مەملەكەت باسشىسى ۇلتتىق بانك توراعاسىن قابىلدادى

استانا. 28 ناۋرىز. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ۇلتتىق بانك توراعاسى دانيار اقىشەۆتى قابىلدادى. بۇل تۋرالى akorda.kz-كە سىلتەمە جاساعان egemen.kz ءتىلشىسى حابارلادى. كەزدەسۋ بارىسىندا دانيار اقىشەۆ مەملەكەت باسشىسىنا ۇلتتىق بانكتىڭ قازىرگى قىزمەتى, سونداي-اق, ەلدىڭ قارجى نارىعىنداعى احۋال تۋرالى باياندادى. قازاقستان پرەزيدەنتى قاراجاتتى قازىرگى ۋاقىتتا ۇلتتىق ۆاليۋتامەن ساقتاۋ حالىق ءۇشىن ءتيىمدى ەكەنىن ايتتى. «تەڭگە بويىنشا پايىزدىق مولشەرلەمە جوعارى, ال شەتەل ۆاليۋتاسىنداعى سالىمداردا ول الدەقايدا تومەن. ەلىمىزدەگى بارلىق ساتىپ الۋ, ساتۋ وپەراتسيالارى جانە ەڭبەكاقى تولەمدەرى ۇلتتىق ۆاليۋتامەن جۇزەگە اسىرىلادى. نەگىزگى تاۋارلاردىڭ باعاسى تۇراقتى. سوندىقتان قاراجاتتى تەڭگەمەن ساقتاۋ بارلىق جاعىنان ءتيىمدى. حالىقتىڭ ۇلتتىق ۆاليۋتاعا كوبىرەك دەن قويعانى ماڭىزدى», – دەدى نۇرسۇلتان نازارباەۆ. دانيار اقىشەۆ ناۋرىز ايىندا ۆاليۋتا نارىعىنداعى احۋال تۇراقتالعانىن اتاپ ءوتتى. «مۇناي باعاسى, ساۋدا سەرىكتەستەرىمىز بولىپ سانالاتىن ەلدەردەگى ۆاليۋتا باعامى سياقتى پارمەندى سىرتقى ىقپالدار تۇراقتالدى. وسىنداي جاعدايدا بيىلعى اقپان ايىنان بەرى تەڭگە نىعايا باستادى, بۇل ۇدەرىس وسى ايدا جالعاستى. ءبىز ۇلتتىق ۆاليۋتا باعامىنداعى اۋىتقۋ ايتارلىقتاي تومەندەگەنىن جانە ونىڭ 1,6 پايىزعا نىعايعانىن بايقاپ وتىرمىز», – دەدى ۇلتتىق بانك توراعاسى. سونىمەن قاتار دانيار اقىشەۆ سالىمداردى دوللارسىزداندىرۋ ءۇردىسى باستالعانىن ايتتى. «ەل تۇرعىندارى مەن كاسىپورىندار ۇلتتىق ۆاليۋتاداعى سالىمدارىن بىرتىندەپ كوبەيتە باستادى. وسى ايدا بۇل ءۇردىس كۇرت جەدەلدەدى», – دەدى ۇلتتىق بانك توراعاسى. مەملەكەت باسشىسى كەزدەسۋ قورىتىندىسى بويىنشا بىرقاتار ناقتى تاپسىرما بەردى. تالعات رايىمبەك. دەرەك, سۋرەت: akorda.kz.