اقش پرەزيدەنتى پوروشەنكومەن كەزدەسۋدەن باس تارتتى

استانا. 31 ناۋرىز. اقش پرەزيدەنتى باراك وباما ءوزىنىڭ ۋكراينانى قولدايتىنىن اشىق بىلدىرمەۋ ءۇشىن پەتر پوروشەنكومەن كەزدەسۋدى قاجەت ەمەس دەپ تاپتى. بۇل تۋرالى ras.kz-كە سىلتەمە جاساعان egemen.kz ءتىلشىسى حابارلادى. ۋكراينا پرەزيدەنتى پەتر پوروشەنكو اقش-قا جۇمىس ساپارى بارىسىندا اق ءۇي قوجايىنىڭ وزىمەن كەزدەسكىسى كەلمەۋىنە بايلانىستى ونىمەن اڭگىمەلەسۋ قۇرمەتىن الا المايتىن بولدى. مۇنى ۋكراينا سىرتقى ىستەر ءمينيسترى ۆاديم پريستايكو وكىنىشپەن جەتكىزدى. «ەكى پرەزيدەنتتىڭ بۇل كەزدەسۋى ۋكرايناعا رەسەيمەن تەكەتىرەسىپ تۇرعان كەزدە قولداۋ كورسەتكەندەي بولار ەدى», – دەگەن وكىنىش بىلدىرەدى ول. ۋكراينا پرەزيدەنتى پەتر پوروشەنكو مۇندا 1-2 ءساۋىر ارالىعىندا ۆاشينگتوندا وتەتىن يادرولىق قاۋىپسىزدىك جونىندەگى حالىقارالىق سامميتكە قاتىسۋ ءۇشىن كەلۋدى جوسپارلاستىرىپ وتىر. جۇمىس ساپارى كەزىندە ۋكراين ليدەرى اقش ۆيە-پرەزيدەنتى دجو بايدەنمەن, بۇۇ باس حاتشىسى پان گي مۋنمەن, نيدەرلاند پرەمەر-ءمينيسترى مارك ريۋتتەمەن, پولشا پرەزيدەنتى اندجەي دۋدامەن جانە ارگەنتينا پرەزيدەنتى ماۋريسيو ماكريمەن كەزدەسەدى. الايدا, ۋكراينا جاعىنىڭ جوسپارلاستىرىپ قويعاندارىنا قاراماستان, اقش پرەزيدەنتى باراك وبامانىڭ كەزدەسۋدەن باس تارتۋى كيەۆتىڭ ەڭسەسىن ءتۇسىرىپ جىبەرىپ وتىر. ۋكراينا جاعىن سونداي-اق, گەرمانيا كانتسلەرى انگەلا مەركەلدىڭ ءبىرازدان بەرى قانداي ءبىر ۇسىنىس ايتىلعانىنا قاراماستان, پوروشەنكومەن دە, ياتسەنيۋكپەن دە كەزدەسۋدەن باس تارتىپ كەلە جاتقانى قاتتى مازاسىزداندىرىپ ءجۇر. ايتا كەتۋ كەرەك, باراك وباما مۇنىڭ الدىندا تۇركيا پرەزيدەنتى رەدجەپ تايپ ەردوعانمەن كەزدەسۋدەن دە باس تارتقان بولاتىن. تالعات رايىمبەك. دەرەك: ras.kz. فوتو: 112.ua.