ازەربايجاننىڭ بەلگىلى رەجيسسەرى توفيگ يسمايلوۆ قايتىس بولدى

استانا. 28 ناۋرىز. ازەربايجاننىڭ بەلگىلى اكتەرى ءارى رەجيسسەرى, حالىق ءارتيسى, پروفەسسور, عىلىم دوكتورى توفيگ يسمايلوۆ 25 ناۋرىز كۇنى 77 جاسىندا قايتىس بولدى. بۇل Trend Life اقپارىنا سىلتەمە جاساعان egemen.kz حابارلادى. توفيگ يسمايلوۆ 1939 جىلى 6 ساۋىردە باكۋدە تۋعان. ازەربايجان مەملەكەتتىك ونەر ينستيتۋتىنىڭ اكتەرلىك فاكۋلتەتىن بىتىرگەن. كەيىن ماسكەۋدە جوعارى رەجيسسەرلەر كۋرسىندا وقىعان. 1969-1988 جىلدارى «ازەربايجان» كينوستۋدياسىندا جۇمىس ىستەدى, 1971 جىلدان ونەر ينستيتۋتىندا رەجيسسۋرادان ساباق بەردى, ال 1988-1994 جىلدارى سوندا كافەدرا باسقاردى. 1994-2006 جىلدارى تۇركيانىڭ ىستامبۇلداعى «مەمار سينان» مەملەكەتتىك ۋنيۆەرسيتەتىندە ساباق بەردى. وسىندا ءجۇرىپ «تۇركى حالىقتارى كينوسىنىڭ تاريحى» دەگەن ەنتسيكلوپەديا جازىپ شىقتى. بۇعان ازەربايجان, وزبەكستان, قازاقستان, قىرعىزستان, تۇرىكمەنستان جانە تۇركيا كينولارى تۋرالى ماعلۇماتتار ەنگىزىلدى. ازەربايجاندا مەحتي گۋسەينوۆتىڭ «ابشەرون» رومانى بويىنشا ءبىرىنشى ءۇش سەريالى فيلم تۇسىرگەن. ول بۇدان باسقا تاعى «ءبىزدىڭ قالانىڭ تاستارى», «مۋزىكا مۇعالىمى», «ايرىقشا جاعداي», «مەن ءان شىعاردىم» دەگەن كارتينالاردى قويدى. ال «قيىن جولدار» دەگەن لەنتاسى اقش-تا كەڭەستىك 17 ۇزدىك ءفيلمنىڭ ءبىرى رەتىندە كورسەتىلدى. جاستار تاقىرىبىندا «ءبىزدىڭ ماحاللانىڭ جىگىتتەرى», «لاحىدج», «چوۆگان ويىنى» دەگەن كارتينالار ءتۇسىردى. ت. يسمايلوۆ اكتەر رەتىندە دە بىرقاتار فيلمدەرگە قاتىسقان. سولاردىڭ اراسىندا «اۋا حرامى», «وتەلدەگى بولمە», «ىستامبۇل رەيسى» جانە تاعى باسقالارى بار. تالعات رايىمبەك. دەرەك, فوتو: Trend Life.