الماتى قالاسى اكىمدىگىنىڭ مالىمەتىنشە, وڭتۇستىك مەگاپوليستە بارلىعى 654 سايلاۋ ۋچاسكەسى جۇمىس ىستەيدى. قالا تۇرعىندارى ءوز ۋچاسكەسىن بىرنەشە جولمەن بىلە الادى. اتاپ ايتقاندا, كۇن سايىن ساعات 8:00-دەن 20:00-گە دەيىن جۇمىس ىستەيتىن بىرىڭعاي call-ورتالىقتىڭ 1308 نومىرىنە قوڭىراۋ شالۋىنا بولادى. سونداي-اق open-almaty.kz سايتى ارقىلى جەكە سايكەستەندىرۋ ءنومىرىن ەنگىزۋ جەتكىلىكتى. بۇدان بولەك, Telegram جەلىسىندەگى @almaty_referendum2026_bot چات-بوتى دا وسى قىزمەتتى ۇسىنادى.
استانا قالاسىندا داۋىس بەرۋ ۋچاسكەسى تۋرالى اقپارات referendum.astana.kz سايتىندا قولجەتىمدى. سونىمەن قاتار referendum_astana_bot Telegram-بوتى مەن 109 ءنومىرى ارقىلى جۇمىس ىستەيتىن iKomek بىرىڭعاي بايلانىس ورتالىعى ارقىلى دا قاجەتتى مالىمەت الۋعا بولادى.
رەسپۋبليكالىق رەفەرەندۋم 15 ناۋرىزدا وتەدى. ازاماتتار ەلىمىزدىڭ كەز كەلگەن وڭىرىندە داۋىس بەرۋ قۇقىعىن پايدالانا الادى. ول ءۇشىن الدىن الا ارنايى تىركەۋدەن ءوتىپ, ءتيىستى قۇجات راسىمدەۋى قاجەت.
پرەزيدەنت ورتالىق رەفەرەندۋم كوميسسياسىنىڭ توراعاسىن قابىلدادى
ۇيىمداستىرۋشىلاردىڭ ايتۋىنشا, اقپاراتتىق ارنالاردىڭ ىسكە قوسىلۋى تۇرعىنداردىڭ داۋىس بەرۋ ۇدەرىسىنە ىڭعايلى ءارى كەدەرگىسىز قاتىسۋىنا جاعداي جاساۋعا باعىتتالعان.
