اقمولانىڭ ارشالى اۋدانىنا اكىم تاعايىندالدى

اقمولا. 6 ءساۋىر. اقمولا وبلىسىنىڭ اكىمى سەرگەي كۋلاگيننىڭ وكىمىمەن, قازاقستان رەسپۋبليكاسى پرەزيدەنتى اكىمشىلىگىنىڭ كەلىسىمى بويىنشا جانە اۋداندىق ءماسليحات دەپۋتاتتارى كەلىسىمىنىڭ نەگىزىندە تايجانوۆ ازامات ايتباي ۇلى ارشالى اۋدانىنىڭ اكىمى بولىپ تاعايىندالدى. بۇل تۋرالى egemen.kz ءتىلشىسى حابارلادى. اۋدان اكتيۆىنە جاڭا اكىمدى ءوڭىر باسشىسى سەرگەي كۋلاگين تانىستىردى. «ارشالى اۋدانى استاناعا جاقىن اۋدانداردىڭ ءبىرى. مۇندا كوپتەگەن جۇمىستار اتقارىلۋدا. دەگەنمەن بىرقاتار مەملەكەتتىك باعدارلامالاردى ورىنداۋ بويىنشا ءالى دە قارقىندى جۇمىس كۇتىلۋدە. ينۆەستيتسيا تارتۋ, ونەركاسىپ, قۇرىلىس سالالارىن جانداندىرۋ باعىتىنداعى جوسپارلاردى ورىنداۋ مىندەتى تۇر», – دەدى وبلىس اكىمى ءوز سوزىندە. سونداي-اق, ءوڭىر باسشىسى جاڭا اكىمنىڭ جۇمىسىنا تابىس تىلەدى. ازامات ايتباي ۇلى, 1985 جىلى تۋعان. ءبىلىمى جوعارى. ول قازاق گۋمانيتارلىق-زاڭ ۋنيۆەرسيتەتىنىڭ باكالاۆرياتىن جانە ماگيستراتۋراسىن اياقتاعان. سونىمەن قاتار, «بولاشاق» باعدارلاماسى اياسىندا 2010 جىلى جاپونيادا توكاي ۋنيۆەرسيتەتىنەن ءبىلىم العان. ازامات تايجانوۆ ەڭبەك جولىن 2005 جىلى استاناداعى «ىقىلاس ك» سەرىكتەستىگىندە مەنەدجەرى بولىپ باستاعان. 2007 جىلعى قاراشادان باستاپ 2008 جىلعى تامىز ارالىعىندا قازاقستان رەسپۋبليكاسى ەكونوميكا جانە بيۋدجەتتىك جوسپارلاۋ مينيسترلىگىندە مەملەكەتتىك اكىمشىلىك لاۋازىمداردى اتقاردى. 2008 جىلعى قىركۇيەكتەن قورشاعان ورتانى قورعاۋ مينيسترلىگىندە ەكسپەرت بولدى. 2011 جىلعى اقپاننان - قازاقستان پرەزيدەنتى كەڭسەسىنىڭ كەڭەسشىسى. 2013 جىلعى ساۋىردەن باستاپ ستەپنوگورسك قالاسى اكىمىنىڭ ورىنباسارى لاۋازىمىندا جۇمىس جاسادى. 2013 جىلعى ماۋسىمنان وسى كۇنگە دەيىن ەگىندىكول اۋدانىنىڭ اكىمى بولدى. باقبەرگەن امالبەك. دەرەك, سۋرەت: egemen.kz.