كاسىپكەرلىكتى دامىتۋعا ىقپالدى قولداۋ

استانا قالاسىنىڭ اكىمى ادىلبەك جاقسىبەكوۆ پەن «دامۋ» كاسىپكەرلىكتى دامىتۋ قورى» اق باسقارما توراعاسى قانىش تولەۋشين شاعىن جانە ورتا كاسىپكەرلىكتى قولداۋ باعدارلاماسىن ىسكە اسىرۋدا ىنتىماقتاستىق ورناتۋ تۋرالى مەموراندۋمعا قول قويدى. مەموراندۋم اياسىندا اكىمدىك پەن «دامۋ» قورى شاعىن جانە ورتا بيزنەس (شوب) سالاسىندا ستارتاپ-جوبالاردى قولداۋ جونىندەگى جاڭا باعدارلامانى جۇزەگە اسىرۋعا 2 ملرد. تەڭگە (ارقايسىسى 1 ملرد. تەڭگەدەن) بولەتىن بولدى. قارجى ەكىنشى دەڭگەيلى بانكتەر ارقىلى بەرىلمەك. كاسىپكەرلىكتىڭ جوعارى الەۋەتى كەز كەلگەن قالانىڭ ەكونوميكاسىنىڭ ىلگەرىلەۋىنىڭ باستى قوزعاۋشى كۇشى بولىپ تابىلادى. سوندىقتان استانا قالاسى اكىمدىگى قىزمەتىنىڭ باستى مىندەتتەرىنىڭ ءبىرى شاعىن جانە ورتا بيزنەستى دامىتۋ مەن قولداۋ بولىپ وتىر. بۇل مەموراندۋمعا استانا قالاسى اكىمدىگىنىڭ جانە «اتامەكەن» ۇلتتىق كاسىپكەرلەر پالاتاسىنىڭ ەلوردالىق شاعىن جانە ورتا بيزنەستى قارجىلاندىرۋ تۋرالى الدىن الا كەلىسىمى اياسىندا قول جەتكىزىلدى. قالادا كاسىپكەرلىك ورتانى جەتىلدىرۋ بويىنشا بارلىق قاجەتتى جاعدايلار جاسالۋدا. مەملەكەتتىك-جەكەمەنشىك ارىپتەستىك پرينتسيپتەرىمەن بيزنەس-احۋالدى جاقسارتۋ بويىنشا تۇراقتى جۇمىستار جۇرگىزىلۋدە. بۇگىنگى كۇنى استانانىڭ ءجوو-دەگى شوب-تىڭ ۇلەسى 61 پايىزعا جەتكەن. بۇل – جالپىرەسپۋبليكالىق كورسەتكىشتەن ءۇش ەسەگە ارتىق. استانا نەسيەلەردى كەپىلدەندىرۋ بويىنشا رەس­پۋبليكا بويىنشا ءبىرىنشى ورىندا, سۋبسيديالاۋ بويىنشا ەكىنشى ورىندا تۇر. سونىمەن قاتار, كاسىپكەرلىك سەكتورىندا سالىقتار ەسەبىنەن تۇسەتىن تۇسىمدەر دە وڭ ناتيجەسىن بەرۋدە. قازىرگى كەزدە قالالىق بيۋدجەتكە تۇسەتىن سالىقتىڭ 65 پايىزى ەلوردالىق شاعىن جانە ورتا بيزنەستىڭ ۇلەسىندە. شوب سالاسىندا ستارتاپ-جوبالاردى قولداۋ يدەياسىن استانا قالاسىنىڭ ۇلتتىق كاسىپكەرلەر پالاتاسى وتكىزگەن ءداستۇرلى كونفەرەنتسياسىندا ەلوردا باسشىسى ۇسىنعان بولاتىن. جاڭا باعدارلاماعا قولدانىستاعى مەملەكەتتىك باعدارلامالارعا قاتىسۋ ءۇشىن قىزمەتى ەكونوميكانىڭ باسىمدى سالالارىنىڭ تىزىمىنە ەنبەگەن كاسىپكەرلەر قاتىسا الادى. نەسيەنىڭ ەڭ كوپ سوماسى –50 ملن. تەڭگەگە دەيىن. سىياقى مولشەرلەمەسى – جىل­دىق 7,9 پايىز, نەسيە مەرزىمى – 7 جىل­عا دەيىن. جوبالاردى ىرىكتەۋدى وڭىرلىك كاسىپكەرلەر پالاتاسى جۇزەگە اسىرادى. وسى ورايدا ايتا كەتەتىن ماسەلە, قازىرگى كەزدە ەلوردادا شاعىن جانە ورتا بيزنەسكە قوسىمشا قولداۋ كورسەتۋ جانە دامىتۋ ماقساتىندا «دامۋ» قورىمەن بىرلەسىپ 29 جاسقا دەيىنگى تۇلعالار قاتىسا الاتىن جاس­تار كاسىپكەرلىگىن دامى­تۋ باعدارلاماسى مەن ساۋدا سالاسىن ماقساتتى نەسيەلەۋ بويىنشا باع­دارلامالار جۇزەگە اسىرىلۋدا. اتالعان باعدارلامالار بويىنشا قارجىنى يگەرۋ 100 پايىزدى قۇرادى, ولاردى جۇزەگە اسىرۋ جۇمىستارى ودان ءارى جالعاسادى. ۇلان سانجار.