سايرام اۋدانىنىڭ اكىمى تاعايىندالدى

استانا. 6 ءساۋىر. سايرام اۋداندىق ءماسليحاتىنىڭ كەلىسىمى بويىنشا وڭتۇستىك قازاقستان وبلىسى اكىمىنىڭ وكىمىمەن سايرام اۋدانىنىڭ اكىمى قىزمەتىنە سامات ساپارباەۆ تاعايىندالدى. بۇل تۋرالى otyrar.kz سايتىنا سىلتەمە جاساعان egemen.kz ءتىلشىسى حابارلادى. سامات ساپارباەۆ 1962 جىلى تۋعان.  ءبىلىمى جوعارى, ماماندىعى — ينجەنەر-مەحانيك. ەڭبەك جولىن 1985 جىلى جامبىل كىرپىش زاۋىتىنىڭ سلەسارى رەتىندە باستاعان. 1988-1991 جىلدارى وڭتۇستىك قازاقستان وبلىسى سايرام اۋداندىق كومسومول كوميتەتىنىڭ نۇسقاۋشىسى, حاتشىسى قىزمەتتەرىن اتقارعان. 1992 جىلى سايرام اۋداندىق اكىمشىلىگى جاستار ءىسى ءبولىمىنىڭ مەڭگەرۋشىسى بولدى. 1997-2013 جىلدارى سايرام اۋدانى اكىمى اپپاراتى ۇيىمداستىرۋ-كادرلىق جۇمىس ءبولىمىنىڭ مەڭگەرۋشىسى, اۋماقتى دامىتۋ جانە كادرلارمەن جۇمىس ءبولىمىنىڭ مەڭگەرۋشىسى, قاراسۋ اۋىل وكرۋگىنىڭ اكىمى, سايرام اۋدانى اكىمى اپپاراتىنىڭ باسشىسى, اۋدان اكىمىنىڭ ورىنباسارى بولىپ ەڭبەك ەتتى. 2013 جىلدىڭ ماۋسىم ايىنان باستاپ ورداباسى اۋدانىنىڭ اكىمى لاۋازىمىن اتقارىپ كەلدى. داستان كەنجالين. دەرەك, فوتو: otyrar.kz