گولوۆكين Pound-for-pound رەيتينگىسىندە توپ باستادى

قاراعاندى. 17 ءساۋىر. قازاقستاندىق كاسىپقوي بوكسشى گەننادي گولوۆكين سالماق دارەجەلەرىنە قاراماستان الەمدەگى ۇزدىك بوكسشىلاردىڭ رەيتينگىسىندە ءبىرىنشى ورىنعا كوتەرىلدى. بۇل تۋرالى vesti.kz-كە سىلتەمە جاساعان egemen.kz ءتىلشىسى حابارلادى. ءبىرىنشى توقساننىڭ قورىتىندىسى بويىنشا, International Business Times باسىلىمى قۇراستىرعان رەيتينگىدە گەننادي گولوۆكين سالماق دارەجەلەرىنە قاراماستان (Pound-for-pound, P4P) الەمدەگى ەڭ ۇزدىك بوكسشىلاردىڭ تىزىمىندە كوش باستادى. رەيتينگ اۆتورلارى اتاپ وتكەندەي, قازاقستاندىقتىڭ 34 جەڭىسىنىڭ ىشىندە الەمگە ايگىلى بوكسشىلاردىڭ ەسىمى بولماسا دا, گولوۆكيننىڭ مىقتىلىعى سول – دۇنيە جۇزىندەگى ەڭ ۇزدىك دەگەن بىلعارى قولعاپ شەبەرلەرى ونىمەن كۇش سىناسۋدان تايساقتايدى. ول شارشى الاڭدا قارسىلاستارىنىڭ ءبارىن دە ايقىن باسىمدىقپەن جەڭىپ كەلەدى. ءوزىنىڭ كانادالىق داۆيد لەمەمەن وتكىزگەن سوڭعى جەكپە-جەگىندە دە قارسىلاسىن بەتقاراتپاي ۇتىپ, قاتارىنان 21-ءشى نوكاۋتقا قول جەتكىزدى. ايتا كەتەيىك, ساناۋلى كۇننەن كەيىن لوس-اندجەلەس قالاسىندا گەننادي گولوۆكين مەن دومينيك ۋەيد اراسىنداعى جەكپە-جەك وتەدى. قازاقستاندىق جانكۇيەرلەر بۇل جەكپە-جەكتى «قازاقستان» تەلەارناسىنان تىكەلەي ەفيردە 24 ءساۋىر كۇنى تاڭەرتەڭ كورە الادى. وسى جەكپە-جەكتىڭ جەڭىمپازى مەكسيكالىق ساۋل «كانەلو» الۆارەس پەن بريتانيالىق امير  حان اراسىنداعى تارتىستا  مەرەيى ۇستەم بولعان بوكسشىمەن قولعاپ تۇيىستىرەدى. قايرات ءابىلدينوۆ. دەرەك, فوتو: vesti.kz.