شەكارادان جەراستى جولى تابىلدى

استانا. 31 ناۋرىز. قىرعىزستاننىڭ باتكەن وبلىسىنىڭ اۋماعىنداعى شەكارا سىزىعى بويىنان جەراستى جولى تابىلدى. بۇل تۋرالى ras.kz-كە سىلتەمە جاساعان egemen.kz ءتىلشىسى حابارلادى. قىرعىزستان مەن وزبەكستان اۋماقتارىن جالعاپ جاتقان تەسكەنتاۋدى قىرعىز شەكاراشىلارى تاۋىپ الدى. حابارلانعانداي, تۋننەل قىرعىزستان جاعىنان قازىلعان. ول باتكەن وبلىسى, كادامجاي اۋدانى, كىرگىز-كيلاك ايىلىنداعى ءبىر تۇرعىن ۇيدەن وزبەكستاننىڭ فەرعانا وبلىسى, ولتىارىك اۋدانىنداعى بوربالىك قيشلوعىنداعى كەلەسى تۇرعىن ۇيگە قاراي تارتىلعان. ناۋرىزدىڭ 25-ءى كۇنى قىرعىزستان مەملەكەتتىك شەكارا قىزمەتىنىڭ توراعاسى رايمبەردي دۋيشەنبيەۆ پەن وزبەكستان ۇلتتىق قاۋىپسىزدىك قىزمەتى شەكارا اسكەرلەرىنىڭ قولباسشىسى رۋستام ەمينجانوۆ «كىزىل-كيا-اۆتوجول» قابىلداۋ-وتكىزۋ بەكەتىندە وتكىزىلگەن كەزدەسۋدىڭ شەڭبەرىندە اتالعان تۋننەلمەن تانىستى. جەراستى جولىنىڭ تەرەڭدىگى 7-8 مەتر بولسا, ۇزىندىعى 110 مەتردى قۇرايدى. تالعات رايىمبەك. دەرەك: ras.kz. فوتو: abai.kz.