وزبەكستاندا دراماتۋرگتەر گۇلنار كاريموۆادان اقشالارىن الاتىن بولدى

استانا. 31 ناۋرىز. وزبەكستاندا گۇلنار كاريموۆانىڭ ءىسى بويىنشا «قاتىرىلىپ قويىلعان» اقشالاردى دراماتۋرگتەرگە قايتارىپ بەرۋ جونىندە شەشىم قابىلداندى. بۇل تۋرالى ras.kz-كە سىلتەمە جاساعان egemen.kz ءتىلشىسى حابارلادى. «وزبەكستاننىڭ بىرقاتار دراماتۋرگتەرى باس پروكۋراتۋرانىڭ تالابىمەن وزبەكستاندا كوتەرىلگەن پرەزيدەنتتىڭ ۇلكەن قىزى گۇلنار  كاريموۆاعا قاتىستى قىلمىستىق ءىس شەڭبەرىندە «اۆتورلار مەن ورىنداۋشىلار گيلدياسىندا» «قاتىرىلىپ تاستالعان» قالاماقىلارىن الاتىن بولدى», – دەلىنگەن حابارلامادا. «وزودليك» («ازاتتىقتىڭ» وزبەك رەداكتسياسى) مانبەسىنىڭ ايتۋىنا قاراعاندا, وزبەكستان مادەنيەت جانە سپورت مينيسترلىگى, وزبەكستان ۇلتتىق تەاترى وسى قالاماقىلار جونىندەگى قارىزدارىن تولەپ تە ۇلگەرگەن. ال مۋقيمي اتىنداعى تەاتر قارىزدارىن قايتارۋدى ءساۋىردىڭ باسىنان باستايدى. وتكەن ايدا 70 جاستاعى دراماتۋرگ يسفانديار (يسكاندار كيمسانوۆيچ ماتكاريموۆ) ەلدىڭ باسشىسىنا اشىق حات جازىپ, ءوزىنىڭ وزبەكستان تەاترلارىندا قويىلعان دراماتۋرگيالىق تۋىندىلارى ءۇشىن قالاماقىسىن ءالى الا الماي جۇرگەنىن شاعىنعان ەدى. ەسكە سالا كەتەيىك, وتكەن جىلعى قىركۇيەكتە دراماتۋرگ يسفانديار «وزبەكتەاتر» شىعارماشىلىق وندىرىستىك بىرلەستىگىنىڭ جەتەكشىسىمەن كەزدەسۋ كەزىندە اۆتورلار قالاماقىلارىن «قاتىرىپ تاستاۋ» تۋراسىندا تاعى ءسوز قوزعادى. دراماتۋرگتىڭ ايتۋىنشا, ول ءۇش جىلدان بەرى ءوزىنىڭ قالامقاسىن الا الماي كەلە جاتقان. حابارلانعانداي, دراماتۋرگتەر قالاماقىلارى باس پروكۋراتۋرانىڭ تاپسىرماسى بويىنشا بەرىلمەي قويعان. «گۇلنار كاريموۆا مەن وعان جاقىن جۇرگەندەرگە قاتىستى قوزعالعان قىلمىستىق ءىستىڭ شەڭبەرىندە وزبەكستان باس پروكۋراتۋراسى مەن ادىلەت مينيسترلىگى گيلديانىڭ ەسەپشوتىن جاۋىپ تاستاعان. بۇل ەسەپشوتتاردا وزبەك دراماتۋرگتەرىنىڭ, سونىڭ ىشىندە ماتكاريموۆتىڭ الاشاق اقشالارى بولعان. گيلديا ەكى جىل بۇرىن جابىلدى. قىلمىستىق ءىس اياقتالدى. گيلديانىڭ ەسەپشوتىندا قالعان اقشالار قارجى مينيسترلىگىنىڭ قاراۋىنا جىبەرىلدى. قازىر سول اقشالار «وزبەكتەاتر» بىرلەستىگىنە قايتارىلىپ, قالاماقى تولەنە باستادى», – دەدى مانبە. تالعات رايىمبەك. دەرەك: ras.kz. فوتو: kapital.kz.