دەلەگاتسيا قۇرامىندا سەنات دەپۋتاتى سەرىك وتەشوۆ, ءماجىلىس دەپۋتاتتارى باۋىرجان سماعۇلوۆ, ارمان قالىقوۆ, تىلەكتەس ادامبەكوۆ, ۇلتتىق كاسىپكەرلەر پالاتاسى «اتامەكەن» باسقارما توراعاسىنىڭ ورىنباسارى گۇلنار بيجانوۆا, سونداي-اق وبلىستىق ءماسليحات دەپۋتاتتارى مەن ازاماتتىق قوعام وكىلدەرى بولدى.
كواليتسيا مۇشەلەرى الدىمەن «Qarmet» اق-نىڭ «تەنتەك» شاحتاسىنىڭ ۇجىمىمەن كەزدەستى. كومىر ءوندىرۋ سالاسىنداعى ماڭىزدى وندىرىستىك كاسىپورىندا ەڭبەك جانە الەۋمەتتىك قۇقىقتارعا قاتىستى وزگەرىستەر كەڭىنەن ءتۇسىندىرىلدى. كەزدەسۋگە 400-دەن استام قىزمەتكەر قاتىستى.
جيىن بارىسىندا سەناتور سەرىك وتەشوۆ جاڭا كونستيتۋتسيا جوباسىنىڭ تۇجىرىمدامالىق نەگىزدەرىنە توقتالدى.
«جاڭا كونستيتۋتسيا ازاماتتاردىڭ قۇقىعى مەن بوستاندىعىن نىعايتۋعا, مەملەكەتتىك ينستيتۋتتاردىڭ جاۋاپكەرشىلىگىن ارتتىرۋعا جانە ءادىل باسقارۋ جۇيەسىن قالىپتاستىرۋعا باعىتتالعان. ونىڭ نەگىزىندە ادامنىڭ مۇددەسى باسىمدىققا يە بولۋى جانە بيلىكتىڭ اشىقتىعى قاعيدالارى جاتىر. الەۋمەتتىك كەپىلدىكتەر مەن قوعامدىق باقىلاۋ مەحانيزمدەرىنە دە ەرەكشە كوڭىل ءبولىندى», دەدى سەناتور.
سودان كەيىن كواليتسيا مۇشەلەرى 300-گە جۋىق الەۋمەتتىك سالا قىزمەتكەرىمەن اتا زاڭ جوباسىن تالقىلادى. اشىق فورماتتا وتكەن جيىندا قاتىسۋشىلار ءوز سۇراقتارىن قويىپ, ويلارىن ورتاعا سالدى. دەلەگاتسيا وكىلدەرى بارلىق ساۋالعا ناقتى جاۋاپ بەرىپ, كونستيتۋتسيالىق رەفورمالاردىڭ ءمان-ماڭىزىن ەگجەي-تەگجەيلىءتۇسىندىردى.
كەلەسى كەزدەسۋ قازتۇتىنۋوداعى قاراعاندى ۋنيۆەرسيتەتىنىڭ وقىتۋشىلارى جانە ستۋدەنتتەرىمەن ءوتتى. جيىنعا 300-گە جۋىق ادام قاتىستى. ءىس-شارادا ءماجىلىس دەپۋتاتى باۋىرجان سماعۇلوۆ جاڭا كونستيتۋتسيا جوباسىندا ازاماتتار مەن مەملەكەتتىڭ مىندەتتەرى اراسىنداعى تەڭگەرىم قامتىلعانىنا نازار اۋداردى. اتاپ ايتقاندا, تاريحي جانە مادەني مۇرانى ساقتاۋعا قامقورلىق جاساۋ, تاريح پەن مادەنيەت مۇرالارىن قادىرلەۋ سىندى قازاقستان ازاماتتارىنىڭ مىندەتتەرىن جۇرتشىلىق جىلى قابىلدادى.
«جاڭا كونستيتۋتسيا جوباسى مەملەكەتتىڭ ساياسي جۇيەسىن ودان ءارى جاڭعىرتۋعا, الەۋمەتتىك كەپىلدىكتەردى نىعايتۋعا, كاسىپكەرلىكتى قولداۋعا, عىلىمدى, مادەنيەتتى جانە ۇلتتىق قۇندىلىقتاردى دامىتۋعا باعىتتالعان ستراتەگيالىق باعدارعا تولىق سايكەس كەلەءدى. ۇسىنىلىپ وتىرعان وزگەرىستەر ازاماتتاردىڭ ءال-اۋقاتىن ارتتىرۋعا باعدارلانعان مەملەكەتتىك ينستيتۋتتاردىڭ نەعۇرلىم تۇراقتى ءارى ءتيىمدى مودەلىن قالىپتاستىرادى», دەدى حالىق قالاۋلىسى.
