جالعان ەلەكترشى زەينەتكەردى توناپ كەتتى

قوستاناي. 31 ناۋرىز. قوستانايدا پوليتسەيلەر جالعان ەلەكترشى بولىپ, تۇرعىنداردىڭ سەنىمىنە كىرىپ, پاتەر توناپ جۇرگەن 28 جاسار جىگىتتى ۇستادى. جالعان ەلەكترشىنىڭ سوڭعى قۇربانى 62 جاستاعى زەينەتكەر بولدى. بۇل تۋرالى وبلىستىق ىشكى ىستەر دەپارتامەنتى ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. پاتەر قوڭىراۋىن قاققان بوتەن جىگىت ەسىكتىڭ ار جاعىنان ءوزىن «ەلەكترشىمىن» دەپ تانىستىرىپ, ۇيدەگى جەلىلەردى تەكسەرەتىنىن ايتادى. وعان الاڭسىز سەنگەن قاريا پاتەرىنە كىرگىزەدى. بۇرىن سوتتالعان كۇدىكتى ايەلدىڭ نازارىن اۋلاپ تۇرىپ, ونىڭ 23 مىڭ تەڭگەسىن جىمقىرىپ كەتەدى. ەلەكترش» كەتىسىمەن اقشاسىنىڭ دا جوقتىعىن بايقاعان ايەل دەرەۋ پوليتسياعا حابار بەرەدى. پوليتسەيلەر ەسىكتىڭ ءار جەرىنەن وزدەرى كۇدىكتەنگەن ادام ساۋساعىنىڭ ءىزىن بايقايدى. سول كۇنى ۇرى ۇستالادى. ونىڭ ۇستىنەن قىلمىستىق كودەكستىڭ «ۇرلىق» بابى بويىنشا ءىس قوزعالدى. قازىر كۇدىكتىنىڭ باسقا دا ۇرلىقتارعا قاتىسىنىڭ بارلىعى تەكسەرىلىپ جاتىر. ءنازيرا جارىمبەتوۆا. دەرەك, فوتو: egemen.kz.