عىلىم كۇنىنە ارنالعان فورۋم

قازاق عىلىمىنىڭ بۇگىنگى جەتكەن بيىگى مەن الداعى بەل-بەلەسىنە ارنالعان «عىلىم جانە بيزنەس» حالىقارالىق فورۋمى الماتى قالاسىندا عىلىم كۇنىنە ورايلاس­تىرىلىپ وتكىزىلدى. بۇل ءىس-شاراعا كورنەكتى عالىم اكادەميكتەر, ۇلتتىق عىلىمي كەڭەستىڭ مۇشەلەرى, شەتەلدىك ساراپشىلار, جوعارى وقۋ ورىن­دارىنىڭ جەتەكشىلەرى مەن عىلىمي قىزمەتكەرلەرى قاتىستى. القالى جيىندا ءبىلىم جانە عىلىم ءمينيسترى ەرلان ساعاديەۆ ءسوز الىپ, تاريحىمىزداعى ايتۋلى كەزەڭ – قازاقستان رەسپۋبليكاسى تاۋەلسىزدىگىنىڭ 25 جىلدىعى اتالىپ جاتقان تۇستاعى كاسىبي مەرەكە – عىلىمي قىزمەتكەرلەر كۇنىمەن قاتىسۋشىلاردى قۇتتىقتاي كەلىپ, «قازىرگى كەزدە الەمدە عىلىم مەن جاڭا تەحنولوگيالاردى دامىتۋ وزەكتى تاقىرىپتاردىڭ ءبىرى. عىلىمي الەۋەت, عىلىمي تەحنيكالىق رەسۋرستار كوبىنەسە ءار ەلدىڭ الەمدىك قاۋىمداستىقتاعى الاتىن ورنىن انىقتايدى, ونىڭ الەۋمەتتىك-ساياسي ەكونوميكا­لىق ماسەلەلەرىن ءتيىمدى شەشۋگە مۇمكىندىك بەرەدى» دەي كەلىپ, وتاندىق عىلىمنىڭ دامۋى جايلى وي بايلامدارىن ورتاعا سالدى. سول سەكىلدى, فورۋمدا ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ ءوندىرىستى عىلىمي تۇرعىدان سۇيەمەلدەۋ قاجەتتىلىگىنە توقتالدى. ال شەتەلدىك ساراپشى, كورەيا عىلىمي-تەحنيكالىق اقپارات ينستيتۋتىنىڭ وكىلى چال سۋ ليم قازاقستانداعى عىلىمي-تەحنيكالىق اقپارات جۇيەسىن وڭ­تۇستىك كورەيانىڭ تاجىريبەسىن پايدالانا وتىرىپ جەتىلدىرۋ مۇمكىندىكتەرى بويىنشا جاساعان بايانداماسى جۇرتشىلىقتىڭ كوڭىلىنەن شىقتى. فورۋم اياسىندا عىلىمي-تەح­نيكالىق اقپارات جۇيەسىن دامىتۋ, باسقا دا ماسەلەلەر قوزعالىپ, تاۋەلسىزدىكتىڭ 25 جىلدىق مەرەيتويىنا بايلانىستى كىتاپ كورمەسى ۇيىمداستىرىلدى.  «ەگەمەن-اقپارات».