اباي ولەڭدەرىن جاتقا وقىپ جارىستى
سەمەيدەگى اباي مۇراجايىندا مەكتەپ جاسىنا دەيىنگى 5 جاسار بۇلدىرشىندەر اراسىندا «اسەمپاز بولما ارنەگە» بايقاۋى ءوتتى. تۇڭعىش رەت ۇيىمداستىرىلعان بايقاۋدىڭ ماقساتى – قازاقتىڭ ۇلى اقىنى اباي قۇنانباي ۇلىنىڭ ولەڭدەرىن جاس بۇلدىرشىندەر اراسىندا ناسيحاتتاۋ جانە مانەرلەپ وقۋعا باۋلۋ, ءتىپتى, ساحنالىق قويىلىمدارعا قاتىستىرۋ ەدى.
– بايقاۋعا قالامىزداعى «اينالايىن», «بەس اسىل» مەكتەپكە دەيىنگى شاعىن ورتالىقتارىنىڭ تاربيەلەنۋشىلەرى قاتىستى. ءاربىر ونەرپاز بالا ابايدىڭ 10-12 ولەڭىن جاتقا ايتتى, – دەيدى مۇراجاي قىزمەتكەرى بۇلبۇلناز مۇراتقىزى, – بۇل بايقاۋدا «اباي» ونەر مەكتەبىنىڭ مانەرلەپ وقۋ ۇيىرمەسىنىڭ وقۋشىلارى دالا دانىشپانىنىڭ ولەڭدەرىن وقىپ, «بەس اسىل» شاعىن ورتالىعىنىڭ ءبۇلدىرشىندەرى وزدەرى دايىنداپ اكەلگەن «بەس اسىل ءىس...» كورىنىسىن, «اينالايىن» شاعىن ورتالىعىنىڭ بۇلدىرشىندەرى ابايدىڭ ءانى «جەلسىز تۇندە جارىق اي» جانە قازاق ءبيى «قاماجايدى» ەل نازارىنا ۇسىنىپ, ءوزارا باسەكەگە ءتۇستى.
ونەر سايىسىنىڭ قورىتىندىسى بويىنشا I ورىندى «بەس اسىل» مەكتەپكە دەيىنگى شاعىن ورتالىعىنىڭ تاربيەلەنۋشىسى ابىلاي بولاتوۆ, II ورىندى «اينالايىن» مەكتەپكە دەيىنگى شاعىن ورتالىعىنىڭ تاربيەلەنۋشىلەرى ءاليجان اسەت ۇلى, ايزەرە قىدىرحانوۆا, ال III ورىندى شىرايلىم ايدىنقىزى, ايارۋ بەرىكوۆا, اديا يسكاكوۆا, ايدىن وسپانوۆ يەلەندى. جەڭىمپازدار ارنايى ماقتاۋ قاعازدارىمەن جانە سىيلىقتارمەن ماراپاتتالدى. بۇلدىرشىندەردى بايقاۋعا دايىنداعانى ءۇشىن «اينالايىن», «بەس اسىل» مەكتەپكە دەيىنگى شاعىن ورتالىقتارىنىڭ باسشىلارى مەن تاربيەشىلەرىنە ارنايى العىس حاتتار تاپسىرىلدى. «اسەمپاز بولما ارنەگە» بايقاۋىنا سەمەيدىڭ زيالى قاۋىم وكىلدەرى, اتا-انالار, ستۋدەنتتەر, تاربيەشىلەر, ۇستازدار قاتىستى. اباي مۇراجايى مۇرىندىق بولعان «اسەمپاز بولما ءارنەگە» بايقاۋىن ەندى جىل سايىن ءوتكىزۋ جاقسى داستۇرگە اينالعالى وتىر.
راۋشان نۇعمانبەكوۆا.
سەمەي.
