ورال قالاسىنىڭ اكىمى تاعايىندالدى

ورال. 5 ءساۋىر. پرەزيدەنت اكىمشىلىگىنىڭ كەلىسىمىمەن جانە باتىس قازاقستان وبلىسى اكىمى التاي كولگىنوۆتىڭ وكىمىمەن ناريمان تورەعاليەۆ ورال قالاسىنىڭ اكىمى بولىپ تاعايىندالدى. بۇل تۋرالى zhaikpress.kz-كە سىلتەمە جاساعان egemen.kz ءتىلشىسى حابارلادى. ناريمان تورەعالي ۇلى 1964 جىلى بۇرىنعى تايپاق اۋدانى ەسەنساي اۋىلىندا تۋعان. ءبىلىمى جوعارى, 1990 جىلى جامبىل گيدرومەليوراتيۆتىك-قۇرىلىس ينستيتۋتىن – ينجەنەر-ەكونوميست, 2004 جىلى كاسپي قوعامدىق ۋنيۆەرسيتەتىن زاڭگەر ماماندىعى بويىنشا بىتىرگەن. ەڭبەك جولىن 1981 جىلى «ەسەنساي» كەڭشارىندا جۇمىسشى بولىپ باستاعان ول 1982-1984 جىلدارى كەڭەس اسكەرى قاتارىندا ۆەنگريادا اسكەري بورىشىن وتەدى. ەڭبەك جولىندا تەرەكتى اۋداندىق ەڭبەك جانە حالىقتى الەۋمەتتىك قورعاۋ ءبولىمىنىڭ باستىعى, ورال قالاسىنداعى جالپى ۇلگىدەگى ينتەرنات ءۇيىنىڭ ديرەكتورى, وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى باستىعىنىڭ ورىنباسارى, وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ دەپارتامەنتى ديرەكتورىنىڭ ورىنباسارى سىندى جاۋاپتى قىزمەتتەردى اتقاردى. سونداي-اق, 2008-2010 جىلدارى تابيعي مونوپوليالاردى رەتتەۋ اگەنتتىگى باتىس قازاقستان وبلىستىق دەپارتامەنتىنىڭ ديرەكتورى بولدى. ال 2010-2012 جىلدارى وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ باستىعى. سونىمەن قاتار, ناريمان تورەعاليەۆ 2012-2015 جىلدار ارالىعىندا اقجايىق اۋدانىنىڭ اكىمى بولدى. ال 2015 جىلدىڭ 12-ماۋسىمىنان بۇگىنگە دەيىن وبلىس اكىمىنىڭ ورىنباسارى بولىپ قىزمەت اتقاردى. تەمىر قۇسايىن. دەرەك, سۋرەت: zhaikpress.kz.