27 000 ۆولتتىق توك ۇرعان

وقۋشى قىز امان قالدى قوستانايدا 10-سىنىپتا وقيتىن 17 جاستاعى قىزعا ەكى كەشتىڭ اراسىندا ۆا­گون­نىڭ ۇستىنە شىعۋ قىزىق كورىنىپتى. ول ۆاگوننىڭ ۇستىنە كوتەرىلگەندە, 27 000 ۆولتتىق ەلەكتر توگى ۇرادى. پەرىشتە قاعىپ, امان قالعان قىز قۇ­لاعان جەرىندە ءبىر ساعاتتاي جاتىپ قالادى. ونى كەشكىسىن وزىنە بەكىتىلگەن ايماقتى ارالاپ جۇرگەن كۇزەتشى كەزدەيسوق تاۋىپ الادى. قىز شىرىلداپ جاتىر ەكەن. توتەنشە جاعدايلار دەپارتامەنتىنىڭ قۇتقارۋشىلارى زارار شەگۋشىنى ۆاگوننىڭ ۇستىنەن ءبىر جارىم ساعات دەگەندە ءتۇسىرىپ الدى. «جەدەل جاردەممەن» قالالىق اۋرۋحانانىڭ جان ساقتاۋ بولىمىنە جەتكىزىلدى. – ەلەكتر جاراقاتىنىڭ سالدارىنان قىز دەنەسىنىڭ 30 پايىزى كۇيىپ قالعان. كۇيىك دەندەپ كەتكەندىكتەن, جاعدايى دا اۋىر, – دەيدى قوستاناي قالالىق اۋرۋحاناسىنىڭ باس دارىگەرى سامات ءشۇ­مەنباەۆ. وقۋشى ءوزىنىڭ ۆاگونعا نەگە شىققانىن ناقتى ايتا المايدى, «ۆاگونعا شىعۋ قىزىق كورىندى», دەيدى. دەگەنمەن, ءوزى دە «يت كوي­لەكپەن تۋعان» ەكەن. ايتپەسە, 27 000 ۆولت سوققان ادامنىڭ ءتىرى قالعانى جوق. – ۆاگوننىڭ ۇستىنەن ءجاسوسپىرىم قىز نە كورە قويايىن دەدى ەكەن؟ وندا توك سىمىنىڭ جالاڭاشتانىپ قالعانىنان حابارى بولماعان-اۋ, – دەيدى قوستاناي ىرىلەندىرىلگەن ديستانتسيالىق جولىنىڭ ينجەنەرى سەرگەي سولوماتوۆ. وبلىستا وتكەن جىلى دا وسىعان ۇقساس وقيعا ورىن العان بولاتىن. شالعىشى ستانساسىندا مەكتەپ بىتىرۋشىلەر سەلفي جاساۋعا كەلىسىپ, استىق تيەيتىن ۆاگوننىڭ ۇستىنە شىعادى. وندا بالالاردى ەلەكتر توگى ۇرىپ, قازا بولعان ەدى. ابايلاماسا, اجال كەز كەلگەن تۇستان اۋزىن اشادى. ءنازيرا جارىمبەتوۆا, «ەگەمەن قازاقستان». قوستاناي.