بۇدان كەيىن كواليتسيا مۇشەلەرى بيۋدجەتتىك سالا قىزمەتكەرلەرى: دارىگەرلەر, پەداگوگتار جانە الەۋمەتتىك سالا ماماندارىمەن جۇزدەستى. ونىڭ بارىسىندا قاتىسۋشىلارعا جاڭا كونستيتۋتسيانىڭ نەگىزگى نورمالارى ءتۇسىندىرىلىپ, ادام قۇقىعى مەن بوستاندىعىن نىعايتۋ, مەملەكەتتىك ورگاندار جۇمىسىنىڭ اشىقتىعى جانە بيلىك ينستيتۋتتارىنىڭ الەۋمەتتىك جاۋاپكەرشىلىگىن كۇشەيتۋ باعىتتارى ايتىلدى.
وساكاروۆ اۋدانىنىڭ مادەنيەت ۇيىندە ۇيىمداستىرىلعان ءىس-شاراعا جاڭا قۇجاتتاعى وزگەرىستەردى جان-جاقتى تالقىلاۋعا 200-گە جۋىق اۋىل شارۋاشىلىعى تاۋارىن وندىرۋشىلەرىجينالدى. ولار زاڭدىلىق, مەملەكەتتىڭ الەۋمەتتىك جاۋاپكەرشىلىگى قاعيداتتارىن نىعايتۋ جانە ازاماتتاردىڭ شەشىم قابىلداۋ پروتسەسىنە قاتىسۋىن كەڭەيتۋ بويىنشا سۇراقتارىن قويىپ, پىكىرلەرىن ءبىلدىردى.
نۇرا كەنتىندە ديالوگ كوپسالالى كوللەدج ۇجىمى مەن اۋداندىق مەديتسينا قىزمەتكەرلەرىمەن جالعاستى. ءىس-شارادا بيۋدجەت سالاسى قىزمەتكەرلەرىنىڭ الەۋمەتتىك قورعالۋىن كەڭەيتۋ, شەشىم قابىلداۋ پروتسەسىنىڭ اشىقتىعىن ارتتىرۋ جانە ازاماتتاردىڭ قوعامدىق-ساياسي ومىردەگى ءرولىن كۇشەيتۋ ماسەلەلەرى قارالدى. سونداي-اق «قاراتال» كمپ ۇجىمىمەن كەزدەسۋ ءوتتى. ونىڭ بارىسىندا ەڭبەك جانە الەۋمەتتىك كەپىلدىكتەر, حالىقتىڭ رەفورمالاردى جۇزەگە اسىرۋ ۇدەرىسىنە قاتىسۋ تەتىكتەرى ءتۇسىندىرىلدى.
«ەڭبەك ۇجىمدارىمەن ءتۇسىندىرۋ جۇمىستارى ازاماتتاردى جاڭا كونستيتۋتسيالىق ەرەجەلەر تۋرالى حاباردار ەتىپ قانا قويماي, رەفورمالاردى ىسكە اسىرۋ كەزىندە ولاردىڭ ناقتى قاجەتتىلىكتەرى مەن ۇسىنىستارىن ەسكەرۋگە مۇمكىندىك بەرەدى. اشىق ديالوگ قوعام مەن مەملەكەت اراسىنداعى سەنىمدى نىعايتادى», دەدى ءماجىلىس دەپۋتاتى تىلەكتەس ادامبەكوۆ.
بۇدان كەيىن كواليتسيا وكىلدەرى ساران قالاسىندا بىرقاتار ونەركاسىپتىك كاسىپورىننىڭ ۇجىمىمەن كەزدەسۋ وتكىزدى. اتاپ ايتقاندا, «تەمپو كازاحستان» جشس, «Silk Road Electronics» جشس جانە «QazTehna» جشس قىزمەتكەرلەرىمەن مازمۇندى ديالوگ ۇيىمداستىرىلدى. سونىمەن قاتار كواليتسيا مۇشەلەرى شاعىن جانە ورتا بيزنەس وكىلدەرىمەن كەزدەستى. وندا ازاماتتاردىڭ رەفەرەندۋمعا قاتىسۋى, اشىق كوممۋنيكاتسيا جانە قوعامنىڭ انىق اقپارات الۋىنىڭ مەملەكەت بولاشاعىن قالىپتاستىرۋداعى ءرولى تالقىلاندى.
ەسكە سالا كەتەيىك, «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسى 12 اقپاندا قۇرىلدى. ونىڭ قۇرامىنا 5 ساياسي پارتيا مەن شامامەن 300-گە تارتا قوعامدىق ۇيىم كىردى. ولار شامامەن 5 ميلليون قازاقستاندىقتى بىرىكتىرەدى.
