مەرەي مەن ماراپات

كەشە مادەنيەت جانە سپورت مينيسترلىگىندە اقش-تا وتكەن ءۇش حالىقارالىق جارىستان 14 مەدالدى قانجىعاعا بايلاپ قايتقان كاراتەشىلەرگە قۇرمەت كورسەتىلىپ, ولارعا مينيستر اتىنان گراموتالار مەن ەستەلىك سىيلىقتار تابىس ەتىلدى. «قازاقستاننىڭ تۋىن بيىكتە جەلبىرەتىپ, بايراقتى باسەكەدەن ولجالى ورالعان سپورتشىلارىمىزعا العىستان باسقا ايتارىمىز جوق. كىم ەڭبەكتەنسە, كىم تالپىنسا سول بيىك بەلەستى باعىندىرماي قويمايدى. سىزدەردىڭ بۇگىنگى جەڭىستەرىڭىز ەرەن ەڭبەكتىڭ جەمىسى دەپ بىلەمىن. جاس چەمپيونداردى شاقىرىپ, وسى­لاي ماراپاتتاۋىمىزدىڭ ماق­ساتى – ولاردىڭ قازاقستان سپورتىنا قوسىپ جاتقان ۇلەسىن ناسي­حاتتاۋ جانە سپورتپەن اينالىسىپ جۇرگەن باسقا بالالارعا وسىنداي بيىك جەتىستىكتەرگە جەتۋگە بولاتىندىعىن كورسەتۋ», – دەدى مادەنيەت جانە سپورت مي­نيسترلىگىنىڭ جاۋاپتى حاتشىسى قۋاتجان ۋاليەۆ. ايتا كەتەتىن تاعى ءبىر جايت, اقش-تىڭ لاس-ۆەگاس قالاسىندا كاراتە-دودان وتكەن ءۇش حالىقارالىق تۋرنير – Junior Championship, USA Open جانە Ozawa Cup جارىسىنان قازاقستاندىق سپورتشىلار ەنشىلەگەن 14 مەدالدىڭ ۇشەۋى التىن, التاۋى كۇمىس جانە بەسەۋى قولا ەكەنىن ەستەرىڭىزگە سالامىز. جالپى, بۇل حالىقارالىق دوداعا الەمنىڭ 40-تان استام ەلىنەن كەلگەن جاس سپورتشىلار قاتىسقان بولاتىن. «امەريكا قۇراما شتاتىندا وتكەن بۇل جارىس مەن ءۇشىن ما­ڭىزدى جارىستاردىڭ ءبىرى بولىپ سانالادى. سەبەبى, بۇل سايىسقا ەڭ مىقتى سپورتشىلار قاتىسىپ, باقتارىن سىنايدى. مەنىڭ سال­ماعىمدا وسالدار بولعان جوق. بىراق مەن ءوزىمنىڭ باپكەرلەرىم­نىڭ جاتتىقتىرۋىمەن جانە دە جان-جاقتى دايىندىعىمنىڭ ارقاسىندا قارسىلاستارىمدى تىزە بۇكتىرىپ, تەك سوڭعى فينالدىق سايىستا برازيليالىق سپورتشىعا ەسە جىبەرىپ الدىم. وسى جولعى قاتەلىكتەرىمدى الداعى الامانداردا قايتالاماۋعا تىرىسامىن», – دەدى اتالمىش جارىستا ەكىنشى ورىندى ەنشىلەگەن الىشەر قابدۋللاەۆ. راۋان قايدار, «ەگەمەن قازاقستان».