پاريج تورىندەگى ناۋرىز

پاريجدە بىرىككەن ۇلتتار ۇيىمىنىڭ ءبىلىم, عىلىم جانە مادەنيەت جونىندەگى ۇيىمىنىڭ (يۋنەسكو) شتاب-پاتەرىندە ازەربايجان مەن اۋعانستاننىڭ, ءۇندىستان مەن يراننىڭ, يراك پەن قازاقستاننىڭ, پاكىستان مەن تاجىكستاننىڭ, تۇرىكمەنستان مەن تۇركيانىڭ تۇراقتى وكىلدىكتەرى حالىقارالىق ناۋرىز كۇنىنە ارنالعان ءىس-شارا ۇيىمداستىردى. يۋنەسكو باس ديرەكتورىنىڭ ورىنباسارى نادا ءال-ناشيف ءوز سوزىندە «ناۋ­رىزدى مادەني ارالۋاندىق, ءوزارا سىيلاستىق پەن ۇندەسۋدىڭ تاماشا مەيرامى», دەپ ايتا كەلە بۇۇ ونىڭ ماڭىزىن حالىقارالىق مەيرام رەتىندە جاريالاۋ جانە يۋنەسكو-نىڭ ادامزاتتىڭ ماتەريالدىق ەمەس مادەني مۇراسى جونىندەگى كورنەكى تىزىمىنە ەنگىزۋ ارقىلى تانىعانىنا نازار اۋداردى. ءىس-شاراعا جينالعان قوناقتار – حالىقارالىق ۇيىمداردىڭ, عىلىم مەن مادەنيەت جانە ونەر سالالارىنىڭ وكىلدەرى ۇلتتىق تاعامداردان, سونىڭ ىشىندە قازاق تاعامىنان دا ءدام تاتتى. جيىن بارىسىندا قازاقستان حال­قى­نىڭ مادەني مۇراسى, ونەرى جانە ءداستۇرى جونىندەگى باسپا ونىمدەرى مەن يلليۋستراتسيالىق ماتەريالدار تاراتىلدى. ۇيىمداستىرۋشىلار تاراپىنان ءسوز العان يران ەلشىسى احماد دجالالي جارقىن مەيرامعا ارنالعان سالتاناتتىڭ يۋنەسكو تورىندە داستۇرگە اينالعانىن اتاپ ءوتتى. اعىمداعى جىلعى جەلتوقساندا يۋنەسكو-نىڭ ماتەريالدىق ەمەس مادەني مۇرانى قورعاۋ جونىندەگى كوميتەتى ازەربايجان, اۋعانستان, ءۇندىستان, يران, يراك, قازاقستان, قىرعىزستان, پاكىس­تان, تاجىكستان, تۇرىكمەنستان, تۇركيا جانە وزبەكستان – 12 ەلدىڭ اتىنان جاڭارتىلعان «ناۋرىز» مەيرامى اتالىمىن ادامزاتتىڭ كورنەكى تىزىمىنە ەنگىزۋ مۇمكىندىگىن قاراس­تىراتىن بولادى دەپ كۇتىلۋدە. «ەگەمەن-اقپارات».