اقتوبەدە رەسپۋبليكالىق بي بايقاۋى وتۋدە

اقتوبە. 30 ناۋرىز. اقتوبەدە تاۋەلسىزدىكتىڭ 25 جىلدىعىنا جانە وبلىستىق حالىق شىعارماشىلىعى ءۇيىنىڭ 55 جىلدىعىنا ارنالعان نۇرسۇلۋ تاپالوۆا اتىنداعى III رەسپۋبليكالىق «ءبيدىڭ نۇرى – نۇرسۇلۋ» جەكە ورىنداۋشىلار بي بايقاۋى وتۋدە. بۇل تۋرالى egemen.kz ءتىلشىسى حابارلادى. بي بايقاۋىن وبلىستىق مادەنيەت, مۇراعاتتار جانە قۇجاتتاما باسقارماسىنىڭ قولداۋىمەن وبلىستىق حالىق شىعارماشىلىعى ءۇيى ۇيىمداستىردى. بايقاۋدى ۇيىمداستىرۋدىڭ ماقساتى قازاقتىڭ بالەت ءبيشىسى, قازاق قسر-ءنىڭ ەڭبەك سىڭىرگەن ءارتىسى نۇرسۇلۋ تاپالوۆانىڭ شىعارماشىلىعىن ناسيحاتتاۋ, حورەوگرافيا ونەرىن جانە حالىقتىق بيلەردىڭ جەكە ورىنداۋشىلارىن وسكەلەڭ ۇرپاق پەن شىعارماشىل جاستار اراسىندا كەڭىنەن تانىستىرۋ بولىپ تابىلادى رەسپۋبليكالىق بايقاۋعا جاستارى 15-25 ارالىعىنداعى ەلىمىزدىڭ استانا, اتىراۋ, شىمكەنت, قىزىلوردا, اتىراۋ, سەمەي, تاراز, اقتاۋ, اقتوبە قالالارى مەن اقتوبە وبلىسىنىڭ ويىل اۋدانىنان 14 كاسىبي جانە اۋەسقوي بي ۇجىمدارىنىڭ جەكە ورىنداۋشىلارى قاتىسۋدا. بايقاۋ ەكى كەزەڭنەن تۇرادى. ءبىرىنشى, قاتىسۋشىلار حالىقتىق بي مەكتەبى بويىنشا تەحنيكالىق ادىستەرىن كورسەتەدى. ەكىنشى, قاتىسۋشى-بيشىلەر وزدەرىنىڭ تاڭداعان بيلەرىن بيلەيدى. قاتىسۋشىلاردى رەسپۋبليكا كولەمىندە حورەوگرافيا سالاسىنداعى جەتەكشى ماماندار باعالايدى. قازىلار القاسىنىڭ توراعاسى – استانا قالاسىنداعى «شالقىما» حالىق بي ءانسامبلىنىڭ كوركەمدىك جەتەكشىسى, مادەنيەت قايراتكەرى ابدراكۇل ەسەكەەۆ, مۇشەلەرى – اقتاۋ قالاسىنداعى اباي اتىنداعى مادەني-دەمالىس كەشەنىنىڭ «جورعا» بي مەكتەبى مەن حالىقتىق بي ءانسامبلىنىڭ كوركەمدىك جەتەكشىسى, ەڭبەك سىڭىرگەن قايراتكەر سەرىك ساريەۆ, قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ «ديدار» حالىقتىق بي ءانسامبلىنىڭ كوركەمدىك جەتەكشىسى, حورەوگرافيا كافەدراسىنىڭ مەڭگەرۋشىسى, دوتسەنت گۇلبانۋ مۋرزاباەۆا, اقتوبە وبلىستىق مادەنيەت, مۇراعاتتار جانە قۇجاتتاما باسقارماسىنىڭ باسشىسى قانات ايتباەۆ, اقتوبە وبلىستىق حالىق شىعارماشىلىعى ءۇيىنىڭ ديرەكتورى ورىنباسار تەرەكوۆ قاتىسۋشىلاردىڭ اكتەرلىك شەبەرلىگىن, كوركەمدىك-ستسەنالىق بەينەسىن, بي قوزعالىسىنىڭ مانەرى مەن ەرەكشەلىگىن سارالاۋدا. ساتىبالدى ءساۋىرباي. دەرەك: egemen.kz. سۋرەت: kargoo.gov.kz.