جەر سىلكىنىسىنەن قازا تاپقاندار سانى 28 ادامعا جەتتى

استانا. 16 ءساۋىر. وتكەن ءتۇنى جاپونيانىڭ وڭتۇستىك-باتىسىندا جەر سىلكىنىسىنەن تاعى 19 ادام قازا تاپتى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. كۋماموتو پرەفەكتۋراسىنىڭ پوليتسيا باسقارماسى اتالعان ايماقتا سوڭعى ەكى تاۋلىك ىشىندە بارلىعى 28 ادام مەرت بولعانىن مالىمدەدى. شۇعىل تۇردە ۇيىمداستىرىلعان ءباسپاسوز كونفەرەنتسياسىندا مينيسترلەر كابينەتىنىڭ باس حاتشىسى يوسيحيدە سۋگا 80 ادامنىڭ اۋرۋحاناعا جاتقىزىلعانىن ءارى ولاردىڭ جاعدايى تىم اۋىر ەكەنىن ايتتى. سونداي-اق, 2 مىڭعا جۋىق تۇرعىن ءتۇرلى دەڭگەيدە جاراقات العان. ايتا كەتەيىك, كيۋسيۋ ارالىندا 16 ساۋىرگە قاراعان ءتۇنى ماگنيتۋداسى 7,3 باللعا جەتكەن ءزىلزالانىڭ كەزەكتى ءبىر تولقىنى تىركەلدى. بۇل ماڭايدا وسىمەن ەكىنشى كۇن قاتارىنان جەر استى ءدۇمپۋى بولدى. ال ۇلتتىق مەتەورولوگيالىق باسقارما بۇل جاعداي ءالى ءبىر اپتاعا سوزىلۋى مۇمكىن ەكەنىن مالىمدەدى. تابيعات اپاتى اسىرەسە, مينامياسو ەلدى مەكەنىنە ۇلكەن شىعىن اكەلدى. ايماقتا جەر سىلكىنىسىنەن بولەك بىرنەشە رەت سەل جۇرىپ وتكەن. الدىن الا مالىمەت بويىنشا, وسىنىڭ سالدارىنان كەم دەگەندە 11 ادام مەرت بولدى. قۇتقارۋشىلار قولدارىنان كەلگەننىڭ ءبارىن ىستەۋدە. سونداي-اق, اتالعان ايماقتا كۋرو وزەنىنىڭ ۇستىنە سالىنعان 200 مەترلى «اسو» كوپىرى قيراپ قالعان. ايان ءابدۋالي. دەرەك, فوتو: تاسس.