سۋرەت: kaz.inform.kz
ەلىمىزدەگى جالپىحالىقتىق ساياسي ناۋقاندا مۇمكىندىگى شەكتەۋلى ازاماتتار ەركىن ءارى كەدەرگىسىز داۋىس بەرەدى. ماسەلەن, كورۋ جانە ەستۋ قابىلەتى بۇزىلعان جاندارعا برايل قارپىندەگى ترافارەتتەر, اۋديوبيۋللەتەندەر مەن سۋردواۋدارمالى اقپاراتتىق ماتەريالدار ۇسىنىلادى.
«بارلىق سايلاۋدا مۇگەدەكتىگى بار ادامدارعا ەرەكشە مۇمكىندىك جاساۋدى نازاردان شىعارمايمىز. قازىرگى تاڭدا ترافارەتتەردى دايىنداۋ جانە باسىپ شىعارۋ جۇمىستارى جۇرگىزىلىپ جاتىر. ولار بارلىق رەفەرەندۋم ۋچاسكەسىنە جەتكىزىلەدى. سونداي-اق ءار ۋچاسكەدە بيۋللەتەندەردى تولتىرۋ تۋرالى ارنايى اۋديو نۇسقاۋلىق قاراستىرىلعان», دەدى ورتالىق رەفەرەندۋم كوميسسياسىنىڭ توراعاسى نۇرلان ءابدىروۆ.
جيىندا ورتالىق رەفەرەندۋم كوميسسياسىنىڭ مۇشەسى ءلاززات سۇيىندىك ۋچاسكەلەر ءبىرىنشى قاباتتا ورنالاساتىنىن ايتتى. سونداي-اق ولار مۇمكىندىگى شەكتەۋلى ازاماتتار ءۇشىن پاندۋستار, كىرەبەرىستەگى شاقىرۋ باتىرمالارى, اۆتوكولىكتەرگە ارنالعان ارنايى تۇراق ورىندارى, تاكتيلدى جولاقتار مەن ارنايى بەيىمدەلگەن كابينالارمەن جابدىقتالادى. ياعني سايلاۋ ۋچاسكەلەرى ۇلكەيتكىش, قۇلاققاپ, تىرەك-قيمىل اپپاراتى بۇزىلعان ازاماتتاردىڭ قولجەتىمدىلىگى ەسكەرىلگەن داۋىس بەرۋ بۇرىشتارىمەن قامتاماسىز ەتىلەدى.
«بارلىق داۋىس بەرۋ ۋچاسكەسىندە كونستيتۋتسيا جوباسىنىڭ ءماتىنىن اۋديو سۇيەمەلدەۋمەن ورنالاستىرۋ مۇگەدەكتىگى بار ادامدار ءۇشىن قولجەتىمدىلىكتى قامتاماسىز ەتۋگە باعىتتالعان جاڭا ءتاسىل سانالادى. وعان قوسا بارلىق دەڭگەيدەگى رەفەرەندۋم كوميسسيالارىنىڭ مۇشەلەرىنە مۇگەدەكتىگى بار ازاماتتاردىڭ سايلاۋ قۇقىقتارىن قامتاماسىز ەتۋ ماسەلەلەرى بويىنشا بەينەكۋرس ۇيىمداستىرىلعان. بۇگىندە 85 پايىزى كۋرستان ءوتتى. اقپان ايىنىڭ اياعىنا قاراي بۇل كورسەتكىش 100 پايىزعا جەتكىزىلەدى», دەدى ل.سۇيىندىك.
وتىرىستا 17 وبلىس پەن 3 رەسپۋبليكالىق ءمانى بار قالالارداعى احۋال دا تىڭدالدى. ماسەلەن, اقمولا وبلىسىندا داۋىس بەرەتىن 2 752 مۇگەدەكتىگى بار ازامات انىقتالعان. مۇمكىندىگى شەكتەۋلى ازاماتتاردى تاسىمالداۋعا وبلىس ورتالىعىندا 5 ارنايى كولىك, اۋداندار مەن اۋىلدىق وكرۋگتەردە 11 كولىك بولىنگەن.
«737 ۋچاسكە تەكسەرىلدى. 642 ۋچاسكە پاندۋستارمەن جابدىقتالعان, 561 ۋچاسكەدە باعىتتاۋشى جانە تاكتيلدى كورسەتكىشتەر ورناتىلعان, بارلىق ۋچاسكەدە كرەسلو-اربامەن قوزعالاتىن ازاماتتارعا قولجەتىمدى ارنايى كابينالار قاراستىرىلعان, 700 ۋچاسكەدە مۇگەدەكتىگى بار ادامدارعا ارنالعان ارنايى بۇرىشتار جابدىقتالعان. سونداي-اق 85 ۋچاسكەدە 16 سۋردواۋدارماشى قىزمەت كورسەتەدى. داۋىس بەرۋ كۇنى الەۋمەتتىك قىزمەتكەرلەردى تارتۋ ماسەلەسى دە تولىق پىسىقتالعان», دەدى اقمولا وبلىسى اكىمى اپپاراتىنىڭ باسشىسى ەرجان جۇمابەكوۆ.
جالپى رەفەرەندۋم رەسپۋبليكا اۋماعىنداعى 10 411 ۋچاسكەدە وتكىزىلەدى. ونىڭ ىشىندە ەلىمىزدىڭ شەت مەملەكەتتەرىندەگى وكىلدىكتەرى جانىندا قۇرىلعان 62 ۋچاسكە بار. داۋىس بەرۋ ۋاقىتى ساعات 7.00-دەن 20.00-گە دەيىن جۇرەدى.
«دەنساۋلىق جاعدايىنا نەمەسە وزگە دە دالەلدى سەبەپتەرگە بايلانىستى ۋچاسكەگە كەلە المايتىن ازاماتتار 15 ناۋرىز كۇنى ساعات 12.00-گە دەيىن جازباشا ءوتىنىش بەرە الادى. بۇل جاعدايدا ۋچاسكەلىك كوميسسيا كەمىندە ەكى مۇشەسىن جانە تاسىمالداناتىن جاشىكتى جىبەرۋ ارقىلى ازاماتتىڭ تۇرعان جەرىندە داۋىس بەرۋدى ۇيىمداستىرادى. داۋىس بەرۋ قۇپياسى تولىق ساقتالۋعا ءتيىس», دەدى ورتالىق رەفەرەندۋم كوميسسياسىنىڭ مۇشەسى ازامات ايماناكۋموۆ.
ايتا كەتەيىك, تۇراقتى تىركەلگەن جەرىنەن الىنىپ تاستالعان نەمەسە ەش جەردە تىركەۋدە بولماعان ازاماتتاردىڭ سايلاۋ قۇقىقتارىن ىسكە اسىرۋ ماقساتىندا ازاماتتارعا داۋىس بەرۋ كۇنى ۋچاسكە ورنالاسقان ءۇي-جايدا ۋاقىتشا تىركەلۋ مۇمكىندىگى بەرىلەدى.
