قازاقستان مەن جاپونيانىڭ يادرولىق سىناقتارعا جاپپاي تىيىم سالۋ تۋرالى شارتتىڭ (ياسجتش) كۇشىنە ەنۋىنە تەزىرەك قول جەتكىزۋ جونىندەگى بىرلەسكەن
- ۆاشينگتوندا يادرولىق قاۋىپسىزدىك جونىندەگى ءسامميتتىڭ (ياقس) وتۋىنە وراي ءبىز, قازاقستان مەن جاپونيا, يادرولىق قارۋدان ادا الەم قالىپتاستىرۋ تۋرالى ۇستانىمىمىزدى تاعى دا قۋاتتايمىز جانە مۇنى ادامزاتتىڭ ءححى عاسىرداعى ەڭ باستى ماقساتى دەپ ەسەپتەيمىز.
- بيىل يادرولىق سىناقتارعا جاپپاي تىيىم سالۋ تۋرالى شارتتىڭ (ياسجتش) قول قويۋ ءۇشىن اشىق دەپ تانىلۋىنىڭ 20 جىلدىعى جانە قازاقستانداعى سەمەي يادرولىق پوليگونىنىڭ جابىلۋىنىڭ 25 جىلدىعى ەكەندىگىن ەسكەرە وتىرىپ, ءبىز يادرولىق قارۋ جويىلعانعا دەيىن ونى قولدانباۋ ايماعىنىڭ اياسىن كەڭەيتە بەرەمىز دەگەن شەشىمىمىزدى تاعى دا راستايمىز جانە ياسجتش-نىڭ تەزىرەك كۇشىنە ەنۋىنە قول جەتكىزۋ جولىنداعى اينىماس ۇستانىمىمىزدى تاعى دا قۋاتتايمىز.
- بۇگىندە ياسجتش-عا 183 مەملەكەت قول قويىپ, ونى 164 مەملەكەتتىڭ راتيفيكاتسيالاۋى ارقىلى شارت ءىس جۇزىندە امبەباپتىق سيپاتقا يە بولدى, ءبىز مۇنى قۇپتايمىز جانە شارتقا قول قويماعان نەمەسە ونى راتيفيكاتسيالاماعان بارلىق ەلدەردى بۇل ءىستى مۇمكىندىگىنشە تەزىرەك جاساۋعا شاقىرامىز. اتاپ ايتقاندا, ءبىز ياسجتش كۇشىنە ەنۋى ءۇشىن 2-قوسىمشادا كورسەتىلگەن, راتيفيكاتسياسى قاجەت قالعان 8 ەلدى شارتقا باسقا ەلدەردىڭ قوسىلۋىن كۇتپەستەن, بۇدان ءارى كەشىكتىرمەي قول قويۋعا جانە ونى راتيفيكاتسيالاۋعا شاقىرامىز.
- ءبىز ياسجتش-نىڭ كۇشىنە ەنۋىن كۇتە وتىرىپ, بارلىق مەملەكەتتەردى 1991 جىلعى تامىزدا سەمەي سىناق پوليگونىنىڭ جابىلۋىنا وڭ ىقپال ەتكەن ۇدەرىس – يادرولىق قارۋدى سىناقتان وتكىزۋگە جاريالانعان ءموراتوريدى بۇدان ءارى دە ساقتاۋعا شاقىرامىز.
- وسىعان وراي, سولتۇستىك كورەيانىڭ حالىقارالىق مىندەتتەمەلەردى بۇزىپ, 2006, 2009, 2013 جانە 2016 جىلدارى جۇرگىزگەن يادرولىق سىناقتارىن ءبىز قاتاڭ ايىپتايمىز جانە سولتۇستىك كورەيانى جاڭا يادرولىق سىناقتاردان باس تارتۋعا شاقىرامىز. ءبىز سولتۇستىك كورەيانى بىرىككەن ۇلتتار ۇيىمى قاۋىپسىزدىك كەڭەسىنىڭ ءتيىستى قارارلارىن, سونىڭ ىشىندە تاياۋداعى قارارىن (UNSC/RES/2270) جانە 2005 جىلعى 19 قىركۇيەكتەگى التىجاقتى كەلىسسوزدىڭ بىرلەسكەن مالىمدەمەسى اياسىنداعى مىندەتتەمەلەرىن تولىق ورىنداۋعا, سونداي-اق, دەنۋكلەاريزاتسيا جونىندە ناقتى شارالار قابىلداۋعا شاقىرامىز.
- ياسجتشۇ-نىڭ (يادرولىق سىناقتارعا جاپپاي تىيىم سالۋ تۋرالى شارت ۇيىمى) حالىقارالىق مونيتورينگ جۇيەسى (حمج) سولتۇستىك كورەيانىڭ 2016 جىلعى 6 قاڭتارداعى يادرولىق سىناعىنان سوڭ بىردەن ادەتتەن تىس سەيسميكالىق بەلگىلەردى بايقاعانىن ەسكەرە كەلىپ, ياسجتش باقىلاۋ رەجىمى ءوزىنىڭ تابىستى جۇمىس ىستەيتىنىن كورسەتكەنىن اتاپ ايتامىز جانە وسى ماڭىزدى رەجىمدى قولداۋ تۋرالى ۇستانىمىمىزدى تاعى دا راستايمىز.
