قازاقتىڭ كيىز ۇيلەرى

رەسەيدىڭ تورىندە مەيمانحانا بولىپ ەسىك اشتى رەسەيدىڭ ورتالىق ايماق­تارىنىڭ ءبىرى بولىپ سانالاتىن نيجني نوۆگورود وبلىسىندا قازاقتىڭ كيىز ۇيلەرىنەن قۇرالاتىن مەيمانحانا كەشەنى كەلۋشىلەرگە ەسىگىن ايقارا اشتى. ونى مۇندا قازاقستاننان كوشىپ كەلگەن الەكسەي جانە پاۆەل نىسپىلى ەكى وفيتسەر جاساپتى. قالىڭ جۇرتشىلىق ەجەلگى نوۆگورود جەرىندە وسىنداي ءبىر قۇت­تى قونىستىڭ قاتارعا قوسىلىپ جاتقانىن رەسەيلىك بلوگەر اننا ۆينگۋرتتىڭ الەۋمەتتىك جەلىلەردە تاراتقان اقپارىنان كەيىن ءبىلدى. ول ءوزىنىڭ جەكە پاراقشاسىنا «بۇل قازاقستان ەمەس! ءبىز نيجني نوۆ­گورود وبلىسىنىڭ بور اۋدانىندامىز. بۇل شىنىندا – ادام سەنگىسىز نارسە», دەپ جازدى. اننانىڭ ايتۋىنشا, ۇياداي جىپ-جىلى قاراشا ۇيلەر كيىز­دەن جانە قامىستان جاسالعان ءتو­سەنىشتەن تۇرادى. مۇنداعى اۋدانى 23 شارشى مەتردى الاتىن كيىز ۇيلەر ادامدار تۇرۋ ءۇشىن تىگىلسە, 73 شارشى مەتردى الاتىن كەلەسى بولىگى 60 ورىندىق بانكەت زالى ەسەبىندە بوي كوتەرگەن. «الەكسەي سۋعا شومىلىپ العىلارى كەلەتىندەر ءۇشىن قويىلعان ۇلكەن استاۋ ىدىستىڭ قالاي جىلىتىلاتىنىن ءتۇسىندىرىپ بەردى. وندا ورىس مونشاسى دا بار. سوسىن ءوزى دايىنداعان پالاۋدى الدىمىزعا جايىپ سالدى. پالاۋدىڭ ەتىن دە وزدەرى ازىرلەيدى ەكەن. ولاردىڭ فەرماسىندا 500 قويى باعىلىپ جاتىر», دەپ  اتاپ كورسەتەدى اننا ۆينگۋرت. الەكسەي مەن پاۆەل نوۆگورود جەرىنە كيىز ۇيلەردى قازاقستاندا ارنايى جاساتتىرىپ اكەلگەن ەكەن. قازىر تۋريستىك فيرمالار وسى كيىز وتەلىنە تۋريستەر اكەلىپ تۇراتىن كورىنەدى. مۇرات ايتقوجا.