جاتتىعۋ بارىسىن ۆاسيلي لەۆيت, استانا قالاسىنىڭ دەنە شىنىقتىرۋ جانە سپورت باسقارماسى باسشىسى ارنايى بارىپ كوردى. ول سپورتشىلاردىڭ دايىندىق جاعدايىمەن تانىسىپ, جاتتىقتىرۋشىلارمەن الداعى جۇمىستى ۇيىمداستىرۋ ماسەلەلەرىن تالقىلادى.
«بۇگىن بازادا العاشقى بياتلون جانە شاڭعى تەبۋدەن جاتتىعۋلار ءوتتى. مەن جەكە جاتتىعۋ پروتسەسىمەن تانىسىپ, باپكەرلەر مەن جاس سپورتشىلارمەن سويلەستىم. سونىمەن قاتار, مۇندا سپورتتىق باعدارلاۋمەن اينالىساتىن جاس سپورتشىلار دا جاتتىعاتىن بولادى. شاڭعى بازاسى تولىق جۇمىسقا دايىن جانە شتاتتىق رەجيمدە قىزمەت كورسەتەدى. وقۋ-جاتتىعۋ پروتسەسىن وتكىزۋ جانە ءارتۇرلى دەڭگەيدەگى سپورتشىلاردى دايارلاۋ ءۇشىن بارلىق قاجەتتى جاعدايلار جاسالعان», دەدى ۆاسيلي لەۆيت.
جاڭا نىساننىڭ ينفراقۇرىلىمى كۇشتىك قوندىرعىلارمەن جانە مامانداندىرىلعان جابدىقتارمەن قامتىلعان كەڭ جاتتىعۋ زالىن قامتيدى. ونىڭ ىشىندە «ERCOLINA» ترەناجەرى بار. سونداي-اق جىل بويى تەحنيكا شىڭداۋعا, كونكيمەن سىرعاناۋ قيمىلىن يميتاتسيالاۋعا, جىلدامدىق پەن كولبەۋ بۇرىشتى مەڭگەرۋگە مۇمكىندىك بەرەتىن «Skate Treadmill RL3500E» كاسىبي ترەناجەرى ورناتىلعان. بۇل جابدىق جۇكتەمەنى ءدال رەتتەپ, ماماندار باقىلاۋىمەن قاۋىپسىز جاتتىعۋ وتكىزۋگە ءارى سپورتشىنىڭ دايىندىعىن جۇيەلى باعالاۋعا جول اشادى.
ميحايل شايدوروۆ وليمپيادادا ونەر كورسەتكەن كوستيۋمىن مۇراجايعا تاپسىردى
بازادا شاڭعىلار مەن سپورتتىق جابدىقتاردى دايىنداۋعا, ساقتاۋعا جانە كەپتىرۋگە ارنالعان ارنايى ءۇي-جايلار دا قاراستىرىلعان.
«مەن بياتلوننان اعا جاتتىقتىرۋشىمىن. قازىرگى ۋاقىتتا بىزدە 90-عا جۋىق بالا جاتتىعادى. بۇگىن جاڭا شاڭعى بازاسى جۇمىسىن باستادى جانە ول بىزگە ۇنادى. بالالار قۋانىشتى, ءبىز بۇنى كوپ كۇتتىك. استانادا العاش رەت جابدىقتاردى ساقتايتىن جانە بالالار كيىم اۋىستىرا الاتىن بازا پايدا بولدى. ءبىز وتە ريزامىز: ءبىزدى قارسى الىپ, ءبارىن كورسەتىپ, ءتۇسىندىردى, قولايلى جاعداي جاسادى. وسى ىسكە اتسالىسقان جانداردىڭ بارلىعىنا راحمەت», دەدى بياتلوننان جاتتىقتىرۋشى-وقىتۋشى ەۆگەني تيۋلەگەنەۆ.
جاڭا شاڭعى بازاسى الداعى ۋاقىتتا بالالار مەن جاسوسپىرىمدەر سپورت مەكتەبىنىڭ, وليمپيادالىق رەزەرۆتى دايارلاۋ ورتالىعىنىڭ, جوعارى سپورت شەبەرلىگى مەكتەبىنىڭ جانە بۇقارالىق سپورت كلۋبتارىنىڭ تاربيەلەنۋشىلەرىن دايارلاۋدىڭ نەگىزگى الاڭىنا اينالماق.
شاڭعى بازاسى كۇن سايىن ساعات 09:00-دەن 19:00-گە دەيىن جۇمىس ىستەيدى.
