استانا. 5 ءساۋىر. Alatau Invest Capital مەن قوستانايداعى Allur Group كومپانياسى اراسىندا ينۆەستيتسيا تارتۋ جانە ستراتەگيالىق سەرىكتەستىك تۋرالى مەموراندۋم جاسالدى. بۇل تۋرالى egemen.kz ءتىلشىسى حابارلادى.
وسىعان وراي, جولاۋشىلار اۆتوموبيلدەرى, جەڭىل كوممەرتسيالىق جۇك ماشينالارى, اۋىر جۇك ماشينالارى, اۆتوبۋستار ءوندىرىسى; ۇلتتىق قازاقستاندىق اۆتوموبيل برەندىن قۇرۋ; قوستاناي وبلىسىندا جالپى اۋدانى 400 گەكتار يندۋستريالىق ايماق قۇرۋ جانە دامىتۋ; عىلىمي-زەرتتەۋ جانە كونسترۋكتورلىق بازا قۇرۋ باعىتتارىنا ينۆەستيتسيا تارتىلماق. سونداي-اق, جوسپارعا اۆتوموبيل ءوندىرىسى ءۇشىن كادرلاردى دايىنداۋ جانە بىلىكتىلىگىن ارتتىرۋ, جاڭا الدىڭعى قاتارلى اۆتوموبيل جاساۋ تەحنولوگيالارىنىڭ ترانسفەرتى كىرەدى. ورتاق ماقسات – ۇلتتىق قازاقستاندىق اۆتوموبيل كلاستەرىن دامىتۋ.
ىنتىماقتاستىقتىڭ ءبىرىنشى كەزەڭىندە JAC جانە Peugeot جەڭىل اۆتوموبيلدەرىنىڭ CKD*-جوباسى, كوممەرتسيالىق تەحنيكا مەن اۆتوبۋستاردىڭ CKD-جوباسى سىندى ەكى ءىرى جوبا جۇزەگە اسىرىلادى. جوبادان اۆتوكلاستەردى جانە قازاقستان ءۇشىن باسىم باسقا دا سالالاردى دامىتۋداعى پەرسپەكتيۆالار, جالپى ايماقتىق ءونىمدى ارتتىرۋ, قوسىمشا شەتەلدىك ينۆەستيتسيا تارتۋ, جاڭا جۇمىس ورىندارىن قۇرۋ, سونداي-اق, ايماقتا ونەركاسىپتى دامىتۋعا جاعداي جاساۋ كۇتىلىپ وتىر.
«ءبىز ەڭ ءىرى قازاقستاندىق يننوۆاتسيالىق كومپانيالاردىڭ ءبىرى – Allur Group-قا ينۆەستيتسيا تارتۋ ءۇشىن مەموراندۋمعا قول قويدىق. قوستانايدىڭ يندۋستريالىق ايماعىنىڭ اياسىندا جەرگىلىكتى اۆتوكولىك ءوندىرىسىن ارى قاراي ارتتىرۋ ءۇشىن بىرلەسىپ جۇمىس ىستەيمىز. بۇل – تولىق ورىندالاتىن مىندەت. مىسالى, SsangYong Nomad ماركالى اۆتوموبيلدەردىڭ وتاندىق بولىكتەرى بۇگىننىڭ وزىندە شامامەن 40 پايىزعا جەتتى, كوممەرتسيالىق مودەلدەردە بۇل دەڭگەي 50 پايىزعا جەتەدى. ءبىزدىڭ قازاقستاندا وندىرىلەتىن قوسالقى بولشەكتەردىڭ سانىن ارتتىرماقپىز. وسىلايشا ءبىزدىڭ ەلىمىزدە شىعارىلاتىن اۆتوموبيلدەردىڭ قازاقستاندىق بولىگىن ارتتىرساق دەيمىز», – دەدى Alatau Invest Capital-دىڭ باسقارۋشى سەرىكتەسى قايرات ساتىبالدى ۇلى.
Allur Group ديرەكتورلار كەڭەسىنىڭ توراعاسى اندرەي لاۆرەنتەۆتىڭ ايتۋىنشا, كومپانيا 2018 جىلدان باستاپ قوستانايدىڭ يندۋستريالىق ايماعىنىڭ اياسىندا, سونىڭ ىشىندە ەكسپورتقا شىعارۋ ءۇشىن جىلىنا 40 مىڭ اۆتوموبيل قۇراستىرۋدى جوسپارلاپ وتىر.
«ءبىزدىڭ ەسەبىمىز بويىنشا, 2022 جىلعا دەيىن ءونىم شىعارۋدىڭ ورتاق كولەمى 700 ملرد.-تان استام تەڭگەنى قۇرايدى. ونىڭ ىشىندە 7 جىلدىڭ ىشىندە تەك ەكسپورت شامامەن 418 ملرد. تەڭگەنى قۇرايدى. ايقىندالعان جوسپارلاردى ىسكە اسىرۋ ءۇشىن 500-دەن استام جاڭا بىلىكتى جۇمىس ورنىن قۇرۋ قاجەت بولادى. ال جەرگىلىكتى ءوندىرىس دەڭگەيى 50 پايىزعا جەتەدى», – دەيدى اندرەي لاۆرەنتەۆ.
مەموراندۋمعا قول قويۋ شاراسىنا قاتىسقان قوستاناي وبلىسىنىڭ اكىمى ارحيمەد مۇحامبەتوۆ ينۆەستيتسيا تارتۋ بويىنشا مەموراندۋم زاۋىت جۇمىسىنا جاڭا سەرپىن بەرەتىنىن ايتتى.
«ءبىزدىڭ وبلىسىمىزدا قارقىندى دامىپ كەلە جاتقان ونەركاسىپ سالالارىنىڭ ءبىرى – اۆتوموبيل جاساۋ. يندۋستريالاندىرۋ باعدارلاماسى بويىنشا وبلىستا 81 ينۆەستيتسيالىق جوبا, سونىڭ ىشىندە اۆتوموبيل جاساۋدا 4 جوبا ىسكە اسىرىلدى. Allur Group زاۋىتتارى ايقىن تۇراقتى دامىپ كەلەدى. ول ءوندىرىستى رەتكە كەلتىرىپ, اۆتوموبيل جاساۋدى دامىتۋدا ينۆەستيتسيا تارتىپ قانا قويماي, بۇكىل ايماقتىڭ قولايلى دامۋىنا جاعداي جاساۋدا», – دەدى وبلىس اكىمى.
بارلىق جوعارىدا اتالعان جوبالاردى جۇزەگە اسىرۋ كەدەن وداعى ەلدەرىندە عانا ەمەس, سونىمەن قاتار حالىقارالىق ارەنادا اۆتوموبيل جاساۋ سالاسىندا قازاقستاننىڭ باسەكەگە قابىلەتتىلىگىن ارتتىرۋعا باعىتتالعانىن اتاپ وتكەن ءجون.
ەلامان قوڭىر.
دەرەك, سۋرەت: egemen.kz.
