەلەرمەن بايىتىپ جاتقان اكىم وڭتۇستىكتىڭ تەك جاقسى اتىن شىعارۋعا جۇيەلى جۇمىس جاساپ جاتىر.
– مەملەكەت باسشىسى نۇرسۇلتان ءابىش ۇلى «الدىمىزداعى بەس جىل قازاقستاننىڭ ححI عاسىرداعى تاعدىر-تالايى قانداي بولاتىنىن ايقىندايدى. بiزدiڭ ەلiمiزدiڭ بەرiكتiگi, بiزدiڭ ءبارiمiزدiڭ بەرiكتiگiمiز سىنعا تۇسەتiن بولادى. بارشامىزدى ەلدi جاڭارتۋ ورايىنداعى اۋقىمدى جۇمىستار كۇتiپ تۇر. بiزدiڭ مiندەتiمiز – ەلدi ساقتاۋ, ەگەمەندiكتi نىعايتۋ جانە ۇلتتىڭ بولاشاققا بارار جولىن باتىل اشۋ. بiز جاھاندىق سىن-قاتەردەن بۇعىپ قالا المايمىز. بiز وسىعان قاسقايىپ قارسى تۇرۋعا تيiسپiز», دەپ الدىمىزداعى مىندەتتەردىڭ اۋقىمدىلىعىن ايقىنداپ بەردى, – دەيدى بەيبىت اتامقۇلوۆ.
«ەلباسى بىرەۋ, حالقى وعان تىرەۋ» بولعان جاعدايدا قازاقستان المايتىن قامال جوق. ءبىز وسى ماقسات ءۇشىن ءبىر ءۇيدىڭ بالاسى, ءبىر قولدىڭ سالاسىنداي جۇمىلىپ, ەلباسىنىڭ توڭىرەگىنە توپتاسىپ, وتانىمىزدى الەمدەگى باسەكەگە قابىلەتتى مەملەكەتتەردىڭ قاتارىنا قوسىلۋىنا ۇلەس قوسامىز.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
