جاس تىلشىگە جاقسى مۇمكىندىك

كەشە «نۇر وتان» پارتياسىنىڭ قولداۋىمەن, «جۇلدىز» بالالار ۇيىم­دارى وداعىنىڭ, ل.ن.گۋميلەۆ اتىنداعى ەۋرازيا ۇلتتىق ۋني­ۆەرسيتەتىنىڭ جۋرناليستيكا ءجا­نە ساياساتتانۋ فاكۋلتەتىنىڭ, سونى­مەن بىرگە, ءبىلىم جانە عى­لىم مي­نيسترلىگىنىڭ بالالار قۇقىقتارىن قورعاۋ كوميتەتىنىڭ ۇيىمداستىرۋمەن «باقىتتى جۇلدىز استىندا» اتتى بالالار جانە جاستار بۇقارالىق اقپارات قۇرالدارى جاس تىلشىلەرىنىڭ ءحىى حالىقارالىق مەديافەستيۆالىنىڭ اشىلۋ سالتاناتى ءوتتى. شارانىڭ بيىلعى تاقىرىبى – «بالالار اق­پاراتتىق كەڭىستىگى: كاسىبي ءىس, شىعار­ماشىلىق رەسۋرستارى». مەديافەستيۆالدىڭ نەگىزگى ماقساتى – جاسوسپىرىمدەردىڭ ادام­گەرشىلىك-رۋحاني قۇندىلىق­تارىن بايىتا ءتۇسۋ, ازاماتتىق سانا-سە­زىمى بيىك, ۇلت تاعدىرىنا بەي-جاي قارامايتىن ۇرپاق قالىپتاستىرۋ. سونداي-اق, زاماناۋي الەمدىك اقپا­راتتىق ستاندارتتارعا سايكەس بالالار مەن جاس­تاردى بۇقارالىق اقپارات قۇرالدارى ارقىلى ەل ىسىنە ارالاسۋعا تاربيەلەۋ. «جۇلدىز» قوعامدىق ءبىر­لەس­تىگىنە كىرەتىن باق-تار مەن «بالا­لار اقپاراتتىق كەڭىستىگى: كاسىبي ءىس, شىعارماشىلىق رەسۋرستار» فورۋمى قاتىسۋشىلارىنىڭ كورمە-تۇساۋكەسەرى, «يۋنكور-2016» جانە «جاسمەدياKZ»: ەڭ ۇزدىك بالالار مەديا ورتالىعى» بايقاۋلارى, «ماڭگىلىك ەل» ۇلتتىق يدەياسى اياسىندا «قازاقستان جاستار ساياساتىنىڭ وزەكتى ماسەلەلەرى» تاقىرىبىنداعى مەملەكەتتىك ورگاندار, يۋنيسەف, «نۇر وتان» پارتياسى, «جاس وتان» جاستار قاناتى وكىل­دەرىنىڭ, كاسىبي جۋرناليستەردىڭ قاتىسۋىمەن وتەتىن بريفينگتەر, اقپاراتتىق مەنەدج­مەنت, اق­پاراتتىق رەسۋرستار نەگىزدەرى بويىنشا بولاشاق تىلشىلەرگە ارنالعان شەبەرلىك ساباق­تارى مەن شىعارماشىلىق لابوراتوريالار, جانە دە «الەم for you» قوعامدىق ءباسپاسوز ورتالىعىنىڭ جۇ­مى­سى – وسىنىڭ بارلىعى 28-31 ناۋ­رىز ارالىعىندا بولاتىن مەديا­فەس­تيۆالدىڭ اياسىندا وتەتىن ءىس-شارالار. ايتا كەتەتىن تاعى ءبىر جايت, اتالمىش فەستيۆالدەن اتى وزىپ دارا كەلگەن دارىندى جاس تىلشىلەر ل.ن.گۋميلەۆ اتىن­داعى ەۇۋ-ءدىڭ جۋرناليستيكا جانە ساياساتتانۋ فاكۋلتەتىنە وقۋعا شا­­قى­­رى­لادى. ال, «يۋنكور-2016» باي­قا­ۋى­نىڭ جەڭىمپازدارى «جۇلدىز» بالالار قوعامدىق ۇيىمىنىڭ باق رەداكتسيا­سىندا قىزمەت ەتۋگە مۇمكىندىك الادى. راۋان قايدار, «ەگەمەن قازاقستان».