قوستاناي. 31 ناۋرىز. قازاقستان سۋرەتشىلەر وداعىنىڭ مۇشەسى بايان باتالوۆانىڭ 55 جاستىق مەرەيتويىنا ارنالعان «تۋعان جەر – التىن بەسىك» اتتى دەربەس كورمەسى اشىلدى. وندا قوستانايلىقتار باياننىڭ كەسكىندەمە, ءمۇسىن, گرافيكا جانە باتيكتە ورىندالعان 60-تان استام شىعارماسىن تاماشالادى. بۇل تۋرالى egemen.kz ءتىلشىسى حابارلادى.
مونۋمەنتالدى جانە ستانوكتى ءمۇسىن ونەرى سالاسىنداعى دارىندى سۋرەتشى-ءمۇسىنشى بايان باتالوۆانىڭ ەسىمى قوستانايلىقتارعا جاقسى تانىس. ول 1995 جىلدان بەرى سۋرەتشىلەر وداعىنىڭ مۇشەسى. وبلىس اكىمىنىڭ جانە قوستاناي مەتسەناتتار كلۋبى «قازىنا» سىيلىعىنىڭ يەگەرى. سونداي-اق, سۋرەتشى كسرو كوركەمسۋرەت اكادەمياسىنىڭ ي.ە.رەپين اتىنداعى لەنينگراد كەسكىندەمە, ءمۇسىن جانە ساۋلەت ينستيتۋتىندا جەتەكشى مۇسىنشىلەردەن ءدارىس الىپ, تاماشا كاسىبي دايىندىقتان وتكەن.
بايان باتالوۆانىڭ قوستاناي مەن وبلىس اۋداندارىنداعى بىرقاتار مونۋمەنتالدى جۇمىستارىنا جەرلەستەرى سۇيسىنە قارايدى. حVIII عاسىرداعى تاريحي تۇلعا, ورتا ءجۇزدىڭ ءبيى قاز داۋىستى قازىبەكتىڭ, قارابالىق پوسەلكەسىندەگى م.سەراليننىڭ ەسكەرتكىشى, قوستاناي مەملەكەتتىك ۋنيۆەرسيتەتىندەگى ا. بايتۇرسىنوۆتىڭ كەۋدە ءمۇسىنى جانە وسىنداي جۇمىستار باياننىڭ قولىنان شىققان. بۇكىلوداقتىق, حالىقارالىق, وبلىستىق جانە قالالىق كورمەلەردىڭ قاتىسۋشىسى بولعان ونىڭ شىعارمالارى الۋان تۇرلىلىگى جانە عاجايىپ ۇندەستىگىمەن ەرەكشەلەنەدى.
بايان باتالوۆانىڭ تۋىندىلارى قازاقستان سۋرەتشىلەر وداعىنىڭ 80 جىلدىعىنا ارنالعان «قازاق ونەرى» بەس تومدىق كىتابىنا جانە «ءمۇسىن. مونۋمەنتالدى-ساندىك ونەر» كىتابىنا ەنگەن.
كورمەنىڭ اشىلۋىندا ونىڭ تالانتىن قۇرمەتتەيتىن جۇرتشىلىق پەن قىلقالام ۇستاعان ارىپتەستەرى بايان جولدىبايقىزىنىڭ ەڭبەگىن جوعارى باعالادى, ىستىق تىلەكتەرىن ايتتى.
سۋرەتشى نيكولاي تورشين: «بايان ۇلكەن مەكتەپتەن, بەلگىلى ۇستازداردان ءبىلىم العان تالانتتى سۋرەتشى. ول ءار باعىتتا, ءار جانردا جۇمىس ىستەيدى. ەكىنىڭ ءبىرى ولاي ەتە المايدى. ماعان ونىڭ جيۆوپيستىك جۇمىستارى ەرەكشە ۇنايدى, ولار ومىردەن ويىپ العانداي اسەر ەتەدى », – دەدى.
ءنازيرا جارىمبەتوۆا.
دەرەك, فوتو: egemen.kz.
