قىتايدا سوتتالعان قازاقستاندىقتار ەلگە قايتارىلدى

استانا. 1 ءساۋىر. قىتايدا سوتتالعان قازاقستاننىڭ ەكى ازاماتى ەلگە قايتارىلدى. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى. شەتەلدەگى قازاقستان ازاماتتارىنىڭ قۇقىقتارىن قورعاۋ ماقساتىندا قازاقستان رەسپۋبليكاسىنىڭ باس پروكۋراتۋراسى مەن ىشكى ىستەر مينيسترلىگىنىڭ قىزمەتكەرلەرى, سىرتقى ىستەر مينيسترلىگىنىڭ جانە قازاقستاننىڭ قىتاي حالىق رەسپۋبليكاسىنداعى ەلشىلىگىنىڭ قولداۋىمەن ەسىرتكى كونترابانداسى ءۇشىن ءتۇرلى جازا مەرزىمدەرى بويىنشا قىتايدا سوتتالعان ءبىزدىڭ ەلدىڭ ەكى ازاماتشاسى بەيجىڭ قالاسىنان جەتكىزىلدى. قىتاي تاراپىنىڭ قۇزىرلى ورگاندارى سوتتالعانداردى قازاقستانعا بەرۋ تۋرالى شەشىمدى 2011 جىلدىڭ 22 اقپانىنداعى قازاقستان رەسپۋبليكاسى مەن قىتاي حالىق رەسپۋبليكاسى اراسىنداعى شارتتى ىسكە اسىرۋ ماقساتىندا جانە سوتتالعانداردىڭ وتىنىشتەرى نەگىزىندە قابىلدادى. بەرىلگەن تۇلعالارعا قاتىستى قىتاي سوتىنىڭ ۇكىمىن تانۋ جانە ورىنداۋ تۋرالى كەپىل نەگىزىندە قىتاي حالىق رەسپۋبليكاسى قۇزىرلى ورگاندارىنا قازاقستان سوتىنىڭ ءتيىستى قاۋلىلارى جولداندى. بەرىلگەن تۇلعالار جازالارىنىڭ قالعان مەرزىمدەرىن قازاقستان رەسپۋبليكاسىنىڭ ۇلتتىق زاڭناماسىنا سايكەس قازاقستاننىڭ تۇزەۋ مەكەمەلەرىندە وتەيتىن بولادى. ايان ءابدۋالي. دەرەك: باس پروكۋراتۋرانىڭ ءباسپاسوز قىزمەتى فوتو: new.pavlodarnews.kz.