جامبىل وبلىسىندا 6 جاسار بالانى ولتىرگەن كۇدىكتىنىڭ ءىسى سوتقا ءتۇستى

استانا. 31 ناۋرىز. جامبىل وبلىسى, بايزاق اۋدانىنا قاراستى بۋرىل (روۆنوە) اۋىلىندا 6 جاسار بالانىڭ ولىمىنە كۇدىكتى رەتىندە ۇستالعان 18 جاسار ازاماتقا قاتىستى قىلمىستىق ءىس سوتقا جەتكىزىلدى. بۇل تۋرالى ras.kz-كە سىلتەمە جاساعان egemen.kz ءتىلشىسى حابارلادى. مۇنى جامبىل وبلىسى قىلمىستىق ىستەر جونىندەگى مامانداندىرىلعان اۋدانارالىق سوتىنداعىلار راستاپ وتىر. وقيعا ۇستىمىزدەگى جىلعى 15 اقپان كۇنى ورىن الدى. وسى كۇنى كەشكى ساعات 17:00 شاماسىندا اتالعان اۋىلداعى جەكەمەنشىك ۇيدە كامەلەتتىك جاسقا جەتپەگەن ا.س.دۇيسەنبەكتىڭ زورلىقپەن ولتىرىلگەن بەلگىلەرى بار دەنەسى تابىلدى. اتالعان فاكتى نەگىزىندە قىلمىستىق كودەكسىنىڭ 99-بابى 2-ءبولىمى 14-تارماقشاسى (كامەلەتتىك جاسقا جەتپەگەندى ادەيى ءولتىرۋ) بويىنشا قىلمىستىق ءىس قوزعالدى كەلەسى كۇنى ءوز كىناسىن مويىنداعان ك. ەسىمدى كۇدىكتى ازامات ۇستالىپ, ۋاقىتشا وقشاۋلاعىشقا قامالدى. قىلمىس قايتىس بولعان بالانىڭ وتباسىنىڭ مۇلكىن ۇرلاۋ ىسىنە بايلانىستى بولعانىن, ياعني تۇرمىستىق سيپاتتا ەكەنى انىقتالدى. «قىلمىستىق ءىس سوتقا ءتۇستى, سۋديا ازامات تىلەپوۆكە بەرىلدى. 1998 جىل تۋعان دۋرسۋن كاۆازوگلى قىلمىستىق كودەكستىڭ 99-بابى, 2-ءبولىمى («ادام ءولتىرۋ») بويىنشا تەرگەلۋدە. ءىستى قاراۋ مەرزىمى ءالى انىقتالعان جوق. ول قاماۋدا وتىر», – دەدى اگەنتتىككە حابارلاۋشى تەلەفون ارقىلى. تالعات رايىمبەك. دەرەك: ras.kz. فوتو: mng.sud.kz.